Amos 7 - Biblia en Guaraní - ?anderuete ?e’? Por? 2015

Ñanderuete noha’ãrõsevéi Israel oñemoambue hag̃ua, upévare omboúta 5 jehavira tuku rupi

1Koichagua mba’e Ñanderuete, pe Jaraitéva, ohechauka chéve: Peikuaa porãke, oñekytĩ rire pe kapi’i tetã ruvichápe g̃uarã ha hoky jevývo, Ñanderuete ombou tuku atyguasu,

2umía og̃uahẽ ha ho’upa rire pe kapi’i yvy apére, che ha’e ichupe: Che Ruete, che Jára, eperdonamína, mba’éicha piko Jacóbo oikovéta imichĩetereíma ramo.

3Ha Ñanderuete oñembyasy jevy ha he’i: Ndojehumo’ãvéima.

Jehavira tata rupi

4Ñanderuete koichagua mba’e ohechauka chéve: Peikuaa porãke, Ñanderuete, pe Jaraitéva, penembojovake hag̃ua ohenóita tata, ha pe tata ombohypáta pe yguasu ha ho’upáta avei pende kokue.

5Ha che ha’e ichupe: Che Ruete, ejejoko ko’ág̃a, mba’éichapa Jacóbo oikovéta imichĩetereíma ramo.

6Ha Ñanderuete oñembyasy ha he’i: Ko’ã mba’e ndojehumo’ãvéima.

7Ha Ñanderuete ohechauka chéve koichagua mba’e: Péina ápe, Ñanderuete oñembo’y peteĩ korapyjere yvate ikarẽ’ỹva ári ha ipópe oĩ peteĩ plomáda, umi óga mopu’ãhára oiporu háicha.

8Ha upévo Ñanderuete he’i chéve: Amos, mba’épa rehecha. Ha che ha’e: Peteĩ plomáda, umi óga mopu’ãhára oiporúva. Ha Ñanderuete he’i chéve: Péina ápe, Che amoĩ ko plomáda che retã Israel reko rehe ha naperdonamo’ãvéima ichupekuéra mba’evépe.

9Umi yvy yvate Isaac ñemoñare oiporúva (omomba’eguasu hag̃ua ambue járape), ambyaipáta, ha umi Israel yvy omomba’eguasuhápe ambue járape ambotaperepáta, ha kyse pukúpe añemoĩta Jeroboam rogayguakuéra rehe.

Amos ha Amasías

10Upéi pe pa’i Amasías, Betel pegua, he’iuka Jeroboam, Israel retã ruvichápe: Amos opu’ã nderehe Israel retãygua apytépe, pe tetã ndaipu’akamo’ãvéi iñe’ẽ rehe.

11Péicha ningo Amos he’i: Jeroboam omanóta kyse puku rupi, ha Israelguakuérape ojegueraháta ambue tetãme tembiguaikuéra ramo.

12Ha Amasías he’i Amóspe: Proféta, tereho, ekañy Juda retãme, ha upépe he’u ne pan, ha upépe eprofetiza,

13ha anive reprofetiza Betélpe, péva ningo tetã ruvicha marangatu rendágui, ha hogaguasu oĩ ipype avei.

14Upéramo Amos ombohovái ha he’i Amasíaspe: Che ndaha’éi proféta ha ndaha’éi avei proféta remimbo’ekue, che peteĩ tymba rerekuánte, ha añotỹ hígo matakuéra.

15Ñanderuete katu cherenói che rymba apytégui ha he’i chéve: Tereho ha eprofetiza che retã Israel rehe.

16Ha ág̃a, ehendu Ñanderuete ñe’ẽ. Nde ningo ere: Ani reprofetiza Israel rehe, ha ani reñe’ẽ Isaac róga rehe.

17Upévare Ñanderuete he’iuka ndéve: Ne rembirekógui oikóta kuña reko vai ko tavapýpe, ha nde ra’y ha nde rajykuéra kyse pukúpe ho’apáta, ha nde yvy rehe oñemboja’opáta po’a jeporavo rupi, ha nde remanóta tetã mombyrýpe, ha Israel ojegueraháta ñeñapytĩháme ambue tetãme.