Jeremías 37 - Biblia en Guaraní - ?anderuete ?e’? Por? 2015

Oñemoinge Jeremíaspe cárcelpe

1Umi ára Sedequías, Josías ra’y, oisãmbyhy Juda retãme; Nabucodonosor voi omoĩ ichupe tetã ruvicha ramo, Conías, Joacim ra’y rendaguépe.

2Sedequías, hembiguaikuéra ha umi tetãygua ndojapói katu Ñanderuete ñe’ẽ, pe proféta Jeremías he’iva’ekue.

3Ha tetã ruvicha Sedequías omondo Jucal, Selemías ra’ýpe, ha pa’i Sofonías, Maasías ra’ýpe, omombe’u hag̃ua proféta Jeremíaspe: Emba’ejeruréna orerehe Ñanderuete, Ñandejárape.

4Ha Jeremías oike ha osẽ tetãygua apyte rupi ha’e oikose háicha; ne’ĩragui gueteri omoĩ ichupe hikuái cárcelpe.

5Upéramo faraon soldadokuéra osẽ Egíptogui, ha og̃uahẽ vove ko marandu Caldeaygua apysápe, ha’ekuéra nomongorasevéi Jerusalen, ha oñemomombyry hikuái pe tavaguasúgui.

6Upéramo Ñanderuete ñe’ẽ ou Jeremíaspe, ha he’i ichupe:

7Péicha he’i pende Ruete, Israel Jára: Péicha eréta Juda retã ruvichápe, ha’e voi nembouva’ekue che rendápe omba’eporandu hag̃ua chéve: Eikuaa porãke, faraon soldádo aty osẽma penepytyvõ hag̃ua, ojevy jeýta katu hetã Egíptope penepytyvõ’ỹre.

8Ha umi Caldeaygua ou jevýta ojeity hag̃ua ko táva ári, ha ombopoguy rire ko táva kóvape ohapýta avei.

9Péicha he’i Ñanderuete: Anítei peẽ voi peñembotavy, pejévo: Añetehápe umi Caldeaygua oñemboykétama ñandehegui; noñemboyke aremo’ãigui pendehegui.

10Peikutu ramojepe umi Caldeaygua soldádo penerãirõvape, ha hembýnte ramo ichuguikuéra kuimba’ekuéra ojekutupava’ekue, opu’ã joaitéta hikuái hóga tymba pirekueguiguágui, ha omyendýta tata ko táva kóva rehe.

11Ha umi Caldeayguakuéra soldádo oñemomombyry aja Jerusaléngui faraon soldadokuéra rupi,

12Jeremías osẽ Jerusaléngui oho hag̃ua Benjamin tríbu pegua yvýpe, osẽse hetãygua apytégui.

13Ha ohasa vove Benjamin rokẽ rupi, peteĩ soldádo ruvicha hérava Irías, Selemías ra’y, Hananías ra’yre, ojoko ichupe, ha he’i: Nde rehasase umi Caldeaygua rendápe.

14Ha Jeremías he’i: Japu, che ndahasaséi Caldeayguakuéra rendápe. Ha nohendúi ichupe Irías ha oapresa Jeremíaspe, ha ogueraha ichupe mburuvichakuéra renondépe.

15Ha umi mburuvicha ipochy Jeremías ndive, ha oinupã ichupe ha omoinge ichupe cárcelpe pe kuatia haihára Jonatan rógape, hógagui ojapo hikuái peteĩ cárcel.

16Ha omoinge hikuái Jeremíaspe peteĩ kotýpe, y oĩháme. Oñembo’y hag̃ua ýpe ha upépe hi’are heta ára.

17Uperire tetã ruvicha Sedequías oguenohẽuka ichupe pe cárcelgui; ha ñemiháme tetã ruvicha oporandu ichupe hógape, ha he’i ichupe: Oĩpa Ñanderuete ñe’ẽ. Ha Jeremías he’i: Oĩ. Ha he’i ichupe: Re’áta Babilónia retã ruvicha pópe.

18Ha Jeremías he’i avei tetã ruvicha Sedequíaspe: Mba’épa ajapo vaíra’e nderehe térã ne rembiguaikuéra rehe térã ko tetã rehe, peẽ chemoinge hag̃ua cárcelpe.

19Ha mamo piko oime pende profetakuéra oikómiva omomarandu peẽme he’ívo: Ndoumo’ãi Babilónia retã ruvicha ko tetãme ni ko távape.

20Ko’ág̃a, ajerure ndéve, nde che retã ruvicha, ho’a porã nga’úra’e che rembijerure ne renondépe, ani chemondo jevy pe kuatia haihára Jonatan rógape, ani hag̃ua amano upépe.

21Upéramo tetã ruvicha Sedequías, omoĩ Jeremíaspe mburuvichaguasu korapy cárcelpe, ha ome’ẽuka ichupe peteĩ pan opaite árape, umi pan apoha cállegui, opa peve pe pan táva ryepýpe. Upéicha Jeremías opyta mburuvichaguasu korapy pegua cárcelpe.