1Péicha he’i Ñanderuete: Tereho ha ejogua peteĩ kambuchi ñay’ũguiguáva ijapoharégui, ha egueraha nendive mbovymi karai ancianokuérape ha hendivekuéra mbovymi ambue karaikuéra, pa’ikuéra apytégui.
2Tapeho Hinom ra’y cerrokuéra pa’ũme, opytavahína Jerusalen rokẽguasu kuarahyresẽ gotýo, ha eguerosapukái upépe umi ñe’ẽ che ha’étava ndéve.
3Ha péicha eréta: Pehendúke Ñanderuete ñe’ẽ, peẽ Juda retã ruvichakuéra ha mayma Jerusalenguáva. Péicha he’i Ñandejára, Yvága Atykuéra Jára ha Israel Jára: Peikuaa porãke, Che aguerúta mba’evai ko tava kóvape, ha mayma apysa ohendúva guive hyapupáta,
4peẽ pepoi haguére chehegui, ha ndapeikói hekoitépe ko yvy kóvape ha ipype peikuave’ẽ haguére mba’e ryakuã porã ambue jarakuérape, peẽ, pende rukuéra ha Juda retã ruvichakuéra ndoikuaaiva’ekue ha pemyenyhẽ haguére ko táva kóva umi ánga ipotĩva ruguykueguiguáva.
5Peẽ pemopu’ã kuave’ẽmby renda Baálpe g̃uarã, peikuave’ẽ hag̃ua pene mitãkuérape, ko’ã mba’e Che nda’eiva’ekue peẽme pejapo hag̃ua, ni ndoikeiva’ekue che py’apýpe,
6upévarehe, peikuaa porãke, outahína pe ára, he’i pende Ruete ko válle kóva ndaheramo’ãvéima Tofet tata renda, ni Hinom ra’y cerrokuéra pa’ũ (válle), oñembohérata. “Jejukaguasu válle”.
7Che ambogue reíta Juda ha Jerusalen kuimba’e arandu ha aitýta ichupekuéra hesekuéra ija’e’ỹva kyse pukúpe ha he’õnguekuéra ame’ẽta, umi guyra yvate ovevévape ha umi mymba ñarõ oguatáva yvy apére, hi’upyrã ramo.
8Ko táva kóvape amoĩta mba’e oporomongyhyjéva ha ñembohory ramo; mayma ohasáva guive árupi ipy’andýi hag̃ua, ha oñembohorýta oñembyaipa haguére.
9Ha’ukáta ichupekuéra ita’ýra ha itajyrakuéra ro’okue, ha peteĩteĩva ho’úta hi’angirũ ro’okue, ñemongora ha jehasa asy ojopýta ichupekuéra ha umi hesekuéra ija’e’ỹva ojukáta ichupekuéra avei.
10Ha nde Jeremías rembohasapa rire ichupekuéra che ñe’ẽ, rejokáta pe kambuchi ñay’ũguiguáva umi kuimba’e ohóva nendive resa renondépe,
11ha eréta ichupekuéra, péicha he’i pende Ruete, Yvága Atykuéra Jára: Péicha amopẽta ko tetã ha ko táva kóvape, ku kambuchi ñay’ũguiguáva ojekáicha ha ndaikatuvéimava oñemyatỹrõ jevy; ha Tofétpe oñeñotỹmbáta, ndaiporimo’ãigui ambue yvy oñeñotỹ hag̃ua.
12Péicha ajapóta ko táva kóva rehe, he’i pende Ruete, ha mayma ipype oikóva ohasáta Tofetichaite.
13Umi Jerusalen róga, ha umi Juda retã ruvicha róga, oikóta Tofetichaite, oñemongy’a ha oikuave’ẽ haguére mayma óga apére mba’e ryakuã porã umi mbyja ára peguápe ha oñohẽgui hikuái víno ikuave’ẽmby ramo ambue jarakuérape.
14Ha Jeremías oho jevy Tofétgui, Ñanderuete omondo haguépe ichupe omomarandu hag̃ua, ha ou oñembo’y Ñanderuete rogaguasu korapýpe ha he’i mayma hetãyguakuérape,
15péicha he’i Yvága Atykuéra Jára, Israel Jára: Peikuaa porãke, Che aguerúta ko táva kóva ári ha mayma táva ijerekuévo oĩva ári opaite mba’evai ha’emava’ekue hesekuéra oñembopy’ahatã ha nacheñe’ẽrendúi haguére hikuái.
Who We AreWhat We EelieveWhat We Do
2025 by iamachristian.org,Inc All rights reserved.
