Isaías 40 - Biblia en Guaraní - ?anderuete ?e’? Por? 2015

Ñanderuete omoangapyhy Siónpe

1Pemoangapyhy, pembopy’aguapy che retãme, he’i Ñanderuete.

2Peñe’ẽ Jerusalen py’apýpe ha sapukaipópe peje ichupe og̃uahẽma pe ára ijehasa asy opamaha ha hembiapo vaikue oñemyengoviapamaha ohupity haguére jehavira jo’a Ñanderuetégui, opaite hembiapo vai ojapova’ekue rehe.

3Ha oĩ peteĩ oñe’ẽ hatãva desiértope ha he’i peẽme: Pembosako’i peteĩ tape Ñanderuetépe g̃uarã ha pembojojáke pe tape Ñanderuetépe g̃uarã desiértope.

4Umi yvy opytáva cerrokuéra pa’ũme toñemboyvate, ha toñembokarape umi cérro ha yvy pu’ã; ha umi ikarẽva toñemokarẽ’o, ha umi yvy oñembojoja’ỹva toñembojoja.

5Upéramo Ñanderuete ohechaukáta heko jajaipa, opaite yvyariguakuéra ohecha hag̃ua; Ñanderuete juru he’iva’ekue voi opa ko’ã mba’e.

6Peteĩ oñe’ẽva he’i chéve: Emombe’u. Ha che ha’ékuri: Mba’e piko amombe’úta. Ere: Mayma yvyarigua oiko ku kapi’ícha ha iporãngue ku yvoty ñu meguáichante.

7Pe kapi’i ipirúta, ha pe yvoty havirúta, Ñanderuete yvytu oipejúgui ichupe; añetehápe umi tetãygua kapi’imínte voi.

8Pe kapi’i ipiru, ha pe yvoty haviru, Ñanderuete ñe’ẽ katu oikóta opaite árape g̃uarã.

9Nde Sion ejupi cérro ru’ãme emombe’u hag̃ua vy’aguasu, Nde Jerusalen hatã emyasãi vy’aguasu. Esapukái, ani rekyhyjétei; ere ambue Juda pegua tavakuérape: Pehechataha pende Járape.

10Pema’ẽ porãke, Ñanderuete, pe jaraitéva oúta ipu’aka reheve, ijyvápe ombopoguypáta, pema’ẽ porãke hendive ou yvyarigua rembiapo repyrã ha hetãyguakuéra oguata henonderãme, Ha’e omyengoviáta hembiapokue oĩ haichaite.

11Ku ovecha rerekua oñangareko háicha hymba aty rehe; ijyva ári ogueraháta umi ovechara’y, ha ipyti’akuápe oñongatu ichupekuéra, mborayhupópe oñangarekóta umi imembyramóva rehe.

Israel Jára naimbojojái

12Máva piko oha’ãra’e umi yeta ipo pytépe ha umi yvága ipo tuichakuépe, mávapa oha’ãkuaa yvy timbo térã ibalánzape umi cérro pohyikue.

13Máva piko omboguata Ñanderuete Pytu Porãitépe, térãpa ohekombo’éra’e ichupe.

14Mávapa ohekombo’e ichupe arandupópe ha mávapa ombo’éra’e ichupe pe justícia rapére, térã ombo’éra’e ichupe kuaapy arandúre, térã ohechaukára’e ichupe akãguapy rape.

15Peikuaa porãke, umi tetã ichupe g̃uarã ku ýicha otykýva kambuchígui, ha ku yvy timbóicha opytáva balánza rehe; péina ápe umi ísla oĩva yguasúpe ojogua ichupe g̃uarã peteĩ yvyku’i ra’ỹimíme.

16Pe Líbano ka’aguýpe jepeve ndahetamo’ãi jepe’a hatápe g̃uarã, ha imymbakuéra heta ramojepe imbovyetéta ikuave’ẽmbyrãme g̃uarã.

17Opaite tetãnguéra ku mba’evetérõ guáicha ichupe g̃uarã; Ha’e ohecha umía mba’evete ramo.

18Máva ndivépa pembojojase Ñanderuetépe, térã mba’eichagua ta’ãngápa pejapose ichupe g̃uarã.

19Kuimba’e ikatupyrýva ojapokuaa ijára gua’u ra’ãnga ha pe ombohykukuaáva óro oipyso hese óro ha omoĩ hese peteĩ cadena’i óro morotĩguiguáva.

20Imboriahúva ikatu oiporavo, ijára gua’u ramo, peteĩ yvyra ikupi’i’ỹva rehegua; ha upéi ojeporeka peteĩ ikatupyrýva, ojapokuaáva ichupe g̃uarã peteĩ ta’ãnga yvyraguigua oku’e’ỹva.

21Ndapeikuaái ha napehendúi piko mba’éichapa oñepyrũmbára’e. Noñemombe’úi piko peẽme mba’éichapa ojejapo ypyva’ekue ko yvy kóva.

22Ñanderuete oguapyhína ko yvy tuichakue ári, ichupe g̃uarã yvyariguakuéra ojogua tukúpe, Ha’e oipyso umi yvága ku aosãingóicha, Ha’e omyasãi umía ku óga aoguiguáicha ojeiko hag̃ua iguýpe.

23Ha’e oheja mba’eve ramo umi karaiguasu ha umi tetã sãmbyhyhárape mba’e ogue reíva ramo.

24Umía ojogua yvyra ra’ýpe oñeñotỹramóva, térã yvyra pyahúpe hapo okakuaa’ỹváicha yvy guýpe, Ha’e oipeju ramo hesekuéra pya’e ipirúta ha pe yvytu’atã oguerahapa ku yvyra rogue pirukuéicha.

25Ha máva ndivépa peẽ chembojojase, añembojoja hag̃ua hese, he’i pe Heko jajaipáva.

26Pejesaupi ha pema’ẽ porãke mbyja atykuéra rehe. Máva piko ojapopa umía, Ha’e voi omboguatapa umíape, Ha’e ohenói umíape héra rupi, ha ndaipóri peteĩnte jepe ou’ỹva Ha’e ohenói guive, peichaite tuicha ipu’aka.

27Mba’érehepa nde Jacóbo ere, ha mba’érehepa nde Israel reñe’ẽ: Che rape okañyha Ñanderuete renondégui, ha che Jára noma’ẽiha che reko hekoite pegua rehe.

28Ndereikuaái ha nerehendúi piko Ñanderuete, yvága atykuéra Jára ningo tapia g̃uarã voi. Ha’e oikohína, Ha’e ojapo ypyva’ekue ko yvy ijapýra paha peve. Ndaipy’akangýi, naikane’õi ha ndaipóri avave ohupitýva ikuaapy arandu.

29Ha’e omombarete ikane’õvape ha omokyre’ỹ avei ikangypávape.

30Umi mitã ikane’õ, umi mitãrusu ikangypa ha ho’apávape.

31Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.