2 Corintoyguakuérape 7 - Biblia en Guaraní - ?anderuete ?e’? Por? 2015

1Upévare che rayhupára, jaguerekógui koichagua promésa ñañemopotĩ opaichagua mba’evaígui omongy’áva ñande ro’o (rete) ha ñande pytu porã, ñañemboheko potĩve jahávo uvei Ñanderuetégui kyhyjepópe.

2Peme’ẽke oréve ore rendag̃ua pende py’apýpe. Ore noromomarãi avavépe, ore norombyaíri ni norombotavýi avavépe.

3Che nda’éi ko’ã mba’e pomoĩ vai hag̃ua, ha’éma ningo peẽ peikoha ore py’apýpe, ñamano hag̃ua oñondive térã jaikove hag̃ua oñondive.

4Che añe’ẽ sakãite penendive ha poguerohoryete avei. Cherenyhẽ angapyhýgui, ha cheroryeterei avei ahasa asy ramojepe.

5Roju guive Macedóniape ore rete ndaikatúi opytu’u opa rupiete rohupytýgui angekõi: Okáguio ñorãirõ, hyepýguio kyhyje.

6Ñanderuete katu omoangapyhy ore py’a kangýpe Títo jeju rupi.

7Ha ndaha’éi ha’e ou haguérente oremoangapyhy avei pe ñemoangapyhy peẽ peme’ẽva’ekue ichupe, ha’e omombe’u porã oréve peẽ orerecha nga’uha, penerasẽha, avei penerakate’ỹha cherehe, péicha che avy’ave apytávo penendive.

8Che pombopy’a rasy ramojepe che kuatiañe’ẽ rupi, che nañembyasyvéima ko’ág̃a. Ñepyrũme che añembyasy che pombopy’arasyva’erãgui sapy’a,

9ko’ág̃a katu avy’a, naporombopy’arasýi haguére, peẽ peñemoambue haguére uvei. Ore napomoĩ vaiséi peẽme, roipota uvei peẽ peguata porã jevy Ñanderuete rapére.

10Pe ñembyasy Ñanderuetégui oúva omoambueuka ñande reko ñandesalva hag̃ua, pe ñembyasy oúva ko yvy árigui ogueru pe ñemano.

11Pehechakuaa porãke, pe ñembyasy oúva Ñanderuetégui omoheñói heta mba’e iporãva pende apytépe: Ko’ág̃a peẽ peñeha’ã, pembojovake porãve, peẽ peñemoĩ hembiapo vaíva rehe, peẽ pekyhyje pejavy hag̃ua Ñanderuete ndive, peporohayhuve, peẽ penerakate’ỹve ha pehavira pe hembiapo vaívape.

12Ha pe kuatiañe’ẽ che ahaiva’ekue peẽme, ndahaíri hembiapo vaíva rehe, ni pe omoĩ vaiséva rehe, peẽ voi peñeha’ã peiko porã jevy hag̃ua orendive Ñanderuete renondépe.

13Upévare orepy’aguapy jevy ha rovy’aiteve rohóvo Títo pytu porã ovy’águi avei pende apytépe, peẽ pemoangapyhy haguére ichupe.

14Natĩri añe’ẽ porã haguére penderehe Títope; opaite mba’e ro’eva’ekue penderehe ningo hi’añete, upéicha ndapyta vaíri henondépe.

15Ha Títo ko’ág̃a penderayhuve, ha’e imandu’a peẽ peneñe’ẽrendu porã haguére ichupe, peñemomirĩvo henondépe kyhyje ha ryryipópe.

16Che ningo avy’aite ajerovia haguére penderehe opaite mba’épe.