Juéces 16 - Biblia en Guaraní - ?anderuete ?e’? Por? 2015

Sanson oho Gázape

1Sanson oho Gázape, ha upépe ohecha peteĩ kuña heko vaíva, ha oñemog̃uahẽ hese.

2Ha oñemombe’u umi Gazayguápe: Sanson oúkuri ko’ápe. Ha omongora ichupe hikuái ha oha’ãrõ ichupe pe pyhare pukukue pe táva rokẽme; ha kirirĩháme oĩ joa hikuái pe pyhare pukukue, he’ívo: Ñaha’ãrõta ko’ẽ hesakã meve; ha upéi jajukáta ichupe.

3Ha Sanson katu oke pe pyhare mbyte peve; ha pe pyhare mbytépe opu’ã, ha ojapyhy umi táva rokẽguasu umi mokõivéva horcon iñembotyha reheve, ha ohupi ijati’y ári, ha oho ogueraha Hebron rovaigua cérro ru’ãme.

Sanson ha Dalíla

4Ko’ã mba’e rire Sanson ou iñakãraku peteĩ kuña Sorec ñu megua rehe, hérava Dalíla.

5Ha umi Filisteaygua ruvicha ou hendápe, ha he’i ichupe hikuái: Embotavy ichupe ha eikuaa mba’éicha rupípa ha’e imbareteite, ha mba’éichapa ikatu orepu’aka hese, rojokua hag̃ua ha rojapo hag̃ua ichugui rojaposéva; ha ore, peteĩteĩva, rome’ẽta ndéve 12,28 kílo pláta (óro morotĩ).

6Ha Dalíla he’i Sansónpe: Che ajerure ndéve remombe’u hag̃ua chéve mba’eicharupípa nembareteiterei, mba’eichapa rejejokuava’erã ha ipu’aka hag̃ua nderehe ija’e’ỹva.

7Ha Sanson he’i ichupe: Chejokua ramo 7 guyrapa sã, ipyahuetévape ha ojeporu’ỹva gueteri oipyso hag̃ua pe guyrapa, upéicha ramo chekangýta ha apytáta oimeraẽ kuimba’éicha.

8Ha umi Filisteaygua ruvicha ogueru ichupe 7 guyrapa sã ipyahuetéva, umíva reheve Dalíla ojokua ichupe.

9Ha oĩhína umi kuimba’e oñangareko ñemíva ikotýpe. Upémaramo Dalíla he’i ichupe: Sanson, cháke umi Filisteaygua ho’áta ndeári, ha ha’e omondohopa umi ysypo ku ka’avo inimbo poguasu oso ramoguáicha ojávo tata rehe; ha ndojekuaái mba’éicha rupípa imbareteitereirasa.

10Upéramo Dalíla he’i Sansónpe: Péina chembotavýra’e, ndejapu chéve; emombe’umína chéve ko’ág̃a, ajerure ndéve, mba’éichapa ikatúta rejejokua.

11Ha ha’e he’i ichupe: Chejokua atã porã ramo sã pyahúpe ojeporu’ỹva gueteri, upéicharamo chekangýta, ha apytáta oimeraẽ ambue kuimba’éicha.

12Ha Dalíla ojapyhy sã pyahu, ha ojokua ichupe ipype, ha he’i ichupe: Sanson, cháke Filisteayguakuéra ojeitýta ndeári, ha umi oha’ãrõva oĩhína kañyháme peteĩ kotýpe, ha’e katu omondohopa pe sã ijyvágui inimbóicha.

13Ha Dalíla he’i Sansónpe: Ko’ág̃a peve chembotavy ha cheguereko japu reheve. Emombe’úna chéve ko’ág̃a, mba’éichapa ikatúta rojokua. Upérõ ha’e he’i ichupe: Reñopẽ ramo 7 hendápe che akãrague inimbo poguasu reheve ha reñapytĩ porã ramo yvyra mbyky akua rehe, ojekutuva’ekue yvýre.

14Ha Dalíla oñapytĩ atã porã peteĩ yvyra mbyky akua rehe, ha he’i ichupe: Sanson, cháke, umi Filisteaygua ojeitýta ndeári. Ha opáyvo ha’e okehágui, ohekýi pe yvyra akua mbyky oñeñapytĩ haguépe iñakãrague.

15Ha Dalíla he’i ichupe: Mba’éicha piko nde ere cherayhuha, ha ne ñe’ã (py’a) noĩri chendive. Mbohapy jevýma nde chembotavy, ha ndereikuaaukái gueteri chéve mba’épa nemombareteitéva.

16Ha Dalíla ko’ẽ ko’ẽ rehe ojerure asýgui ichupe iñe’ẽ rupi, Sanson ánga ho’a jepy’apy asyete poguýpe.

17Ha omyesakãvo ipy’apy he’i ichupe: Araka’eve che akã rehe ndojái gueteri kyse hãimbe; che ningo peteĩ Nazaréo, oñeme’ẽva Ñanderuetépe g̃uarã, che sy ryépe aiko guive. Oñekytĩ mbykyete ramo che akãrague che pu’aka ojeíta chehegui, ha chekangýta ha aikóta oimeraẽ ambue kuimba’éicha.

18Ha Dalíla ohechávo Sanson omombe’u hague ichupe ipy’apýpe oĩva guive, ohenoiuka Filisteaygua ruvichakuérape, ha he’i: Peju ko’ág̃a, ha’e oikuaauka chéve ipy’apýpe oĩva guive. Ha umi Filisteaygua ruvicha ou hendápe, ha ogueru hikuái ipópe pe pláta (oprometeva’ekue).

19Ha Dalíla omonge Sansónpe henypy’ã ári, ha ohenói peteĩ kuimba’épe, oikytĩ hag̃ua umi 7 iñakãrague ñopẽmbyre; ha upéicha Dalíla omokangy ichupe ha ipu’aka ojei Sansóngui.

20Ha he’i ichupe: Sanson, cháke Filisteayguakuéra ojeitýta ndeári. Ha opáyvo okehágui, he’i ijupe g̃uarã: Ko’ág̃a ajehekýi jevýta ichuguikuéra ko kueheve guareichaite ha aháta. Ha’e ndoikuaái katu Ñanderuete oñemboykéma hague ichugui.

21Ha umi Filisteaygua katu oapresa rire ichupe, ohesa’o ha ogueraha ichupe Gázape; ha omosã ichupe cadénape ha omoĩ ichupe cárcelpe omomba’apo hag̃ua ichupe mba’e ra’ỹi mongu’ihápe.

22Ha iñakãrague oñepyrũ jevy okakuaa ohóvo.

Sanson ñemano

23Ha umi Filisteaygua ruvichakuéra oñembyaty joa oikuave’ẽ hag̃ua ijára Dagónpe g̃uarã ha ovy’a hag̃ua hikuái; ha he’i: Ñande jára omoĩ ñande pópe Sanson, ñanderayhu’ỹvape.

24Ha Filisteayguakuéra ohechávo Sansónpe, ha’ekuéra omomba’eguasu ijárape, he’ívo: Ñande jára omoĩma ñande pópe ñanderayhu’ỹvape ombyaipava’ekue ñane retã, ha hetápe ojukava’ekue ñande apytépe.

25Ha ovy’aite jave he’i hikuái: Pegueru Sansónpe, tañanembovy’a. Ha ogueru hikuái Sansónpe cárcelgui, ha oiko ñemboharaiha ramo henondepekuéra; ha omoĩ ichupe umi horcon pa’ũme.

26Upémaramo Sanson he’i pe mitãrusu oisãmbyhývape ichupe ipógui; chemoag̃uína, ha chembopoko umi horcon ko óga oguapyha rehe ajejoko hag̃ua hesekuéra.

27Ha pe óga péva henyhẽ kuimba’e ha kuñakuéragui, ha Filisteaygua ruvicha oĩmba upépe; ha pe óga jo’aha ári (píso yvate) oiméne oĩ avei 3.000 kuimba’e ha kuña, oma’ẽ joáva hína Sanson rehe, oikóva hese ñembohory asýva ramo.

28Upévo Sanson omba’ejerure asy Ñanderuetépe, ha he’i: Che Ruete, nemandu’ána cherehe ko’ág̃a, ha chemombarete jevy, Che Ruete, peteĩ jevýnte amyengovia hag̃ua Filisteayguakuérape cheresa’o haguére.

29Ha upéi oipyso ijyva umi mokõi horcon mbyte pegua rehe, pe óga oguapyha ári, ipo akatúa opoko peteĩ horcon rehe ha ipo asu opoko ambue horcon rehe.

30Ha Sanson he’i: Tamano che Filisteayguakuéra ndive. Upévo ojayvy imbaretekue javeve, ha oity pe óga umi mburuvicha ha mayma Filisteayguakuéra upépe oĩva guive ári. Ha umi ojukava’ekue upérõ hetave umi hekovépe ojukava’ekuégui.

31Ha ou ityvyrakuéra ha mayma itúva rogaygua, ha ogueraha ichupe oñotỹ hag̃ua, Zora ha Estaol pa’ũme, itúva Manóa oñeñotỹ haguépe. Ha ha’e ombojovake Israélpe 20 áño pukukue.