Deuteronómio 7 - Biblia en Guaraní - ?anderuete ?e’? Por? 2015

Ñemomarandu umi jára gua’u rehe

1Ág̃a Ñanderuete penemoingévo pe yvy peiketahápe, Ha’e omoĩta pende poguýpe ha omosẽta pene renonderãgui heta tetãnguérape: Hetgua, Gergesgua, Amorgua, Canaangua, Feresgua, Hevgua ha Jebusguakuérape, 7 tetã tuicha ha imbaretevéva pendehegui.

2Ha Ñanderuete, Ñandejára, omosẽ ramo ichupekuéra pene renondégui ha pejapóma ramo sarambi ichuguikuéra, pehundietévo ichupekuéra, ndapeikeiva’erã jekupytýpe hendivekuéra ha ndapeiporiahuverekoiva’erã ichupekuéra.

3Ha ani peiko oñondive peteĩ ógape; napeme’ẽiva’erã pende rajy ita’yrakuérape ha ani pemomenda pende ra’ýpe itajyrakuéra rehe.

4Omombiáta hikuái nde ra’ýpe che rapykuérigui ha ojeroviáta ambue jára rehe ha pende Ruete pochy hendy joava’erã penderehe, ha pya’e peñehundiva’erã.

5Péicha pejapova’erã hesekuéra: Ikuave’ẽmby rendakuéra pembyaipava’erã, pejokapava’erã ha’ãngakuéra, pembyaipava’erã ijára Asera ra’ãngakuéra ha pehapypava’erã ijára gua’u ra’ãngakuéra tatápe.

Israel toñemboyke Ñanderuetépe g̃uarã

6Peẽ ningo tetã oñemboykéva Ñanderuete, Ñandejárape g̃uarã; Ñanderuete, Ñandejára pendeporavókuri peiko hag̃ua ichupe g̃uarã peteĩ tetã hekopotĩva ramo, ambue tetãnguéra apytépe oikóva guive ko yvy apére.

7Ñanderuete napendeporavói, peẽ peteĩ tetã ituichávagui, Ha’e pendeporavo peẽ pendemichĩvégui ambue tetãnguéragui.

8Ñanderuete penderayhúguinte pendeporavo ha ojaposégui iñe’ẽ ome’ẽmava’ekue pende rukuérape, upévare penerenohẽ pyapy mbaretepópe tembiguái rekógui, faraon, Egípto retã ruvicha poguýgui.

9Peikuaa porãke, Ñanderuete, ha’égui pende Jára oikóva hekoitépe, iñe’ẽ ome’ẽmava’ekue katuete ojapóta avei, Ha’e oiporiahuvereko umi ohayhúvape ichupe ha ojapóva hembiapoukapy, 1.000 ñemoñarenguéra (generaciónes) peve;

10umi oñemoĩva hese katu Ha’e ohaviráta ohundiete peve; Ha’e naimbeguéi hese ija’e’ỹva ndive, omyengovia peve hembiapo vaikue.

11Upévare pejapókena imbo’epy ha hembiapoukapykuéra, che ha’émava peẽme pejapo hag̃ua ko árape.

Pe iñe’ẽrendúva katuete ohupitýta ijehovasa

12Peẽ peneñe’ẽrendu ha pejapo ramo Ñanderuete rembipota Ha’e ojapóta iñe’ẽ ome’ẽva’ekue peẽme ha pende rukuérape, ha Ha’e pendeporiahuverekóta,

13penderayhúta, penderovasáta ha penemoñemoñáta, Ha’e ohovasáta pene rembireko membyryru ha pende yvy’akuéra, pene mba’e ra’ỹinguéra, pende parral rykue, pende acéite, pende vaka membykuéra, ha pende ovecha atykuéra, ha pe yvy oprometeva’ekue pende rukuérape ome’ẽtaha katuete peẽme.

14Ha’e penderovasavéta peẽme mayma ambue tetãnguéragui, ndoikomo’ãi pende apytépe kuimba’e ita’yra’ỹva ha kuña ndaikatúiva imemby, ha upéicha ojehúta avei pene rymbakuéra apytépe.

15Ñanderuete oipe’apáta pendehegui opaite mba’asy ha umi mba’evaieta (plága) Egípto retãpýre oikova’ekueichaguágui, peẽ peikuaa gueteri, umía Ha’e omoĩtaha katuete penderehe ija’e’ỹva ári.

16Peẽ pehundíta mayma tetãme, Ha’e omoĩva guive pende pópe, napeperdonamo’ãi ichupekuéra ndapeikoiva’erã itupãnguéra rapykuéri, oikova’erãgui peẽme g̃uarã ñepysãnga ramo.

17Ha peje ramo pende py’apýpe: Ko’ã tetã hetaitereive ñandehegui, mba’éichapa ikatúta ñambopoguypa.

18Ani pekyhyjétei ichuguikuéra; penemandu’a porãke mba’épa ojapova’ekue Jahve, Ñanderuete, faraon rehe ha Egípto tuichakue rehe;

19umi mba’eguasueta pende resakuéra ohechava’ekue, ha umi techaukaha ha umi milágro Ñanderuete pyapy mbarete ha ijyva jepyso rupi ojapova’ekue penerenohẽvo Egíptogui, péicha Ñanderuete ojapo jevyva’erã oimeraẽ tetã rehe oñemoĩséva penderehe.

20Ñanderuete, Ñandejára, omondóta avei hi’ári káva oñehundipa peve, umi hembýva ha okañymava’ekue pene renonderãgui.

21Ani pendepy’akangýtei henondepekuéra, Jahve, Ñanderuete, oĩ pende apytépe, Ñandejára oporomongyhyjéva ha ipu’akapáva.

22Ñanderuete omosẽmbáta ko’ã tetãme pene renonderãgui sa’i sa’ípe; peẽ napehundipaiva’erã ichupekuéra sapy’aitépe, ani hag̃ua tymba ñarõ saite oñembohetavéva ondyry penderehe.

23Ñanderuete, Ñandejára, omoĩta ichupekuéra pende pópe ha oipy’ajopýta ichupekuéra heta mba’evai rupi, oñehundipa peve.

24Ha’e omoĩta pende pópe hetã ruvichakuérape, ha peẽ pehundíta herakuéra ára guýgui; avave noñemoĩmo’ãi penderehe, pehundipa peve ichupekuéra.

25Ijára ra’ãngakuéra pehapypava’erã; ndapeipotaiva’erã pene mba’erã ramo ipláta ni hi’óro, anítei hesekuéra rehehápe peñepysangátei, péva mba’evaiete Ñanderuete, Ñandejárape g̃uarã.

26Ha ndapegueruiva’erã pende rógape umi mba’evaietéva, ani hag̃ua peiko avei maldicion guýpe; pemboykeva’erã uvei ko’ã mba’evaiete, ỹrõ peẽ pe’áta avei maldicion guýpe.