Salmokuéra 78 - Biblia en Guaraní - ?anderuete ?e’? Por? 2015

Ñanderuete ohavira hetã iñe’ẽrendu’ỹvape - Asaf purahéi

1Ehendu, che retã, che rembiapoukapy, emboyke nde apysa cheñe’ẽrendu hag̃ua.

2Ñe’ẽ arandu reheve añe’ẽta, ha’éta umi mba’e oñemíva ymaite ára guive.

3Umi mba’e ñahendúmava jaikuaa porã voi, umi mba’e ñande rukuéra omombe’umava’ekue ñandéve.

4Ha nañañomimo’ãi ñande ra’ykuéragui, ñamombe’u jevyva’erã Ñanderuete rembiapoguasu ha ipu’aka ñane ñemoñarenguérape.

5Ha’e ojehechaukava’ekue Jacóbope ha ome’ẽ Israélpe hembiapoukapykuéra. Ha opaite ñande ypykuéra omombe’upa jevy ko’ã mba’e iñemoñarenguérape.

6Ikatu hag̃uáicha iñemoñarenguéra oikuaapa ha ita’yrakuéra ohendupa jevy, ha umía tomombe’upa jevy ita’yrakuérape.

7Ikatu hag̃uáicha ojerovia avei Ñanderuete rehe, ha hesarai’ỹ hag̃ua hikuái Ñanderuete rembiapokuégui, ha ojapo hag̃ua hekoitépe Ñanderuete rembiapoukapykuéra.

8Ani oiko hikuái ituvakuéraicha, peteĩ tetã oñembopy’a hatãva ha oikóva iñakã he’i háicha rei reheve, peteĩ tetã ndojeroviaséiva ha noñemoambueséiva Ñanderuete oipota háicha.

9Umi Efraingua oiporu porãkuaa ramo jepe iguyrapa oguevi ñorãirõgui.

10Opoi iñe’ẽme’ẽgui ome’ẽva’ekue Ñanderuetépe, ha ndoikoséi hikuái Ñanderuete rembiapoukapykuéra he’i háicha.

11Hesaraipa hikuái hembiapokuéragui ha umi mba’e techapyrã ohechaukava’ekuégui.

12Ituvakuéra renondépe Ñanderuete ojapova’ekue mba’e techapyrãva Egípto retãme, Zoan ñúme.

13Omboja’o pe yguasu ha ombohasa ichupekuéra ipa’ũ rupi, ojoko umi yeta peteĩ tápiaicha.

14Ára pukukuépe Ha’e omboguata ichupekuéra araípe kuarahy’ãme, ha pyharekuépe tata rendýpe.

15Ñanderuete ojoka umi itaguasu ñu perõme, ha omboy’u ichupekuéra ku y ysyry porãitépe guáicha.

16Oguenohẽ itaguasúgui y osyrýva, yvu hatã osyrývaicha.

17Ha upeichavéramo jepe ha’ekuéra oñemohembiapo vai jevy hendive, ha opu’ã jevy hikuái pe Ipu’akapáva rehe pe ñu perõme.

18Ha oipy’ara’ã hikuái Ñanderuetépe, ojerurévo tembi’u ha’ekuéra ho’usévante.

19Ha oñe’ẽvai hikuái Ñanderuete rehe, he’ívo: Ikatúnepa Ha’e ombosako’i ñandéve peteĩ mesa hi’upyrã reheve ñu perõme.

20Añete Ha’e oinupã pe itaguasu rehe osyry peve yeta ha oñuã pe yvy, ikatúnepa upéicha ome’ẽ avei pan térã oguerekónepa so’o hetãme g̃uarã.

21Ha Ñanderuete ohendúvo péva ipochy ha omyendy hata Jacóbo rehe, ha oñemoĩ Israel rehe.

22Ndogueroviaséi hikuái Ñanderuetépe, ha ndojeroviaséi avei ipytyvõrãre.

23Upéicharamo jepe Ñanderuete he’i umi arai yvateguápe oipe’a hag̃ua hokẽnguéra.

24Ha omongy hi’arikuéra mana ha’ekuéra ho’u hag̃ua, ha péicha ome’ẽ ichupekuéra pan yvága pegua.

25Ho’u hikuái yvága pegua tembi’u, Ha’e ombou ichupekuéra hembi’urã hyg̃uatã meve.

26Árare omongu’e pe yvytu kuarahy resẽguio ha ipu’aka rupi ogueru pe yvytu yvýguio oipejúva.

27Ha omongy so’o hi’arikuéra yvy timbóicha, ku yvyku’i yguasu rembe’ýpe oĩ háicha oguerúvo guyraita ynambúichagua.

28Ha oityukapa ijapytepekuéra, hóga jerekuére ho’apa joa.

29Okaru joa hikuái ha hyg̃uatãmba, Ñanderuete ome’ẽ ichupekuéra imba’e jerurekue.

30Hyg̃uatãmba mboyve katu, ha oĩ jave gueteri hembi’u ijurúpe,

31Ñanderuete ipochy hendivekuéra ha ojuka ijapyteguikuéra umi imbaretevévape, ha oity yvýre Israel karia’ykuérape omano hag̃ua.

32Ha upeichavéramo jepe oñemohembiapo vaive ohóvo, ha ndogueroviái hikuái Ñanderuete mba’e hechapyrãva (milágro).

33Upévare hi’arakuéra opa rei ku yvytu oipeju rei rõguáicha, ha hi’añokuéra ohasa hikuái kyhyjepópe.

34Ombohasa asy rire ae oheka jevy hikuái Ñanderuetépe.

35Upémaramo imandu’a porã hikuái Ñanderuete imo’ãha rehe, ha Ñanderuete, pe Jára Ijyvatetéva, oguenohẽkuaaha ichupekuéra opaichagua jejopy vaígui.

36Ijurukuéra katu ombotavy ichupe, ha ijurukuéra ijapu ohóvo.

37Ipy’a mokõi, ha ndojapopái iñe’ẽ ome’ẽmava’ekue ichupe.

38Ñanderuete katu oiporiahuvereko jevýma, ha operdona hembiapo vaikuéra ha nohundiséi ichupekuéra, Ha’e omboyke jevy jey ipochy ha ipy’aro.

39Ñanderuete imandu’a hetãyguakuéra to’onteha, oikóva ku yvytúicha, ohasa ha ndojerevéiva.

40Mboy jevýpa ha’ekuéra opu’ã hese ha omomba’e mbyasy ichupe ñu perõme (desiértope).

41Jevy jeýnte oipy’ara’ã Ñanderuetépe, ha ombopochy hikuái Israel Jára porãitépe.

42Naimandu’ái hikuái ipo mbarete rehe, oguenohẽva’ekue ichupekuéra ijejopy vaietégui.

43Ku mba’e techapyrãvaicha ojapova’ekue Egíptope térã Zoan ñúme.

44Egípto ysyry omoambue ha oiko ichugui tuguy, ani hag̃ua hoy’útei hikuái.

45Ijapytepekuéra ombou mbutueta oisu’upa hag̃ua ichupekuéra, ha avei heta ju’i ojapo hag̃ua sarambiguasu ijapytepekuéra.

46Hemitỹnguéra oñeme’ẽmba ysokarúpe, ha ikokue rembiapokue tukuetápe.

47 Iparraltykuéra ombyaipa amandáupe, ha hi’igo’a ohapypa heládape.

48Amandáu ha aratiri ojuka hymba atykuérape.

49 Hi’angelkuéra rupi Ha’e oity hi’ári ipochy, iñeko’õi, ipy’aro ha ijejopy vai.

50Opoi ipochýgui, heta katu omano mba’asy vaiete (péste) rupi.

51Ñanderuete ojuka opaite Egípto pegua ra’y tenonderépe, upéicha Cam ohundi ipu’aka tenondeguáva.

52Upégui oguenohẽ hetãme ovecháicha, ha hymba atýicha ogueraha ichupekuéra ñu perõ rupi.

53Oisãmbyhy ichupekuéra oiko porã hag̃ua, ani hag̃ua okyhyjétei hikuái, ha yguasúpe oñuãmba imuñaharenguérape.

54Ha upéi ogueru ichupekuéra ijyvy porãite rembe’ýpe, ko cérro kóvare ipo akatúape oñemomba’e hikuái hese.

55Umi tetã (oikóva ipype) omosẽ henonderãgui, upéi po’a reity rupi omboja’o ijyvy Israel tribukuérape g̃uarã imba’etee ramo ha Israelgua omopu’ã hogakuéra oiko hag̃ua ipype.

56Ha’ekuéra oipy’ara’ã katu Ñanderuetépe, pe Jára Ijyvatetévape, ombopochy hag̃ua ichupe, ha ndojapói hikuái hembipota porãite.

57Ojevy ha oñemoĩ hikuái Ñanderuete rehe ituvakuéraicha, ha oiko hikuái ku hu’y ojavývaicha.

58Ombopochy ichupe umi cérro ru’ãme oikuave’ẽvo ambue járape ha omomba’eguasúvo ta’ãngápe.

59Ha Ñanderuete ohechapávo ko’ã mba’e, oñemboyke hetã Israélgui.

60Ha Ñanderuete oñemboyke hóga jojohuhágui oĩva’ekue Sílope, Ha’e oiko haguépe hetãyguakuéra apytépe.

61Ha pe karameg̃ua mbojoaju rehegua Ha’e oheja ho’a hag̃ua ambue tetã pópe, ha upéicha heko jajaipa opyta ambue tetãme.

62Ha ojukauka hetãyguakuéra kyse pukúpe, ha ipochy Israel ndive.

63Pe tata ohapy ikaria’ykuérape, ha ikuñataĩ imara’ỹvape g̃uarã ndojepuraheivéi omenda hag̃ua.

64Ipa’ikuéra ho’apa kyse puku rupi, ha hembirekokuéra ndaikatúi ojahe’o.

65Ha upévo opáy Ñanderuete ku okévaicha, ku ipy’aguasuetéva osapukái háicha ho’u rire víno.

66Ondyry umi hese ija’e’ỹvare, oñemotĩ hag̃ua hikuái opaite árape.

67Omboyke ijehegui Jose róga, ha ndoiporavói Efrain tríbupe.

68Oiporavo katu Juda tríbupe, Sion cérrope Ha’e ohayhuvahína.

69Ha omopu’ã hogaguasu ku cérro yvatéicha, péva Ha’e omboguapy porã, ojapo haguéicha ñande yvýre.

70Oiporavo hembiguái Davídpe, ha oguenohẽ ichupe ovecha atýgui.

71Ijovecha imembývagui ogueru ichupe, oñangareko hag̃ua hetãre, Jacóbo rehe, hetãtee Israel rehe.

72David oñangareko hesekuéra py’a porãme, ha ombosako’i ichupekuéra ipo ikatupyry rupi.