Isaías 6 - Biblia en Guaraní - ?anderuete ?e’? Por? 2015

Ñanderuete oipytyvõ umi hese ojeroviávape

1Pe tetã ruvicha Usías omanoha áñope, che, Isaías, ahecha Ñanderuetépe oguapy jave iguapyha yvate ha iporãitéva ári, ha ijahoja ruguái omyenyhẽ Ñanderuete rogaguasu.

2Ijerekuévo oĩ hi’ángel Serafinguéra, peteĩteĩva 6 ipepóva, mokõime oñomi hovakuéra, mokõime oñomi ipykuéra ha mokõime oveve.

3Ha osapukái joa hikuái ojopekuéra: Heko porã, heko porã, heko porã, ñande yvága atykuéra Jára; pe yvy tuichakue oñemyenyhẽ heko jajaipágui.

4Ha umi okẽ guapyha oryrýi iñe’ẽ ryapukuégui, ha Ñanderuete rogaguasu henyhẽ tatatĩgui.

5Upéramo ha’e: Angái, angái, amanótama che; che ningo peteĩ yvyarigua ijuru ky’áva, ha aiko avei tetãyguakuéra ijuru ky’áva apytépe, che resakuéra ohechágui Ñanderuete, yvága atykuéra Járape.

6Peteĩ yvága rembiguái oveve ha ou che rendápe ha ipópe oĩ tatapỹi hendýva, ojapyhyva’ekue kuave’ẽmby rendágui itenázape,

7ha omboja che jurúre, ha he’i: Péina ápe kóa oja ne rembe rehe, ojepe’a hag̃ua ndehegui ne angaipa, ha nepotĩ hag̃ua ne rembiapo vaígui.

8Upéi ahendu Ñanderuete ñe’ẽ, he’íva: Mávapepa amondóta, ha mávapa ajokuáita. Upéramo che ha’e: Péina ápe, aĩ che, chemondo chéve.

9Ha he’i: Tereho ha ere ko’ã tetãyguápe: Pehendu ramojepe, mba’eve ndapeikuaamo’ãi ha pehecha ramojepe ndapejeroviamo’ãi.

10Emohatã ko’ã tetãygua py’apy ha emboty ijapysakuéra, ha hesakuéra, ani hag̃ua ohecha hesatee rupi, ha ani hag̃ua ohendu ijapysa rupi, ha ani hag̃ua ipy’apýpe oike mba’evete, ha ani hag̃ua ojevy hape vaígui ha oĩ ichupe g̃uarã ñepohãno.

11Ha che aporandu: Araka’e pevépa, che Jára. Ha Ha’e he’i chéve: Oñehundipa peve itavakuéra ha ndojeikovéi peve ipype, ha oñemonandiete peve hóga ha oñembotapere peve ikogakuéra.

12Che, pende Ruete amosarambi mombyryete hetãyguakuérape, amonandi peve hetãme.

13Ha ipype hemby ramo gueteri 10 100-gui, ko’ãva apytépe oĩve oñehu-ndi jevyva’erãva; oñekytĩ ramoguáicha umi yvyra tuicháva ha opytánte imatakue, kóa hoky jevýta. Upeichaite avei ojehúta ko tetã kóvape, umi hembymimívagui katu okakuaa jevýta peteĩ tetã ndetuicháva.