Job 31 - Biblia en Guaraní - ?anderuete ?e’? Por? 2015

Job he’i jevy heko iporãha

1Che añemoĩ peteĩ ñe’ẽme che resakuéra ndive, ani hag̃ua ama’ẽ kuñataĩ rehe aiko hag̃ua hendive.

2Mba’e piko che ahupity pévare Ñanderuetégui ha mba’eichagua mba’e piko upévare pe Ipu’akapáva ome’ẽ chéve.

3Noñehundimo’ãi piko umi iñañáva ha ndohupitymo’ãi piko po’a’ỹ umi hembiapo vaíva.

4Ñanderuete ndohecháipa che rapekuéra, ha ndoipapái piko che guatakuérakue.

5Aiko rire japu reheve ha che py ipya’e rire oporombotavy hag̃ua,

6upéramo Ñanderuete tachera’ã pe balánza justícia reheguápe, ha oikuaava’erãmo’ã che reko ipotĩha.

7Che asẽ rire hapégui, ha che py’apy oho rire che resa rapykuéri, ha oimeraẽva tembiapo vai oja rire che póre,

8upéramo tañemitỹ ambue katu tomondoro che ñemitỹngue ha to’upa.

9Che py’apy oñembotavy rire kuñáre ha oime rire aha’ãrõ che rapicha rokẽme aiko hag̃ua hembireko ndive,

10upéicharõ che rembireko toñembiso che trígo ambuépe g̃uarã, ha oimeraẽva toiko hendive.

11Ko’ã mba’e ivai ha iky’aitereígui, upéramo pe mbojovakehára chehaviramanteva’erã.

12Ha pe tata chembokusuguéta añaretãme ha opaite mba’e aguerekóva reheve.

13Ambotavy rire che rembiguái kuimba’e térã kuñáme, térã aiporu vai rire che pu’aka hendivekuéra,

14mba’épa ajapóta aipórõ che Ruete oñemoĩrõ cherehe, térã Ha’e chembojovake ramo, mba’épa ambohováita ichupe.

15Ha’e voi cheapova’ekue che sy ryépe, ndojapóipa Ha’e avei ichupekuéra, opavave ñande ningo hembiapokue meme voi.

16Araka’eve namosẽi mboriahukuérape, aipytyvõ uvei ichupekuéra, araka’eve ndahejái tembi’u’ỹre umi imenave’ỹvape ohasa asy jave.

17Ha’u jave che rembi’u, chendive okaru avei ityre’ỹva.

18Che mitãrusu guive aiko ityre’ỹvape g̃uarã itúvarõ guáicha, ha anace guive aipytyvõ ichupekuéra.

19Ahecha ramo ijopívovape, amonde ichupe ha imboriahúvape ame’ẽ peteĩ ahoja,

20upévare ha’ekuéra cherovasa, ovy’a hikuái oñembyakukuaa haguére che ovecha raguekuégui.

21Amopu’ã rire che po ityre’ỹvare pe táva rokẽme, oikohápe pe ñembojovake,

22upéicharõ che ati’y tojehekýi che atukupégui ha toñemondoro che jyva che retégui,

23che katu akyhyje Ñanderuete jehavirágui, ha ipu’akaguasu rehe ndachepu’akamo’ãi.

24Ha ajerovia rire che óro rehe térã ha’e rire che órope: Nde ningo ha’e che jeroviaha,

25térã avy’a rire che mba’erepy oñembohetáre ha che po ombyaty haguére heta mba’eporã,

26térã ajerovia rire kuarahy ojajáiva rehe térã ama’ẽ rire pe jasy omimbi porãva rehe,

27amomba’eguasu hag̃ua ichupekuéra ñemiháme che py’apýpe,

28upeicharire Ñanderuete chembojovakeva’erãmo’ã, ambotove haguére Ñanderuete pu’aka.

29Ndavy’ái ohasa asy ramo cherehe ija’e’ỹva ha ndachepy’arorýi ojehúvo mba’evai ichupekuéra,

30che kũ jepe ajoko ani hag̃ua omaldeci ichupe ohundi hag̃ua hekove.

31Ha umi cheanduva’ekue he’i voi: Hógape oimeraẽva oñemohyg̃uatã porã hymba ro’ógui.

32Umi mombyrýgui oúva ndohasái pe pyhare okápe, che katu aipe’a che róga rokẽ opaite ohasávape g̃uarã.

33Nañomíri yvyariguáicha che jejayverekue ha nañongatúi che py’apýpe che rembiapo vai.

34Akyhyjégui umi atyguasúgui oikóva tavaguasúpe ha yvyariguakuéra cheapo’i ramo g̃uarã, akirirĩ ha ndahaséi hendapekuéra.

35Mba’eichatamora’e oĩ peteĩnte jepe cherendúva, aha’ãrõ katu pe Ipu’akapáva toñe’ẽ ha tohai opaite che rembiapokue peteĩ kuatiañe’ẽme,

36che agueraha hag̃ua che ati’ýre, térã amoĩ hag̃ua che akã jeguaka ramo.

37Che rembiapokue amombe’upáta ichupe ha mburuvicha ra’ýicha añembojáta hendápe.

38Che yvy oñe’ẽvai rire cherehe ha ojahe’o rire mayma yvy che ambovoukava’ekue,

39térã ha’u rire parral rykuere ahepyme’ẽ’ỹre umi omono’õvape, térã ajopy rire ijarakuérape,

40térã chejapu rire ha namombe’úi rire pe añetegua pene renondépe, upéicharõ che kokuépe taheñói ñana trígo rendaguépe, ha ñuatĩcebáda rendaguépe. Ápe opa Job ñe’ẽ.