2 Crónicas 13 - Biblia en Guaraní - ?anderuete ?e’? Por? 2015

Abías oiko tetã ruvicha ramo

1Tetã ruvicha Jeroboam oisãmbyhy ramo 18 áño, Abías oñepyrũ oisãmbyhy Juda retãme.

2Ha oisãmbyhy mbohapy áño Jerusalénpe, isy héra Micaía, Uriel, peteĩ Guibeaygua rajy. Ha oiko ñorãirõ Abías ha Jeroboam apytépe.

3Upéramo Abías ombosako’i isoldádo aty 400.000 kuimba’e, ipy’aguasu ha ojeporavopyréva; ha Jeroboam ombyaty 800.000 kuimba’e ojeporavopyréva, mbarete ha ipy’aguasúva.

4Ha Abías oñemoĩ Zemaraim cérro ári, péva oĩ Efrain cerrorusúpe, ha he’i: Cherendúke, Jeroboam ha mayma Israelgua.

5Ndapeikuaái piko Ñanderuete, Israel Jára, ome’ẽ hague Israel retã Davídpe opaite árape, ichupe ha ita’yrakuérape, ñe’ẽme’ẽmby juky rehegua rupi, ndikatúiva oñembotove, (Levítico 2,13).

6Jeroboam, Nebat ra’y katu, peteĩ, Salomon rembiguái, oñemoĩ ha opu’ã ijára rehe, Salomon, David ra’y katu.

7Ha oñembyaty hendive kuimba’e iñañáva, ha oiko reíva ha ombopoguy Roboam, Salomon ra’ýpe; Roboam imitã ha ipy’amirĩgui ndaipu’akái hesekuéra.

8Ko’ág̃a peñeha’ã peipe’a hag̃ua Ñanderuete retã David ra’ykuéra pógui, peguerekógui penendive umi tóro ra’y oroguiguáva Jeroboam ojapoukáva peẽme, pende jára ramo.

9Peẽ piko napemosẽi Ñanderuete pa’ikuérape, Aaron ra’ykuérape ha Leviguakuérape, ha pemoĩ pende pa’i ramo ambue tetã ojapo háicha, ikatu hag̃uáicha oimeraẽva ou oñemomarangatu peteĩ tóro ra’y ha ovecha mácho reheve, ha péicha oiko hag̃ua ichugui jára gua’u pa’i ramo.

10Oréve g̃uarã katu Ñanderuete opyta ore Jára ramo, ndoropoíri ichugui; ha umi pa’i omba’apóva Ñanderuetépe g̃uarã Aaron ra’ykuéra voi, ha umi oipytyvõva ichupekuéra Leviguakuéra meme.

11Ha’ekuéra oikuave’ẽ kuave’ẽmby ojehapypáva Ñanderuetépe g̃uarã, pyharevekue ha ka’arukuépe, mba’e ryakuã porã reheve; ha omoĩ avei umi pan ojehechauka hag̃ua mesa ári, ha omyendy pe tataindyenda oroguiguáva ka’arúpe; ore ningo rojapo Ñanderuete rembipota ha peẽ katu pepoíma ichugui.

12Peikuaa porãke Ñanderuete oĩha orendive ore Mburuvichaguasuete ramo, ha pa’ikuéra ituru reheve ombopu torypópe penderehe. Israel ra’ykuéra, ani peñemoĩ Ñanderuetére, pende rukuéra Járare, nosẽ porãmo’ãigui peẽme umi mba’e pejaposéva.

13Jeroboam katu ombosako’i peteĩ ñuhã ou hag̃uáicha ichupekuéra ijatukupéguio; ha oĩhína péicha henondepekuéra, ha pe ñuhã katu oñemoĩma Juda atukupe gotýo.

14Ha Juda oma’ẽvo, péina ojeitýma hi’ári henondéguio ha ijatukupéguio; ha upévagui sapukaipópe omba’ejerure Ñanderuetépe, ha umi pa’i ombopu iturukuéra.

15Upémaramo Judayguakuéra osapukaipa hatã iñorãirõ sapukái ha Ñanderuete omosarambi Jeroboam ha opaite Israelguakuérape, Abías ha Judayguakuéra renondégui.

16Ha Israel ñemoñarenguéra okañy Juda renonderãgui ha Ñanderuete omoĩ ichupekuéra ipopekuéra.

17Abías ha hapichakuéra hendive oĩva ojuka hetaitereípe, ha Israelguakuéra apytégui ojejuka 500.000 kuimba’e jeporavopyréva.

18Péicha Ñanderuete omotĩ Israel ñemoñarenguérape pe ára pévape, ha Juda ñemoñarenguéra ipu’aka ambue Israelguakuéra rehe ojeroviágui Ñanderuete, ituvakuéra Jára rehe.

19Ha Abías oho Jeroboam rapykuéri, ha oipe’a ichugui mbohapy itavakuéra: Bet-el, itava’ikuéra reheve; Jesana, itava’ikuéra reheve, ha Efrain itava’ikuéra reheve.

20Ha Jeroboam araka’eve ndoguerekovéi pu’aka Abías rehe oikove aja; ha Ñanderuete ombohasy Jeroboámpe ha omano.

21Abías katu oñemombarete mbareteve ohóvo. Ha’e hembireko 14, ha onace ichupe g̃uarã 22 ta’ýra ha 16 tajýra.

22Ambue Abías rembiapokuéra, hekove reko ha iñe’ẽngue, ojehaipa proféta Iddo kuatiañe’ẽme.