Daniel 8 - Biblia en Guaraní - ?anderuete ?e’? Por? 2015

Techapáy ovecha ha kavara mácho

reheguáva

1Tetã ruvicha Belsasar oisãmbyhy aja hi’áño mbohapyhápe ojehechauka chéve (Daniélpe) ambue mba’e che payetépe (visiónpe).

2Ha’ete ku aimérõ Súsape, kóva Elam retã tavaguasu opytáva Ulái ysyry rembe’ýpe.

3Ajesaupi jave ahecha peteĩ ovecha mácho oĩva pe ysyry rovái, ha’e hatĩ mokõi, umi hatĩ ijyvate ramojepe, peteĩ ijyvateve ambuégui; hatĩ ipaha pegua okakuaave pe tenondeveguágui.

4Ahecha pe ovecha mácho oikutu hatĩme pe kuarahyreike gotýo, yvate ha yvy gotýo, ndaipóri mymba ikatúva oñemoĩ hese térã ikatúva okañy ichugui ha’e ojapo ojaposéva guive ha oñembotuichave ohóvo.

5Ha ajepy’amongeta jave ko’ã mba’e rehe, péina ápe peteĩ kavara mácho pya’e ou (odispara) kuarahyreikéguio oja’ỹre yvy rehe ha pe kavara mácho hatĩ peteĩ tuicháva, hesakuéra pa’ũme.

6Ha ou pe ovecha mácho hatĩ mokõiva oĩháme, che ahechava’ekue pe ysyry rembe’ýpe, ha oñani ojeity hag̃ua hi’ári imbaretekue ome’ẽ háicha.

7Ha ahecha og̃uahẽvo pe ovecha mácho ypýpe, ojeity hese ha oikutu vaipa ichupe, omopẽ hatĩ mokõivéva, ha pe ovecha mácho naimbaretevéima oñembo’y hag̃ua henondépe, upéi pe kavara mácho oity ichupe yvýre, opyrũmba hese ha ndaipóri avave ikatúva osalva ichupe pe kavara máchogui.

8Upérõ pe kavara mácho oñembotuichaiterei; ha imbareteve jave hatĩguasu opẽ, ha hendaguépe osẽ irundy hatĩ tuichamíva, umía ojepyso umi irundy yvytu rehe.

9Ha peteĩ umi hatĩgui osẽ peteĩ michĩva, okakuaáva yvy gotýo, ha kuarahyresẽ gotýo, ha pe tetã mimbipa (Israel) gotýo.

10Ha oñembotuicha rire oñemoĩ yvága pegua aty rehe; ha umíva pa’ũgui ha mbyjakuéra apytégui oity yvy rehe ha opyrũmba hesekuéra.

11Ha’e oñemoĩ avei Yvága Aty Ruvicha rehe ha hembiguaiguasu rehe, ndohejái oikuave’ẽve hag̃ua ha omongy’a Ñanderuete rogaguasu.

12Pe kuave’ẽmby potĩ rendaguépe oñekuave’ẽ peteĩ mymba iky’áva ha oity Ñanderuete kuatiañe’ẽ yvýre ha ojapo ojaposéva guive, ha osẽ porãmba ichupe umi ojapóva guive.

13Ha upevove ahendu peteĩ yvága rembiguái (ángel) oñe’ẽ ramo, ha ambue ángel oporandu upe oñe’ẽvape: Araka’e pevépa hi’aréta ko techapáy, oikuave’ẽ hag̃ua kuave’ẽmby potĩ rendaguépe peteĩ mymba iky’áva ha opyrũve hag̃ua umi ojeroviávare Ñanderuete rehe ha hogaguasu rehe.

14Ha’e ombohovái: Ohasa peve 2.300 ka’aru ha pyhareve, upéi ae oñemopotĩ jevyva’erã Ñanderuete rogaguasúpe.

15Ha che, Daniel, ajepy’amongeta jave pe ojehechaukava’ekue rehe, che aikuaaseiterei mba’épa he’ise, upévare oñemoĩ che renondépe peteĩ ojoguáva peteĩ kuimba’épe.

16Ha ahendu peteĩ kuimba’e ñe’ẽ Ulái rembe’ýgui, osapukái hatãva ha he’i: Gabriel, emombe’u ichupe mba’épa he’ise umi mba’e ojehechaukava’ekue ichupe.

17Upéi Gabriel ou che rendápe, ha ha’e oñemoag̃uivévo che añemondyiete ha ajeity yvýre ovapývo. Ha’e katu he’i chéve: Eikuaa porãke, kuimba’e ra’y, ko mba’e kóva nde rehechavareína oikova’erã umi ára pahápe.

18Ha’e oñe’ẽ jave chéve, ha’a ovapývo yvýre peteĩ omanóvaicha, ha’e katu opoko cherehe ha chemoñembo’y jevy.

19Ha he’i: Eikuaa porãke, che aikuaaukáta ndéve upe mba’e oútava Ñanderuete pochy og̃uahẽ ramo umi ára pahápe, umi mba’e nde rehechava’ekue ningo ára paha reheguáva.

20Ha pe ovecha mácho rehechava’ekue ha hatĩ mokõiva, umía ningo Média ha Pérsia retã ruvichakuéra.

21Pe kavara mácho ningo ha’e pe Grécia retã ruvicha, ha hatĩguasu hesakuéra pa’ũme oĩva, péva ningo pe tetã ruvicha tenondeguáva.

22Ha pe hatĩ opẽva’ekue ha hendaguépe osẽ irundy hatĩ, he’ise pe tetãguasu oñemboja’otaha irundy tetãme, umía katu naimbaretemo’ãvéima pe tenondeveguaréicha.

23Ha ãva oisãmbyhypapotávo, ha omyenyhẽ rire hi’angaipa ryru, opu’ãva’erã peteĩ tetã ruvicha ikatupyrýva oporombotavy hag̃ua.

24Ipu’aka okakuaava’erã, ndaha’emo’ãi ramojepe imbaretetee rupi; ha’e oporohundíta, ha’e ojapóva guive osẽ porãmbáta ichupe, ha’e ohundíta umi imbaretévape ha Israel retãme.

25Oporombotavýgui, ijapu osẽ porãta, upévare ha’e oñembotuicháta ipy’apýpe, ha hetápe ohundíta oha’ãrõ’ỹre; ha oñemoĩ rire Ñanderuetére, ha’e oñehundíta hapichakuéra opoko’ỹre hese.

26Ha umi mba’e ojehechaukava’ekue payetépe ka’aru ha pyharevépe katuete oikóta, eñongatu porãmba nde py’apýpe, heta ára katu hi’aréta ojehupa peve ko’ã mba’e.

27Ha che, Daniel, apyta ajepy’apy ha cherasy aremi. Ha akuera jevy rire ajapo jevy tetã ruvicha rembiapo ha’e ome’ẽva’ekue chéve. Umi mba’e ojehechaukava’ekue katu chemondyiete ha ndaipóri avave ikatúva omyesakã chéve, ndaipóri avave omyesakãkuaáva chéve mba’épa he’ise ko’ã mba’e.