1Filisteayguakuéra oñembyaty isoldádo atykuéra reheve Afécpe, ha Israel oñembyaty Jisreélpe, pe ykua ypýpe.
2Ha umi Filisteaygua ruvicha oñembyaty ijaty atýpe, oĩháme 100 térã 1000 soldádo, David ha iñirũnguéra oho Aquis rapykuéri.
3Ha umi Filisteaygua ruvicha he’i: Mba’éiko ojapo ko’ápe ko’ã Israelgua. Ha Aquis he’i Filisteaygua ruvichakuérape: Kóva David, Saul, Israel retã ruvicha rembiguái, chendive oikóma heta ára ha heta áño pukukuéma, ha ndajohúi mba’eveichagua jejavy hekovépe oĩ guive chendive ko ára kóva peve.
4Upéramo Filisteaygua ruvichakuéra ipochy joa hendive ha he’i ichupe: Emondo ko kuimba’e kóvape, ha toho jevy mamo remoĩ haguépe, ha anítei ou orendive ñorãirõme, anítei ágã opu’ã ñanderehe: Mba’épa ikatu omoĩ porãve jevy ichupe ijára ndive ogueru ramo hendápe ñane akãnguéra.
5Ndaha’éi piko kóva pe David jerokyhápe ojegueropuraheiva’ekue: Saul ojuka 1000-pe, David katu 10000-pe.
6Ha Aquis ohenói Davídpe ha he’i ichupe: Ñandejára rekovére, nde reiko porã che renondépe. Ahecha mba’éichapa reike ha resẽ che soldádo atýpe, ha ndajohúi ndepype mba’eveichagua ivaíva reju guive chendive ko ára kóva peve; ko’ã mburuvicha resápe katu nde ndere’a porãira’e.
7Upévare ejevy ha tereho py’aguapypópe, ani hag̃ua remoñeko’õi Filisteaygua ruvichakuérape.
8Ha David he’i jevy Aquíspe: Mba’éiko che ajapo. Mba’éiko rejohu ne rembiguái rehe aĩ guive nendive ko ára kóva peve, ani hag̃ua aha ajeity hag̃ua avei umi oñemoĩva ári che jára rehe.
9Ha Aquis he’i Davídpe: Che aikuaa porã nde reko porãha che resa renondépe, Ñandejára remimboúicha, Filisteaygua ruvichakuéra katu he’i chéve: Aníke ha’e ou orendive ñorãirõme.
10Epu’ã pyhareve, nde ha ne irũnguéra nendive oĩva, ha tapeho pyharevete voi.
11Ha David opu’ã pyhareve iñirũnguéra ndive ojevy hag̃ua Filisteaygua retãme; ha Filisteayguakuéra katu oho Jisreélpe.
Who We AreWhat We EelieveWhat We Do
2025 by iamachristian.org,Inc All rights reserved.
