Josue 11 - Biblia en Guaraní - ?anderuete ?e’? Por? 2015

Josue ohundi Jabínpe

1Ohendúvo ko’ã mba’e Jabin, Hazor ruvicha, omondo peteĩ marandu Jobab, Madon ruvichápe, Simron ruvichápe ha Acsaf ruvichápe,

2ha umi ambue tetã ruvichápe oikóva umi cérro rupi ha Arabápe, Cineret yvýpe, umi ñu rupiguápe, ha umi Dor yvýpe kuarahyreike gotýo,

3ha Canaangua oikóva guive kuarahyresẽ ha kuarahyreike gotýo, Amorgua, Hetgua, Ferezgua, Jebusgua cérro rupi, ha Hevgua oikóva cérro Hermon ypýpe, Mizpa yvýpe,

4oñembyaty hag̃ua hendive opaite isoldádo aty ndive. Ha oñembyatypa rire hetaiterei ku yvyku’i oĩ háicha yguasu rembe’ýpe, oĩ avei heta kavaju ha cárro ñorãirõ megua.

5Ko’ã tetã ruvicha oñembyatypa, Merom ykua ypýpe, oñorãirõ hag̃ua hikuái Israel ndive.

6Ha Ñanderuete he’i Josuépe: Ani rekyhyjétei ichuguikuéra, ko’ẽrõ ko hórape Che ajukapaitéta ichupekuéra ne renondépe; upéi emokarẽ ikavaju retymakuéra ha ehapy icarrokuéra.

7Ha Josue ha mayma isoldádo aty ndive ojeity sapy’a hi’arikuéra Merom ykuápe oha’ãrõ’ỹ hágui umi hesekuéra ija’e’ỹva rehe.

8Ha Ñanderuete omoĩ ichupekuéra Israel pópe, ohundipa hag̃ua, ha omuña ichupekuéra Sidon tavaguasu guive ha Misrefotmaim peve, ha Mizpa ñu meve kuarahyresẽ gotýo, ojuka jukahápe ichupekuéra oheja’ỹre ichuguikuéra ni peteĩme jepe.

9Ha Josue ojapo hesekuéra Ñanderuete he’i haguéicha, omokarẽ ikavajukuérape ha ohapypa icarrokuéra.

10Upégui Josue ojere ha omoĩ ipoguýpe Hazor, ha ojuka kyse pukúpe imburuvichápe; Hazor omoakãva’ekue ymave opaite ko’ã tavakuérape.

11Ha kyse pukúpe ojuka hikuái opaite hetãyguakuérape, oikóva guive ipype, ohundipaite peve opyta’ỹre avave ipytuhẽva, ha upéi omboja tata Hazor rehe.

12Peichaite Josue omoĩmba avei ipoguýpe umi ambue táva ha umi tetã ruvichápe ha ojukapa kyse puku rãimbépe, Moises, Ñanderuete rembiguái, he’i haguéicha ichupe.

13Ha umi táva oĩva guive cérro karape ári ndohapýi, Hazórnte ohapy hikuái.

14Ha Israelguakuéra ogueraha opaite hese ija’e’ỹva mba’erepy ha hymbakuérape; hetãyguakuérape katu ojuka kyse puku rãimbépe ohundipa peve, oheja’ỹre avavépe.

15Ñanderuete he’i haguéicha hembiguái Moiséspe, péicha Moises he’i jevy Josuépe; ha upéicha Josue ojapo avei, omboyke’ỹre Ñanderuete ñe’ẽ Ha’e he’iva’ekue guive Moiséspe.

Josue oñemomba’e opaite umi yvy rehe

16Josue omoĩmbaite ipoguýpe umi yvy, umi cérro, pe Négev, Gosen yvy tuichakue, umi yvype (ñunguéra) Jordan peve, umi cérro ha umi ñu oĩva Israélpe,

17Halac cérro guive, ojupíva Seir gotýo, Baalgad peve, oĩva Líbano ñúme, Hermon cérro guýpe; oapresa avei mayma hetã ruvichakuérape, ha ojukapa ichupekuéra.

18Heta ára pukukue Josue oiko ñorãirõme ko’ã tetã ruvicha ko’ãva ndive.

19Ndaipóri peteĩ táva oikéva jekupytýpe Israel ñemoñarenguéra ndive, umi Hevgua oikova’ekue Gabaonpemante; opaite ambue tavakuéra Israelguakuéra ohundipa.

20Ko’ã mba’e ou Ñanderuetégui, Ha’e voi ombopy’a hatãgui ichupekuéra oñemoĩ hag̃ua Israel rehe oñehundi hag̃ua ñorãirõme. Israelguakuéra ndoiporiahuverekói ichupekuéra, ohapomondoro uvei ichupekuéra, Ñanderuete he’i haguéicha Moiséspe.

21Umi ára umívape Josue ojapo avei sarambiguasu umi Anacguakuéra apytépe, oikóva Hebron, Debir, Anab, mayma Juda ha Israel cérro rupi; Josue ohundi ichupekuéra ha itavakuéra avei.

22Umi Anacgua nahembyvéi peve Israel ñemoñarenguéra yvýpe; Gáza, Gat ha Asdodpemante hemby mbovymi.

23Josue omoĩmbaite pe yvy ipoguýpe, Ñanderuete he’i hagueichaite Moiséspe; ha Josue omboja’o Canaan yvy Israel tribukuéra pa’ũme, imba’etee ramo; ha pe yvy opytu’u ñorãirõgui.