Colosayguakuérape 2 - Biblia en Guaraní - ?anderuete ?e’? Por? 2015

1Aipota ningo peẽ peikuaa porã mba’éichapa añeha’ãmba tuichaite penderehe ha Laodiceaygua rehe ha opaite umi ndohechaiva’ekue rehe araka’eve che rova,

2omoangapyhy hag̃ua ipy’apykuéra, oiko hag̃ua peteĩ ñe’ẽme Ñanderuete mborayhúpe ha oikuaa porãve hag̃ua ohóvo Ñanderuete mba’e ñemimby, ha’eha Hesu Crísto, ha henyhẽte hag̃ua Ñanderuete arandúgui.

3Ipype ningo ojajaipa opaite arandu ha kuaapy.

4Péva che ha’e ani hag̃ua avave penembotavy iñe’ẽkuaa rupi térã ijuru he’ẽ rupi.

5Che retépe naiméi ramojepe pende apytépe, che pytu porãme aĩ penendive; avy’a ha ahecha peẽ peikoha hekópe ha kyre’ỹme pejeroviágui Hesu Crísto rehe.

6Peẽ peñemomba’e haguéicha Ñandejára Hesu Crísto rehe, upeichaite peiko avei ipype.

7Peñembohapo ha peñemopu’ã ipype, ha peñemohatãkena ipype pende jerovia rupi.

Ñande rekove pyahu ou Hesu Crísto rupi

8Cháke! Peñeñangarekóke, anítei avave penemoñuhã iñembotavy térã yvyarigua arandu výro rei rupi, térã yvyarigua jepokuaa ha kuaapy rupi, térã yvy, térã kuarahy, térã pytu vai ñemomba’eguasu rupi, pemomba’eguasu uvei Hesu Crístope.

9Hesu Cristopype ningo oĩ avei opaite Ñanderuete reko.

10Ha Hesu Cristopype peẽ penerenyhẽ, ha’égui hína opavave Jára ha ipu’akapa.

11Ipype ningo peẽ peñekytĩ’ova’ekue (penecircuncidava’ekue) avei, napeñekytĩ’ói katu kuimba’e po rupi, Hesu Crísto rupi uvei, pemoĩvo pende rete rembipota vai Hesu Crísto poguýpe,

12ha péva ojehu peẽ peñeñotỹgui hendive, pe bautísmo rupi. Ha’érupi peẽ penace jevy pejeroviágui Ñanderuete pu’aka tuichaitéva rehe ha Ha’e omoingoveva’ekue Hesu Crístope omanómava apytégui.

13Peẽ pemanova’ekue avei pene rembiapo vaieta rupi ha pende rete rembipota vai rupi, ko’ág̃a katu Ñanderuete penemoingovéma Hesu Crísto ndive, operdona haguére ipy’a porã rupi opaite ñane rembiapo vaikue.

14Pe cuénta ñande jarekóva Ñanderuete ndive, Hesu Crísto ogueraha ikurusúre, ha opagapa ñane rendaguépe iñemano rupi.

15Upéicha Hesu Crísto, iñemano rupi, ombopoguy opaite Satana ha hembiguaiguasukuéra pu’aka ha omotĩ ichupekuéra opavave rovaképe ombotyryrývo ichupekuéra hapykuéri.

Mbo’ehára japu

16Upévare, aníkena avave oñe’ẽvai penderehe pe’úva ha pey’úva rehe, térã arete ára rehe, térã jasy pyahu rehe, térã sábado rehe (pytu’uha ára rehe).

17Opaite ko’ã mba’e ningo ouva’erãva’ekue ta’ãngánte, Hesu Crísto katu pe tete añeteguáva.

18Aníkena avave oipe’a pendehegui pene rembiapo repy iñemomirĩ gua’u térã hi’ángel ñemomba’eguasu rupi, térã umi mba’e ohechava’ekue ike peguáre térã techapáy (vision) rupi, péva ningo hi’ánga rembipota vai ojererovuséguinte.

19Ha’ekuéra ndojejokói pe Akã rehe (Hesu Crístore): Pe yvyarigua rete akã oisãmbyhy háicha hete, ipo, ipykuéra ha hajyguekuéra rupi omba’apo porãmba hag̃ua oñondive, péicha Ñanderuete oisãmbyhy avei, Hesu Crísto rete okakuaa porã hag̃ua. Hesu Crísto rete ningo ijiglésia ha Ha’e ningo ijiglésia Akã.

20Peẽ pemano rire Hesu Crísto ndive, mba’érehepa peheja oñemoĩ peẽme tembiapoukapy heñoiva’ekue yvyarigua akãgui, ha oipotáva peẽ pemomba’eguasu yvy, kuarahy ha pytu vaípe. Peñemboyke katu ko’ã ñemomba’eguasu vaígui ha yvyarigua rembiapoukapy he’ívagui:

21Ani repoko kóvare, térã ani reha’ã péva, térã ani reñemboja kóva rehe,

22opaite ko’ã mba’e opa rei ojeporu rire, heñoiva’ekuégui yvyarigua kuaapy ha mbo’epýgui.

23Ha’ekuéra omombe’u oĩha añetegua ha ñepytyvõite icultokuérape, ha’ekuéra katu ojopy vaínte kuimba’e ha kuña rekokuéra ijyvyarigua rembiapoukapy rupi; hembiapo rupínte ha’ekuéra oñembotuichase.