Hebreoyguakuérape 8 - Biblia en Guaraní - ?anderuete ?e’? Por? 2015

Hesu Crísto, pa’iguasu ramo, omoĩ porã jevy tetãyguakuérape Ñanderuete ndive

1Pe mba’eguasuve ja’éva: Jaguereko peteĩ pa’iguasu yvagakuérape, oguapýma Ñanderuete guapyhaguasu akatúape,

2ha omba’apóva pa’i ramo pe óga jojohuhápe Ñanderuete omopu’ãva’ekue yvágape, ndaha’éiva yvyarigua rembiapo.

3Oimeraẽ pa’i ningo oñemoĩ oikuave’ẽ hag̃ua me’ẽmby ha kuave’ẽmby Ñanderuetépe g̃uarã, upévare Hesu Crísto oikotevẽ avei peteĩ kuave’ẽmby rehe.

4Ha’e oiko ramoguare ko yvy ape ári, Ha’e ndoikói pa’i ramo, oĩgui gueteri pa’i oikuave’ẽva kuave’ẽmby Moises rembiapoukapy he’i háicha.

5Ko’ã pa’ikuéra oikuave’ẽ kuave’ẽmbynguéra ojehechauka haguéicha ichupekuéra ta’ãnga rupi, ouva’ekue yvágagui; Ñanderuete voi he’iva’ekue Moiséspe, ha’e ojapo ramoguare pe óga jojohuha: Ema’ẽ porãke, ejapopa hekoitépe ojehechauka haguéicha ndéve ta’ãnga rupi pe cérro ári, (Éxodo 25,40).

6Ko’ág̃a katu oñeme’ẽma ñandéve Hesu Crístope, peteĩ pa’i reko iporãvéva gueteri umi ambue pa’ikuéra rekokuégui; hendive oñepyrũgui (peteĩ ára atyguasu pyahu), peteĩ ñembopy’apeteĩ (pácto, jekupyty) pyahu, ha Ha’erupínte ikatu oñeg̃uahẽ Ñanderuete rekohápe, yvágape: Ñanderuete oñembopy’apeteĩ jevy Hesu Crísto rupi, ha péva iporãiteve pe oĩva’ekuégui Moises arakuéra guive.

7Pe ñembopy’apeteĩ tenondeveguare oĩ porãmba rire natekotevẽiva’erãmo’ã peteĩ ipyahúva rehe.

8Ñanderuete oñemyrõ hendivekuéra he’ívo: Og̃uahẽva’erã pe ára Che ajapotaha peteĩ ñembopy’apeteĩ pyahu Israel ha Juda retã ndive.

9Ndaha’evéima ku ñembopy’apeteĩ ajapo haguéicha ijypykuéra ndive, ajapyhy ramoguare ipógui pe ára aguenohẽ ramoguare ichupekuéra Egípto retãgui; Israelguakuéra opoi haguére che ñembopy’apeteĩgui, Che nañangarekovéima avei hesekuéra, (Éxodo 19,5-6).

10Upévare Ñanderuete he’i: Pe ñembopy’apeteĩ ajapótava Israel retã ndive umi ára umíva rire péicha ningo: Che amoĩta che rembiapoukapy ipensamientokuérape ha ahaíta ipy’apýpe, ha Che apytáta Ijaratee ramo ha ha’ekuéra che retãtee ramo (Romayguakuérape 10, 4).

11Ha umi árape avave nombo’emo’ãvéi hetãyguápe ni ipehẽnguépe he’ívo: Eikuaáke Ñanderuetépe; opavave voiete chekuaáta, pe michĩvéva guive pe tuichavéva peve.

12Che aperdonáta ijejavykuéra, ha nachemandu’amo’ãi hi’angaipakuéra rehe.

13Ha’e he’i pe ñembopy’apeteĩ ipyahúva ombotuja pe ñembopy’apeteĩ tenondeveguarépe, ha oñembotujáva, itujáguima voi, opapotamahína.