1Che romomba’eguasúta ndéve, Che Ruete, Nde ningo che retã ruvichaguasu, amboetese nde réra opaite árape g̃uarã.
2Che romomba’eguasu opaite árape ha nde réra amboetese tapia g̃uarã.
3Tuichaiterei ningo Ñanderuete ha toñemomba’eguasu ichupe hekoitépe, imburuvicha reko ndajaikuaapamo’ãi araka’eve.
4Tuvakuéra tomomba’eguasu Ñanderuete rembiapokue ita’yrakuéra renondépe, tomombe’u ichupekuéra umi mba’e tuichaitéva Ha’e ojapova’ekue.
5Che aikuaauka porãse nde resape ojajáiva ha ne rembiapokue techapyrãva.
6Toñe’ẽ ne rembiapokue porãite ipu’akapáva ha toikuaauka ne rembiapo tuichaitéva,
7toñemombe’u ndepy’a porãha, ha nde justícia togueropurahéi joa.
8Ñanderuete ipy’a porã ha iporiahuvereko, hasy ipochy hag̃ua ha imborayhu ningo ituichaitereígui.
9Ñanderuete imba’e porãite maymáva ndive g̃uarã, ha oiporu imborayhu opaite hembiapokue rehe.
10Opaite ne rembiapo omomba’eguasu che Ruetépe, ha umi heko potĩva omboete ndéve año.
11Omombe’u hikuái ne retã mimbipa ha toñe’ẽ hikuái nde pu’akapa reheve,
12oikuaauka hikuái yvyarigua ñemoñarenguérape ne rembiapokue ipu’akapáva ha ne mburuvicha reko jajaipáva.
13Ne retã oiko tapia g̃uarã, ha ne mburuvicha reko oiko opaite ára atyguasúpe g̃uarã.
14Ñanderuete ojoko umi ho’ávape, ha omopu’ã jevy umi ikangývape.
15Opaite tesa oma’ẽ jeroviapópe nderehe, ha hi’araitépe Nde reme’ẽ ichupekuéra hembi’urã.
16Ndepojera ramo opaite oikovévape g̃uarã okaru porãta.
17Ñanderuete oisãmbyhy hekoitépe ha heko poriahuvereko ojehechakuaa hembiapokuéra rupi.
18Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.
19Umi okyhyjévape ichugui Ha’e ojapo mba’eporã, ha ohenduhína avei isapukái asykuéra, ha oguenohẽ ichupekuéra ijejopy vaígui.
20Ñanderuete oñangareko mayma ichupe ohayhúva rehe, tekove iñañávape katu Ha’e ohundiva’erã.
21Che juru omomba’eguasu ore Ruetépe, ha maymáva tomboete tapia g̃uarã héra porãite.
Who We AreWhat We EelieveWhat We Do
2025 by iamachristian.org,Inc All rights reserved.
