Job 14 - Biblia en Guaraní - ?anderuete ?e’? Por? 2015

Jóbpe g̃uarã imbyky pe yvyarigua rekove

1Kuimba’e ha kuña rekove, onace guive omano meve, imbyky ha henyhẽ jepy’apýgui.

2Okakuaa porã yvotýicha ha upéi ipiru, kuarahy’ãicha okañy ha ndopyta aréi.

3Ko’ãva rehe rema’ẽreína, ha chereru añembojovake hag̃ua nendive.

4Heko ky’ávape piko omoheñoikuaa heko potĩva, ndaikatúi ningo.

5Añetehápe, Nde voi ere kuimba’e ha kuñakuérape mboy ára térã mboy jasy pevépante oikova’erã. Hi’arakuéra ojepapa porãma voi, ha avave ndohasamo’ãi umi ára nde remoĩmava’ekue ichupe.

6Upévare erova nde resa hekovégui, ha’e ipy’aguapy ha ovy’akuaa jevy hag̃ua peteĩ omba’apóva hapichápe g̃uarãicha ha ka’aru pytũme oñeme’ẽ ichupe hembiapo repy.

7Oñekytĩ ramo peteĩ yvyra, hoky jevýnepa.

8Hapokuéra ituja ramo jepe yvy guýpe ha imatakue omanombota ramojepe yvýpe,

9oñandu vove y hoky jevýta ha opu’ãjevýta.

10Pe tapicha imbaretéva ndaipu’akái ramo ijehe ha omano ramo moõpa ohóta.

11Pe yguasu otimbo háicha, ha pe ysyry hypa ha ikã háicha,

12péicha pe yvyarigua oñeno ha nopu’ãmo’ãvéima, oĩ aja yvága ndopaymo’ãi ha nopu’ãmo’ãi ikéragui.

13Mba’eichatamora’e ikatu akañy omanóva retãme opi peve nde pochy, ha remoĩ meve chéve peteĩ ára nemandu’a jevytaha cherehe.

14Kuimba’e ha kuña omano ramo, oikove jevýtapa; upéicharamo che rekove pukukue aha’ãrõta opa peve che jehasa asy, ha og̃uahẽ meve umi opytátava che rendaguépe.

15Upe ára upévape Nde cherenóita, ha che rombohováita, ha reguerohorýta nde po rembiapokue.

16Opáichavo, ko’ag̃aite nde reipapa che guata pypore ha nerema’ẽi che rembiapo vaikue rehe.

17 Vosa ñapytĩmbýpe reguereko che rembiapo vaikuéra ha ñembovyvypýpe reguereko che ñaña reko.

18Añetehápe pe cérro ho’a ramo iku’ipa, ha umi itaguasu ovapa hendágui.

19Pe y hatã osyrýva oipe’ope’o itakuéra, ha pe ama ogueraha háicha yvy timbo, péicha Nde rembyai umi mba’eporã tetãyguakuéra oha’ãrõva.

20Nde rembopoguy ichupe tapiaite, ha ha’e ohova’erã, ha ha’e oho ramo oñemoambuéta hova ha omano.

21Ita’yrakuéra oñemoherakuã porã ramojepe, ha’e ndoikuaavéima, ha oñemotĩ ramojepe ichupekuéra, ha’e noñanduvéima mba’eve.

22Hete katu oñandu imba’asy, ha hi’ánga oñembyasy asy.