1 Corintoyguakuérape 1 - Biblia en Guaraní - ?anderuete ?e’? Por? 2015

Maitei

1Che, Páblo, añehenoiva’ekue Hesu Crísto remimondo ramo (apóstol ramo) Ñanderuete rembipota rupi; ha che hermáno Sóstenes avei,

2rohai ko kuatiañe’ẽ iglésia Corintoyguápe g̃uarã, oñemboheko potĩva’ekue Hesu Crísto rupi, ha oñehenoiva’ekue oiko hag̃ua heko porãva ramo, ha opaite ambue hermanokuéra oñehenoimava’ekuépe opárupi ha omomba’eguasúva guivépe Hesu Crísto réra.

3Ñandejára Ñanderuete ha Ñandejára Hesu Crísto poriahuvereko ha ipy’aguapy tomyenyhẽ pende rekove.

Páblo oagradece

Hesu Crístope

4Che agradece tapia Ñanderuetépe penderehe, Ha’e penderovasa haguére Hesu Crísto rupi.

5Opaite mba’épe peñemopeteĩgui ipype, opaite ñe’ẽme ha opaite kuaapy arandúpe.

6Hesu Crísto ñe’ẽ oñemombarete pende rekove.

7Upévagui ojejohu avei pende apytépe opaichagua Pytu Porãmbáva me’ẽmby ojejohu háicha avei ambue iglesiakuérape, peha’ãrõ aja Hesu Crísto ou jevy peve.

8Ha’e voi penemokyre’ỹ peiko hag̃ua heko potĩva ramo, Ha’e ou jevy peve.

9Ñanderuete reko noñemoambuéi, Ha’e nopyrũi iñe’ẽ rehe araka’eve, Ha’e ningo penerenoiva’ekue peñembopy’apeteĩ hag̃ua ita’ýra, Ñandejára Hesu Crísto ndive.

Juavy Corínto iglésiape

10Che hermanokuéra, ajerure peẽme Ñandejára Hesu Crísto rérape peñe’ẽmba hag̃ua peteĩ mba’énte, ha anítei oĩ pende apytépe ñorãirõ, tapeiko uvei oñondivepa peteĩ py’ápe ha peteĩ ñe’ẽme.

11Oje’e ningo chéve penderehe, Cloe rogaygua rupi, oĩha ñorãirõ pende apytépe.

12Oĩgui he’íva (pende apytépe): Che, Páblo aty rehegua, ambue katu he’i: Che, Apólo aty rehegua; ambue: Che, Pédro aty rehegua, ambueve katu: Che, Crísto aty rehegua.

13Hesu Crísto piko oñemboja’opa, térã Páblo piko oñemosãingova’ekue kurusúre pende rayhupápe, térã piko peẽ pejebautizaukára’e Páblo rérape.

14Che agradece Ñanderuetépe, che ndabautizái haguére avavépe pende apytépe, Críspo ha Gáiope añómante,

15ani hag̃ua avave he’i che abautiza hague ichupe che rérape.

16 Abautizava’ekue avei Estéfanas rogayguakuérape, ko’ãva rire ndaikuaái abautizavépara’e.

17Hesu Crísto ningo nachemondoiva’ekue aporobautiza hag̃ua, amyasãi hag̃ua iñe’ẽnte uvei, ani hag̃ua Hesu Crísto ñemano kurusúre opyta mba’e reípe.

Ñanderuete pu’aka ha arandu

18Umi oñehundívape g̃uarã, Hesu Crísto ñemano ñe’ẽ výro rei, ñande jajesalvávape g̃uarã katu Ñanderuete ñe’ẽ ipu’akapa.

19Ñanderuete kuatiañe’ẽme ningo ojehai voi: Che ambyaíta iñarandúva arandu, ha che amboykéta pe oñe’ẽkuaáva ñe’ẽ, (Isaías 29,14).

20Moõ piko oĩ iñarandúva. Moõ piko oĩ oporombo’ekuaáva. Moõ piko oĩ oñe’ẽkuaáva. Ñanderuete ombovýro rei opaichagua yvyarigua arandu.

21Tetãyguakuéra ndoikuaaiva’ekue Ñanderuete arandu, Ha’e osalvasénte kuimba’e ha kuñakuérape jerovia rupi, ha’ete ramojepe ichupekuéra ñe’ẽ výro reíva.

22Judayguakuéra ningo ohechase mba’eguasu techaukapyrãva (milágro) ha Greciayguakuéra katu oheka arandu.

23Ñande katu ñamombe’u Hesu Crístope, oñemosãingova’ekue kurusúre; Judayguakuérape g̃uarã kóva opyta ñepysãngaha ramo, ha Greciayguakuéra výro rei.

24Judaygua térã tetã ambueyguápe ore romoherakuã Hesu Crístope, Ha’e ningo Ñanderuete pu’aka ha arandu.

25Ñanderuete rembiapo (Hesu Crísto omanova’ekuégui kurusúre) ojogua mba’e výro rei yvyariguakuérape, iñarandueteve katu opaichagua kuimba’e arandúgui; ha Ñanderuete mba’e kangy (Hesu Crísto omano va’ekuégui kurusúre) imbareteve katu opaichagua kuimba’e pu’akágui.

26Che hermanokuéra, peikuaa porãke ndahetái kuimba’e iñarandúva, ndahetái ipu’akáva, ndahetái karaiguasukuéra oñehenóiva kuimba’ekuéra apytégui oike hag̃ua Ñanderuete rekohápe (yvágape).

27Umi itavývape, kuimba’e ha kuñakuéra apytégui, Ñanderuete oiporavo, Ha’e omotĩ hag̃ua umi iñarandúvape; ha umi ikangývape Ñanderuete oiporavo, Ha’e omotĩ hag̃ua umi imbaretévape.

28Umi iporiahúva ha ikangývape, kuimba’e ha kuñakuéra apytégui, Ñanderuete oiporavo ombyai hag̃ua umi oñembotuichávape,

29ani hag̃ua mba’eveichagua kuimba’e térã kuña ikatu oñembotuicha Ñanderuete renondépe.

30Ñanderuete rupi ñande jaiko Hesu Cristopype, Ha’érupi jahupity Ñanderuetégui: Arandu, justícia (tekojoja), teko potĩ ha salvacion,

31upévare ojehai avei Ñanderuete kuatiañe’ẽme: Oime ramo oñemomba’eguasuséva toñemomba’eguasu Ñanderuetepype, (Jeremías 9,23).