Provérbios 16 - Biblia en Guaraní - ?anderuete ?e’? Por? 2015

Ñanderuete oma’ẽ yvyarigua rembiapóre.

1Yvyarigua mba’e ningo jajepy’amongeta (ñapensa) hag̃ua, Ñanderuete katu ome’ẽ pe pensamiénto iporãitéva.

2Yvyariguakuérape g̃uarã opaite hapekuéra ipotĩváicha, Ñanderuete katu oha’ã ñande py’apýpe oĩva.

3Emoĩ Ñanderuete pópe ne rembiaporã ha osẽ porãva’erã.

4Opaite mba’e Ñanderuete ojapóvaguive ipype oĩ ipropósito, umi iñañáva jepe Ha’e ojapo oñehundi hag̃ua hi’araitépe.

5Umi oñembotuicháva ombojeguaru Ñanderuetépe; ha añetehápe ndopytaiva’erã ojehavira’ỹre.

6Poriahuvereko ha añetegua rupi oñemyatyrõ pe tembiapo vai rapykuere, ha kyhyje Ñanderuetégui omboyke yvyariguakuérape mba’evaígui.

7Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.

8Iporãiteve pokãmi teko potĩ reheve, umi mba’eita hekope’ỹvagui.

9Pe yvyarigua opensa haperã rehe, Ñanderuete katu omboguata ichupe.

10Ñanderuete omoĩ ñe’ẽ añetegua tetã ruvicha jurúpe ha’e ombojovake jave, ani hag̃ua ha’e opyrũ añetegua rehe.

11 Balánza ha platillokuéra heko peguáva Ñanderuete mba’e, ha ipesakuéra vosa’ípe oĩva, Ñanderuete rembiapo porã voi.

12Pe tetã ruvicha porã ndaija’éi tembiapo vaíre, justícia rupi katu oñemoĩ hatãva’erã iguapyhaguasúpe.

13Tetã ruvichápe ombohory ñe’ẽ añeteguáva, ha ha’ekuéra ohayhu umi he’ívape ñe’ẽ hekoite peguáva.

14Pe tetã ruvicha pochy oporojukase; pe iñarandúva katu oñeha’ãmbaite ombogue hag̃ua ipochy rendy.

15Pe tetã ruvicha resa porã oporomoingove, ha ipy’aporãva ningo ojogua amáme arahakúpe.

16Iporãve jahupity arandu, óro hepyetégui; ha iporãve jahupity akãporã, óro morotĩgui.

17Umi heko potĩva rape oñemboyke mba’evaígui; upe oñangarekóva hape rehe, oñangareko avei hekoverã rehe.

18Upe oñehundíva oñembotuicha raẽ, ha upe oñembotuicháva katuete ho’ava’erã.

19Iporãve ñane ánga oñemomirĩ umi heko oñemomirĩva ndive, ñamboja’o rãngue mondapyre umi oñembotuicháva apytépe.

20Pe oñe’ẽva akãguapy porãme ojohuva’erã mba’eporã, ha pe ojeroviáva Ñanderuete rehe ojohuva’erãma isalvacion.

21Upe oiporu porãva iñarandu, oje’e ha’e iñaranduha, ha iñe’ẽ he’ẽ asy oporomoaranduve.

22Yvu oporomoingovéva ningo pe akãporã ijárape g̃uarã, ha pe itarováva ojehavirava’erã itarova reko rupi.

23Pe iñarandúva akãguapy omoarandu ijuru ha ombojuky jukyve iñe’ẽ.

24Ñe’ẽ porã ojogua eiraitépe hapichakuérape g̃uarã, mba’e vevúi asy hi’ángape g̃uarã ha pohã ikanguekuérape g̃uarã.

25Oĩ ningo tape naikarẽivaicha yvyariguakuérape g̃uarã, ipahápe katu ojejohu hikuái ñemano rapépe.

26Pe ñembyahýi omokyre’ỹ pe omba’apóvape, ijuru okaruségui.

27Pe iñañáva ombosako’i mba’evai hapichápe g̃uarã, ha ijuru ojogua tata oporombokusuguévape.

28Pe tekove tie’ỹ ñaña omyasãi teko vai, ha pe ijurumy’ỹiva oipe’a ojuehegui amigokuéra ojohayhuvévape.

29Pe tekove ñaña ombojuruhe’ẽ hapichápe, ogueru hag̃ua avei ichupe hape vai rehe.

30Upe oñembyesa’íva ndéve ojapose ivaíva; omongu’e vove hembekuéra, ojapóma mba’evai.

31Akã rague morotĩ ombojegua karaiete ha kuñakarai g̃uaig̃ui akã, ha kóva ojejohu justícia rapépe.

32Iporãiteve pe kuimba’e hasýpe ipochýva, peteĩ soldádo oñorãirõ porãvagui; ha peteĩ kuimba’e ojokokuaáva hi’ánga rembipota iporãve peteĩ kuimba’e ombopoguývagui peteĩ távape.

33Yvyariguakuéra oitykuaa jepevémo pe po’a, ho’áta katuete Ñanderuete oipota háicha.