1Ko profecía oñeme’ẽva’ekue pe proféta Habacúcpe.
2Araka’e pevépa, Nde, ore Ruete, che rohenói asýta ha nacherendumo’ãi, asapukái hatã ndéve ajejopy vaietégui ha Nde nachepytyvõi.
3Mba’érehe piko rehechauka chéve ko ñaña reko ha hembiapo vaikuéra. Ñehundi ha ñemonda oĩ che renondépe, ñeko’õi ha ñorãirõ opu’ãve ohóvo.
4Upévarupi ndojeporuvéi ne rembiapoukapykuéra ha opyrũ hikuái hesekuéra, umi iñañáva ojopyve ohóvo heko potĩvape, ha omboyke hikuái pe justícia añeteguáva.
Umi Caldeaygua ohavira Juda retãme5Pema’ẽ umi tetã rehe, ha penepy’andýita, Che ajapótagui peteĩ tembiapo tuichaitéva pende árape, ha oñemombe’u ramojepe peẽme ndapegueroviamo’ãi.
6Peikuaa porãke, Che voi amopu’ã umi Caldeayguápe, tetã iñarõséva ha ojejokokuaa’ỹva, ha oguatáva ko yvy apére oñemomba’e hag̃ua ambue yvy rehe, ndaha’éiva imba’e.
7Iñañaite ningo hikuái ha oporomongyhyjéva, ha’ekuéra omoambue pe justícia ha’ekuéra oipota háicha, ha’ekuéra voi oiko mbojovakehára ramo.
8Ikavajukuéra iñakuãve jaguaretégui, ha oñorãirõkuaave aguaraguasu ñúme oikóvagui, ha umi ikavaju arigua oñemboheta hetavéta, mombyrýgui oúta ha ojeitýta hikuái hese ija’e’ỹva ári ku ñapykani ojeity háicha hembi’urãre.
9Ombopoguy hag̃uánte ou hikuái omyasãivo opárupi kyhyjeguasu ha yvyku’ícha ombyaty hikuái hembiguairã.
10Tetã ruvicha ha mburuvichakuéra rehe oñembohorýnte ha opuka opaichagua táva oñemongora porãva rehe, itáva tápia renonderãme ombyaty yvy ohasa hag̃ua hi’ári, ombopoguy peve pe táva.
11Upéi oho jevýta ku yvytu ratãicha, ha’ekuéra ojerovia ipu’aka rehénte.
Habacuc oporandu Ñanderuetépe, mba’érehepa Ha’e oheja ou ko’ã mba’evaiete hetã ári12Nandéi piko ijypyete guive che Ruete, che Jára heko porãva. Noromanombaichéne, Nde orehavira hag̃uánte rembou ichupekuéra, ha Nde, ore Salvador remoĩkuri ichupekuéra orenupã hag̃uánte.
13Ipotĩeterei ningo nde resa rehecha hag̃ua pe mba’evai, ha ndaikatúi rehecha pe jejopy vai. Mba’érehe piko reheja upéramo umi iñañáva ohundi umi heko potĩvape.
14Upéicharamo Nde repoíta tetãyguakuéragui ha oikóta hikuái mburuvichaguasu’ỹre ku mbói ha pira yguasu peguáicha.
15Pindápe Caldeayguakuéra oguenohẽmbáta ichupekuéra, ired ombyatýta ichupekuéra, ha ombyaty heta ramo iredguasúpe ovy’a ha horýta hikuái.
16Upévare oikuave’ẽ hikuái irédpe g̃uarã, ha ohapy hyakuã asýva ired inimbópe g̃uarã. Umíva rupi oguenohẽ hag̃ua heta hembi’urã ikyráva.
17Ha upévaguinte piko tapia g̃uarã omonandíne iredkuéra ohundive hag̃ua tetãnguérape jeporiahuvereko’ỹre.
Who We AreWhat We EelieveWhat We Do
2025 by iamachristian.org,Inc All rights reserved.
