1Umi árape, ndaipóri ramoguare tetã ruvicha Israélpe, peteĩ Levigua oĩ mbohupa ramo Efrain cérro ruguáre, ha ogueraha peteĩ kuña iñirũrã ramo Belen, Juda peguágui.
2Ha pe kuña oiko haguére ambue kuimba’e ndive, okañy itúva rógape, Belen, Juda yvýpe, ha upépe oiko 4 jasy pukukue.
3Ha iména opu’ã ha oho hapykuéri, oñe’ẽ hag̃ua ichupe mborayhu reheve ha ogueru jevy hag̃ua; ha’e ogueraha hendive peteĩ hembiguái ha mokõi búrro; ha pe kuña omog̃uahẽ ichupe itúva rógape. Ha pe kuña ru ohechávo ichupe, osẽ omomaitei hag̃ua ichupe torypápe;
4ha hembireko ru, ojoko pe Leviguápe hógape mbohapy ára pukukue, okaru ha hoy’u oñondivepa, ha oke hikuái pe karai rógape.
5Pe irundyha árape opu’ãvo hikuái pyhareve, opu’ã avei pe Levigua oho hag̃uáicha; ha pe kuña ru he’i itajýra ménape: Embohory nde py’apy peteĩ pan pehẽnguemíme ha upéi tapeho.
6Ha oguapy mokõivéva oñondive okaru ha hoy’u hag̃ua. Ha pe kuña ru he’i pe Leviguápe: Che ajerure ndéve, epyta gueteri ko pyharépe ha evy’a.
7Pe Levigua opu’ãvo oho hag̃uáicha, hembireko ru ojoko joko ichupe, ha ohasa jevy pe pyhare hógape.
8Pe ára 5-hápe, pe Levigua, opu’ã pyhareve oho hag̃uáicha, ha pe kuña ru he’i jevy ichupe: Embohorýna ne ñe’ã ha eha’ãrõ ka’aru peve, ha okaru mokõivéva oñondive.
9Upéi opu’ã oho hag̃uáicha ha’e, ikuña ha hembiguái ndive. Upévo pe kuña ru he’i jevy ichupe: Ka’aruetéma ha iñypytũmbotáma, ajerureve ndéve ehasami jevy ko’ápe ko pyhare; péina iñypytũtama, eke ko’ápe, embovy’a ne ángape; ko’ẽ ramo pepu’ã pyharevete peho hag̃ua pende róga rapére.
10Ha pe Levigua ndopytasevéima pe pyhare, opu’ã uvei ha oho hikuái. Ha og̃uahẽ Jebus rovái peve, péva Jerusalen, mokõive ibúrro ijape rehegua reheve ha ikuña ndive.
11Ha og̃uahẽvo Jebúspe ka’aruetéma ha pe tembiguái he’i ijárape: Jaikéna Jebusguakuéra távape, jake hag̃ua ko’ápe ko pyhare.
12Ha ijára he’i ichupe: Ndaikemo’ãi tetã ambueygua távape Israel ñemoñarenguéra távape aháta ake, jahasa katu Gibea peve.
13Ha he’i hembiguáipe: Ñañeha’ãmba ñag̃uahẽ meve Gibea térã Rámape, ha upépe jakéta.
14Ha ohasa ohóvo hikuái, ha pe kuarahy oikévo og̃uahẽ hikuái Gibea ypýpe, péva peteĩ Benjamin táva.
15Ha ojei tapeguasúgui oke hag̃ua Gibeápe, ndaipórigui avave omoingéva ichupekuéra hógape oke hag̃ua pe pyhare, oguapy hikuái pe táva plázape.
16Ha péina ápe peteĩ kuimba’e tujáva ou ikokuemígui omba’apo hágui iñypytũmbávo, ha péva peteĩ Efraingua oikóva okaraygua ramo Gibeápe ha umi tavaygua Benjamingua meme.
17Ha pe kuimba’e tuja ojesaupívo ohecha pe Leviguápe iñirũnguéra ndive pe táva plázape, he’i ichupe: Mamóiko reho, ha mamóguipa reju.
18Ha ha’e he’i ichupe: Roju Belen, Juda peguágui ha rohose Efrain cérro ruguáre, che upepegua voi; ko’ág̃a rojevy rohóvo ore rógape, ha ndaipóri avave oremoingékuri hógape.
19Ore roguereko kapi’i ha tembi’u ore burrokuérape g̃uarã, roguereko avei pan ha víno chéve, che irũ ha che rembiguáipe g̃uarã, noroikotevẽi mba’evete rehe.
20Ha pe kuimba’e tuja he’i ichupe: Tandepy’aguapy, che voi ame’ẽmbáta peẽme peikotevẽva guive, peju chendive, anitei pepyta ko plázape pyhare pukukue.
21Ha ogueru ichupekuéra hógape, ha ha’e omongaru jave iburrokuérape, ambuekuéra ojepyhéi, okaru ha hoy’u.
22Ha’ekuéra ovy’a jave hína, péina ápe og̃uahẽ umi kuimba’e reko vaíva pe táva pegua ha omongora hikuái pe óga, ombota hikuái pe okẽre; ha oñe’ẽ hikuái pe kuimba’e tujápe, pe óga járape, he’ívo: Eguenohẽ pe kuimba’e oikeva’ekue nde rógape, roiko hag̃ua hendive.
23Ha osẽ pe óga jára ha he’i ichupekuéra: Nahániri, che ryke’ykuéra, ajerure peẽme ani pejapótei ko mba’evaiete; oikégui ko kuimba’e che rógape, che mbohupa ramo, anína pejapótei ko ñaña reko vaietéva.
24Péina ápe che rajy heko marã’ỹva ha che mbohupa kuña aguenohẽta okápe peẽme g̃uarã, peñemboharái ha pejapo hesekuéra pejaposéva, ani pejapo umi kuimba’e rehe mba’evaietéva.
25Ha umi kuimba’e katu nohenduséi ichupe, upérõ pe Levigua ojapyhy ikuñáme ha oguenohẽ okápe, ha umi kuimba’e reko vai oiporu ichupe pe pyhare pukukue ko’ẽmbambota peve, ha opoi ichugui hikuái ko’ẽtĩ jave.
26Ko’ẽmba vove, pe kuña ou ha ho’a pe kuimba’e tuja róga renondépe, oĩháme iména, ha opyta pe okẽ renondépe ko’ẽmba peve.
27Ha pyhareve iména opu’ã ha oipe’ávo pe óga rokẽ osẽvo oho hag̃uáicha hape rehe; péina ápe ikuña ojepyso pe óga rokẽ rovái, ipokuéra ojepyso pe okẽ pyenda ári.
28Ha’e he’i ichupe: Epu’ã ha jaha; ha pe kuña nombohovaivéima ichupe. Upémaramo pe kuimba’e omopu’ã ichupe, ohupi ibúrro ári, ha oho hikuái hógape.
29Ha og̃uahẽvo hógape ojapyhy peteĩ kyse, ha oipehe’ã hembireko retekue 12 hendápe, ha oguerahauka Israel retã tuichakue javeve.
30Ha mayma ohecháva guive upéva, he’i: Araka’eve ndojejapói ha ndojehechái ko’ã mba’e Israel ñemoñarenguéra apytépe osẽha ára guive Egípto retãgui ko ára kóva peve. Pehecha porãke ko’ã mba’e, ha peikuaáke pejapova’erã ha pembohovái chéve.
Who We AreWhat We EelieveWhat We Do
2025 by iamachristian.org,Inc All rights reserved.
