Ezequiel 43 - Biblia en Guaraní - ?anderuete ?e’? Por? 2015

Ñanderuete reko jajaipa ou pe hogaguasúpe

1Upéi ha’e chegueraha pe okẽ oma’ẽva kuarahyresẽ gotyoguápe;

2ha péina ápe Israel Jára reko jajaipa ouhína kuarahyresẽ guio ha hyapu ha’ete ku yeta ryapúicha, ha pe yvy omimbi heko jajaipápe.

3Ha ko’ã mba’e ahecháva ojogua umi ambue mba’épe ojehechaukamava’ekue chéve payetépe Ha’e ou ramoguare ohundi hag̃ua Jerusalénpe; ko ahecháva payetépe ojogua avei pe ahechava’ekue payetépe Quebar ysyry rembe’ýpe; ha ajeity che rova yvýre.

4Ñanderuete reko jajaipa oike pe okẽ opytáva kuarahyresẽvoguápe.

5Ha pe Pytu Porãmbáva chérupi chegueraha hag̃ua pe korapy hyepy gotyoveguápe; ha péina ápe Ñanderuete reko jajaipa omyenyhẽ hogaguasu.

Tembiapoukapy Ñanderuete rogaguasúpe g̃uarã

6Ha ahendu peteĩ oñe’ẽva chéve Ñanderuete rogaguasu guive; ha pe kuimba’e oĩva’ekue chendive opyta gueteri che ykére,

7ha Ha’e he’i chéve: Kuimba’e ra’y, kóa ha’e che guapyhaguasu renda, ko’ápe amoĩta che pypytépe, ha ipype aikóta Israel ñemoñarenguéra apytépe opaite árape; ha araka’eve Israel retã nomongy’amo’ãvéima che reraguasu, ha’ekuéra ni hetã ruvichakuéra nomongy’amo’ãvéima heko ky’a rupi, térã umi tetã ruvicha kuave’ẽmby rupi oikuave’ẽva’ekue umi yvy ijyvatehápe omomba’eguasu hag̃ua ambue jára gua’úpe.

8Ha’ekuéra omoĩva’ekue hóga pyrũha che rogaguasu pyrũha ypýpe ha horconguéra che horcon ypýpe, opytánte peteĩ tápia che ha ha’ekuéra pa’ũme, upéicha omongy’a hikuái che reraguasu hembiapo ky’aite rupi ha upévagui Che ahundi ichupekuéra che pochy rupi.

9Ko’ág̃a ha’ekuéra omombo rire mombyry ijára gua’úpe, ha oñemomombyry hetã ruvicha retekuégui, upévare Che aiko jevýta ijapytepekuéra opaite árape.

10Nde, kuimba’e ra’y, ehechauka opaite ko’ã mba’e Israel retãme, otĩete hag̃ua hembiapo vaiete rupi ha upéi toñeha’ã hikuái oiko hag̃ua hekoitépe che rogaguasurãme.

11Ha otĩ ramo hikuái opaite mba’evai ojapova’ekuégui, eikuaauka porã ichupekuéra mba’eichaitépa pe óga tuichakue, umi oñesẽha ha umi ojeikeha, ha opaite mba’e oguerekótava guive, ha mba’eichaiteva’erãpa, ha opaite hesegua tembiapoukapy, ehechauka porãmba ha ehaiukapa hesa renondetépe ikatu hag̃uáicha ombosako’i porãmba hikuái ha ojapopa hekoitépe.

12Ko’ãva ningo Ñanderuete rogaguasu rembiapoukapy: Pe cérro ru’ãme, pe óga tuichakue, ha pe yvy ijerekuévo oĩva guive oñemboykéma chéve g̃uarã. Ema’ẽ porãke, ko’ãva ningo pe óga rembiapoukapy:

13Pe kuave’ẽmby renda tuichakue ningo: Ipyenda 51 centímetro, ipypuku ha ipyva’erã avei 51 centímetro; ha hembe’y jerekuévo okáguio oĩta peteĩ tábla jeguaka ramo ha ipýva 25,5 centímetro. Péicha ningo pe kuave’ẽmby renda yvatekue:

14Ipyenda guive, oĩva yvy apére, hopyta rembe’y peve, osẽva okápe, ijyvate 1,02 métro ha ipykue 51 centímetro, ha pe jeguaka opakuevogua michĩvéva guive pe tuichavéva peve oguereko 2,04 métro, ha ipykue 51 centímetro.

15Pe kuave’ẽmby renda ijyvate 2,04 métro, ha pe kuave’ẽmby renda ári oĩ irundy hatĩ yvate ojehupíva.

16Ha pe kuave’ẽmby renda ru’ã ipuku 6,12 métro ha ipykue 6,12 métro avei, irundy ijyke peteĩcha meme.

17Ipyenda ipuku 7,14 métro ha ipy irundyve yke gotýo avei 7,14 métro, ha 25,5 centímetro ipe pe tábla jeguaka hembe’y ijerekue reheguáva; ha ipyenda 51 centímetro ipy irundyve ijyke gotýo, ha pe jejupiha opyta kuarahyresẽ gotýo.

18Ha Ha’e he’i chéve: Kuimba’e ra’y, péicha he’i pende Ruete: Ko’ãva hína mba’e oje’éva pe kuave’ẽmby renda ojejapoha árape g̃uarã, oñekuave’ẽ hag̃ua hi’ári kuave’ẽmby ha ojehypýi hag̃ua hi’ári pene kuave’ẽmby ruguykue.

19Ha nde rehenoiva’erã umi pa’i, Levi ha Sadoc ñemoñarenguérape, toñemboja che ypýpe, he’i pende Ruete, ha’ekuérante oikuave’ẽva’erã ha nde reme’ẽta ichupekuéra peteĩ tóro ra’yrusu oikuave’ẽ hag̃ua kuave’ẽmby angaipa reheguáva ramo,

20ha rejapyhýta huguykuégui, ha rehypýita umi kuave’ẽmby renda ratĩ irundyve rehe, umi irundyve guapyha yke rehe, ha hembe’y jerekue rehe; upéicha remopotĩta hi’angaipágui.

21Upéi ejapyhy pe tóro ra’yrusu kuave’ẽmby angaipa reheguáva, ha ehapy pe kuave’ẽmby rendápe che rembiapoukapy he’i háicha, che rogaguasu renondépe.

22Ha mokõi ára haguépe reikuave’ẽta peteĩ kavara mácho iporãitéva hembiapo vai repy ramo ha péva rupi oñemopotĩva’erã pe kuave’ẽmby renda, oñemopotĩ haguéicha pe tóro ra’yrusu rupi.

23Reikuave’ẽ rire pe kuave’ẽmby angaipa reheguáva, reikuave’ẽta peteĩ tóro ra’yrusu iporãva, ha reiporavóta pe ovecha atýgui peteĩ ovecha mácho iporãva;

24ha umía reikuave’ẽta pende Ruetépe g̃uarã ha umi pa’i oitýta juky hi’arikuéra, ikuave’ẽmby rupi omomba’eguasúta Ñanderuetépe.

25 Siéte ára javeve ha’ekuéra oikuave’ẽva’erã peteĩ kavara mácho kuave’ẽmby angaipa reheguáva; ha upéicha oikuave’ẽva’erã avei peteĩ tóro ra’yrusu ha peteĩ ovecha mácho iporãva ijovecha atýgui.

26 Siéte ára ojapova’erã ko’ã kuave’ẽmby oñemopotĩ hag̃ua pe kuave’ẽmby renda yvyariguakuéra rembiapo vaígui, ha péicha oñemboyke ha omopotĩva’erã pe kuave’ẽmby renda Ñanderuetépe g̃uarã.

27Ha ohasávo umi 7 ára, pe ára 8-ha guive tenonderã gotýo, umi pa’i oikuave’ẽva’erã pe kuave’ẽmby renda ári pene kuave’ẽmby ojehapypáva ha pene kuave’ẽmby py’aguapy reheguáva peiko porã jevy hag̃ua che renondépe, he’i pende Ruete.