Romayguakuérape 9 - Biblia en Guaraní - ?anderuete ?e’? Por? 2015

Ñanderuete oiporavo Israel retãme

1Hesu Crísto rérape, che ha’éma pe añetegua, ndachejapúi, ha che py’apyñe’ẽ oĩva Pytu Porãmbáva poguýpe omoañete che ha’étava:

2Che añembyasyeterei ha che ajepy’apyeterei hasyete peve chéve che py’apy (ñe’ã).

3Hi’ãnte chéve chete ha’a maldicion poguýpe ha ajei Hesu Crístogui, upévarupi aipytyvõ che ryvykuéra Israelguakuérape.

4Ñanderuete voi ningo oiporavova’ekue ichupekuéra hetãtee ramo, ita’yrakuéraicha, ohechaukáma ichupekuéra heko jajaipa, ome’ẽ ichupekuéra heta promésa ha ikuatiañe’ẽ, ome’ẽ ichupekuéra Moises rupi hembiapoukapykuéra ha ohechauka ichupekuéra mba’éichapa icúltope omomba’eguasuva’erã Ijapoharépe, ome’ẽ avei ichupekuéra heta profecía.

5Abraham, Isaac ha Jacóbo ningo ijypykuéra voi, ha Hesu Crísto onacéma hetépe ko’ã tetãyguakuéra apytépe. Upévare toñembotuicha ha toñemomba’eguasu Ñandejárape ára atyguasukuéra rupi, amen (taupéicha).

6Ñande ndaikatúi ja’e Ñanderuete ñe’ẽ ndoikói hague. Ndaopavavéi Israel ñemoñare, Israel añeteguáva.

7Ha ndaopavavéi Abraham ñemoñare, ni Abraham ra’y añeteguáva. Ñanderuete ningo he’i Abraham ha Sárape: Isaac rupímante pe ta’yratee Che aiporavomava’ekue, (Génesis 21,12).

8Ambue Abraham ra’y (Ismael) Ñanderuete ndohechakuaái Abraham ra’yteéva ramo, onacégui Abraham ha Sára rembipota rupínte.

9Pe promésa Ñanderuete ome’ẽmava’ekue ikuatiañe’ẽme he’i voi: Ko’ã arakuéra rupi aju jevýta, ha Sára imembýta peteĩ mitãkuimba’e, (Génesis 18,10; ha Génesis 18,14).

10Ha upéicha ojehu avei Rebéca ndive, ha’e hyeguasu ñande ru Isaácgui.

11Ha Rebéca imemby mboyve imembykõi, ha umi mitã ojapo mboyve mba’eporã ni mba’evai Ñanderuete he’i Rebécape, (Génesis 25,23):

12Pe tenondegua oikóta pe imitãvéva rembiguái ramo. Ñanderuete ndoiporavói Jacóbope hembiapo porã haguére, oiporavo katu ichupe, Ha’e upéicha oipotágui (Génesis 25,23),

13ha Ñanderuete kuatiañe’ẽme he’i avei: Jacóbope ahayhu, Esaúpe katu amboyke, ndahayhúigui ichupe (Malaquías 1,2-3).

Ñanderuete oiporavo umívape Ha’e oipota háicha

14Mba’épa ja’éta pévare, ndahekojojái (ndaijústoi) piko ñande Apohare. Mba’evéicharõ.

15Ñanderuete he’i voi Moiséspe: Che aiporiahuverekóta Che aiporiahuverekosévape ha chepy’aporãta chepy’aporãséva ndive (Éxodo 33,19).

16Upéicharamo ndaijái upe oipotávape jepe ni oñeha’ãmbávape, ijánte Ñanderuete oporoporiahuverekóvape.

17Ñanderuete he’iva’ekue faraónpe ikuatiañe’ẽme: Che romoĩva’ekue Egípto retã ruvicha ramo ahechauka hag̃ua nde rekovépe che pu’aka, ha oñemoherakuã hag̃ua che réra opaite tetãnguérape (Éxodo 9,16).

18Upéicha ningo Ñanderuete oiporiahuverekosévape Ha’e oiporiahuvereko, ha ombopy’a hatãsévape Ha’e ombopy’a hatã.

19Nde erekuaa chéve mba’érehepa upéicharamo Ñanderuete ipochy gueteri, avave ningo ndaikatúi oñemoĩ hembipota rehe.

20Ha nde kuimba’e térã nde kuña, máva piko nde rembojovake hag̃ua Ñanderuete rembiapokue. He’i piko upe mba’e apopyre ijapoharépe: Mba’érehe che piko cheapo peichaite.

21Pe ñay’ũre (tujúre) omba’apóva ikatu ojapo iñay’ũgui pe ha’e ojapose háicha; ojapokuaa peteĩ ñay’ũ pehẽnguégui peteĩ kambuchi ojeguapáva ha ambue kambuchi katu oime haichagua rei.

22Upéicha ojehu avei Ñanderuete ndive, Ha’e oñohẽse ramojepe imba’yru pochy rehegua ha ohechaukase ramojepe ipu’aka. Ha’e ojejoko katu gueteri heta paciéncia reheve, oñembosako’ipa ramojepe imba’yru pochy reheguáva ohundi hag̃ua (iñe’ẽrendu’ỹvape).

23Ha’e ojejoko gueteri ohechauka hag̃ua avei imba’yru poriahuvereko reheguáva ituichaveha imba’yru pochy reheguávagui ha oñembosako’íma avei ohechauka hag̃ua heko jajaipa.

24Ñande voi ningo ko’ã imba’yru poriahuvereko reheguáva. Ñanderuete voi ningo ohenoimava’ekue Israélpe ha ambue tetãnguérape ko tembiapo kóvape g̃uarã.

25Upéicha Ñanderuete ohaiukáma avei ikuatiañe’ẽme: Che ahenóita che retã’ỹvape che retã ramo, ha che ahayhu’ỹva’ekuépe ko’ág̃a Che ahayhuva’aína (Oséas 2,23).

26Ha ambue ñe’ẽ he’i ichupekuéra: Peẽ ningo ndaha’éi che retã, upéi katu ohenói ichupekuéra Ñanderuete ra’ykuéra ramo, (Oséas 2,1).

27Isaías ningo sapukaihápe he’i Israel retã rehe: Nde Israel, ne retãyguakuéra heta ramojepe ku yguasu rembe’y yvyku’ícha, hembyremínte ojesalváta,

28Ñanderuete katuete ojapopa pya’éta opaite mba’e he’iva’ekue guive hetã rehe ko yvy ape ári (Isaías 10,22-23).

29Ha Isaías yma he’i haguéicha: Ha yvága atykuéra Jára nañanemohembýi rire mbovymi jepe, jajoguaiteva’erãmo’ã Sodóma ha Gomórrape (Isaías 1,9).

Ñanderuete omboyke Israel retãme ojei haguére Ñanderuete rapégui

30Aipóramo, mba’épa ja’éta. Umi tetã ndohekaiva’ekue Ñanderuetépe ojohu pe teko potĩ (justícia), ohupitýma pe teko potĩ ojerovia haguére.

31Israel katu ohupityse pe teko potĩ hembiapo porã rupi, upévare oñeha’ãmba ojapo hag̃ua Moises rembiapoukapykuéra, ndohupitýi katu pe teko potĩ Ñanderuete renondépe.

32Ha mba’érehepa ndohupitýira’e. Ndohupitýi hikuái ndojeroviái haguére Hesu rehe, ohupityse pe teko potĩ hembiapo porã rupínte, ha upévare oñepysãnga hikuái pe ita ñepysãngáva rehe, (Hesu Crístore).

33Ñanderuete kuatiañe’ẽme he’i voi: Peikuaa porãke, Che amoĩma Siónpe peteĩ ita oñepysãngatahápe ha peteĩ ita guasu oporoitytahápe; ha upe ojeroviáva hese (Hesu Crísto rehe) noñehundimo’ãi, (Isaías 28,16; ha Isaías 8,14).