Tiágo 3 - Biblia en Guaraní - ?anderuete ?e’? Por? 2015

Ñande juru rembiapo

1Anítei heta oikose mbo’ehára ramo pende apytépe; che hermanokuéra, jaikuaa porã ningo ñande ñaporombo’éva ñañembojovake pohyivetaha (ambuekuéragui).

2Opavave ñande jajavy heta mba’épe. Oime ramo peteĩ ojavy’ỹva iñe’ẽ rupi, péva ningo peteĩ kuimba’e térã kuña heko peguáva, ha oikuaa avei mba’éichapa ombopoguykuaa ijyvyarigua rete rembipota vai.

3Ñamoĩ ningo peteĩ fréno kavaju jurúpe, ha’e iñe’ẽrendu hag̃ua ñandéve, ha upéicha ñamboguata hete tuichávape ñande jaipotaha rupi.

4Pema’ẽ avei barcoguasu rehe, ituichaite, ha pe yvytu atã omyaña ramojepe pe barcoguasu, imboguatahára peteĩ ñembovaha (timon) rupi ogueraha pe barcoguasu ha’e oipotaha rupi.

5Upéicha ningo avei ñande juru, ñande rete rehegua, imichĩete ramojepe, ojapouka mba’e tuichaitéva. Pehecha mba’éichapa pe tata michĩva ohapykuaa pe ka’aguy tuichaitéva.

6Ñande juru (kũ) ningo avei peteĩ tata, pe juru ningo henyhẽ mba’evaígui, omongy’áva kuimba’e ha kuña rete, omoñepyrũvo pe tembiapo vai oñemboheta hetave ohóvo ohapy peve ñande rekove aña retãme.

7Opaichagua mymba ñarõ guive, guyrakuéra, mboikuéra, mymba yguasu pegua jepe kuimba’ekuéra ombopoguýma (oamansáma).

8Ndaipóri ningo yvyariguakuéra apytépe avave ombopoguýva ijuru, ha’e ningo peteĩ mba’e ñaña henyhẽva pohã vaígui (ponzóñagui).

9Pe juru rupi oñemomba’eguasu Ñandejára Ñanderuetépe ha juru rupi oñemaldeci avei tapichakuérape, ojejapova’ekue Ñanderuete ra’ãngáicha.

10Peteĩ jurúgui osẽ jehovasa ha maldicion. Ko’ã mba’e, che hermanokuéra, ndaupeichaiva’erã.

11Mba’eichagua yvúgui piko ochororokuaa y he’ẽ ha iróva oñondive.

12Ikatu piko, che hermanokuéra, peteĩ hígo yvyra hi’a olívo, térãpa pe parral máta hi’a hígo. Upéicha peteĩ yvúgui ndaikatúi ochororo y he’ẽva ha iróva oñondive.

Arandu añeteguáva

13Mávapa iñarandu ha iñakãguapy pende apytépe tohechauka heko porã rupi ha’e iñaranduha ha oguata porãha Ñanderuete rape rehe.

14Peẽ pendepy’arasy (peenvidia) ramo katuete oĩ ñorãirõ pende py’apýpe, anítei peñembotuicha ha anítei pendejapu pe añetegua rehe.

15Koichagua arandu ndoúi Ñanderuetégui; ko arandu kóva yvy peguánte uvei, ou yvyarigua ángagui ha añágui.

16Oĩháme py’arasy (envídia) ha ñembotuicha, upépe oĩ avei sarambi ha opaichagua tembiapo vai.

17Pe arandu oúva Ñanderuetégui katu omboheko potĩ ha upéi ome’ẽ py’aguapy ha py’aporã, iñe’ẽrendu, oporoporiahuverekokuaa, hi’a yva Pytu Porãmba reheguáva (Galaciayguakuérape 5,22), avavépe nombojuavýi, ndahova mokõiri.

18Ha umi oñeha’ãva ojeiko porã hag̃ua, toñotỹ py’aguapy omono’õ hag̃ua justícia (heko peguáva).