Ésdras 3 - Biblia en Guaraní - ?anderuete ?e’? Por? 2015

Kuave’ẽmby renda ñemyatyrõ ha pe ñemomba’eguasu

1Og̃uahẽ ningo pe jasy 7-ha, ha oñemohendapa riréma Israel ra’ykuéra itavakuérape, peteĩ kuimba’éicha oñembyaty opaite tetãygua Jerusalénpe.

2Ha opu’ã Jesúa, Josadac ra’y, ha ityke’yrakuéra, umi pa’i, ha Zorobabel, Sealtiel ra’y, ha ityke’yrakuéra, omopu’ã Israel Jára kuave’ẽmby renda, oikuave’ẽ hag̃ua hi’ári kuave’ẽmby ojehapypáva ojehai háicha Ñanderuete rembiguái Moises kuatiañe’ẽme.

3Ha omohenda hikuái pe kuave’ẽmby renda ipyendakue ári, okyhyje ramo jepe hikuái umi tetãygua pe tetãpy rehe oikóvagui; ha oikuave’ẽ hikuái hi’ári kuave’ẽmby ojehapypáva Ñanderuetépe g̃uarã, pyhareve ha ka’aru.

4Omboarete avei hikuái pe areteguasu tapýi pindo rogueguiguávape (Enramáda), ojehai háicha avei Moises kuatiañe’ẽme; ha oikuave’ẽ kuave’ẽmby ojehapypáva, ko’ẽ ko’ẽ rehe ojejapo hekoitépe ymaguaréicha, hi’araitépe opaite mba’e oje’e haguéicha (Números 29,13-39).

5Ha ã mba’e rire ojehapypa umi kuave’ẽmby opaite árape, jasy ra’ykuérape, ha opaite ambue areteguasúpe Ñanderuetépe g̃uarã, ha opaite ambue kuave’ẽmby ojejapónteva, ipy’aite guive Ñanderuetépe g̃uarã.

6Pe jasy 7-hápe, pe ára peteĩha guive oñepyrũ hikuái oikuave’ẽ kuave’ẽmbynguéra Ñanderuetépe g̃uarã; noñepyrũi ramojepe gueteri omopu’ã hag̃ua Ñanderuete rogaguasurã.

7Ha ome’ẽ hikuái pirapire umi óga mopu’ãhárape ha umi carpinterokuérape. Ha umi Sidon ha Tiroyguakuérape g̃uarã oñeme’ẽ avei tembi’u, víno ha acéite ogueru hag̃ua cédro Líbano guive, yguasu rupi, Jópe peve, Pérsia retã ruvicha, Círo he’i haguéicha, peichaite ojejapopa avei.

Oñepyrũ oñemopu’ã Ñanderuete rogaguasu

8Pe áño mokõiháme, pe jasy mokõiha jave Zorobabel, Sealatiel ra’y, Jesúa, Josadac ra’y ha ambue ityke’yrakuéra, umi pa’i ha Leviguakuéra, ha mayma ouva’ekue guive jepokuapyhágui og̃uahẽ rire Jerusalénpe, oñepyrũ omopu’ã Ñanderuete rogaguasu; ha omoĩ hikuái umi Levigua ombotýva guive 20 áño oipytyvõ ha ombopya’e hag̃ua Ñanderuete rogaguasu rembiapo.

9Jesúa, ita’yrakuéra ha ityke’yrakuéra; Cadmiel ha ita’yrakuéra, Juda tríbugui, peteĩ kuimba’éicha oñemoĩ peteĩ ñe’ẽme omokyre’ỹ hag̃ua umi omba’apóvape Ñanderuete rogaguasúpe; Henadad, ita’yrakuéra ha ityke’yrakuéra ndive, ha’ekuéra Levi tríbugui.

10Ha umi omopu’ãtavahína Ñanderuete rogaguasúpe oñepyrũ pe óga rembiapo, upejave umi pa’i, ipa’i ao reheve ha iturukuéra ipópe; ha umi Levigua Asaf ñemoñarenguéra, iplatillokuéra reheve, oñembosako’i omomba’eguasu hag̃ua Ñanderuetépe, David Israel retã ruvicha he’i haguéicha ojejapo hag̃ua.

11Ha opurahéi joa hikuái, omomba’eguasu ha omboetévo Ñanderuetépe he’i hikuái: Ha’e ipy’a porã, ha opaite árape iporiahuvereko oĩ Israel ndive. Ha opaite Israelgua osapukái joa vy’aguasu reheve omomba’eguasúvo Ñanderuetépe, oñepyrũ guive omopu’ã hag̃ua Ñanderuete rogaguasu.

12Ha heta pa’i, Leviguakuéra, ogaguasu ruvichakuéra ha karai ancianokuéra ohechamava’ekue Ñanderuete rogaguasu tenondeguare, ohechávo hikuái oñepyrũha omopu’ã Ñanderuete rogaguasu pyahu ojahe’o joa, ambuekuéra katu osapukaipa joa vy’apópe.

13Ha ndaikatúi ojehechakuaa mávapa osapukái vy’águi térã mávapa ojahe’o, ituichaitereígui pe ayvu, ha isapukaikuéra oñehendu mombyryeterei guive.