1 Crónicas 15 - Biblia en Guaraní - ?anderuete ?e’? Por? 2015

David ogueru Ñanderuete karameg̃ua Jerusalénpe

1David omopu’ã rire hogarã itávape, ombosako’i Ñanderuete karameg̃uá rendag̃ua, peteĩ óga aoguiguáva.

2Upéramo David he’i: Ñanderuete karameg̃ua ojegueruva’erãva Leviguakuéra rupínte; Ha’e oiporavógui ichupekuérante oguerova hag̃ua pe karameg̃ua, ha’ekuéra oiko hag̃ua hembiguái ramo opaite árape.

3Upérõ David ombyaty opaite Israelguápe Jerusalénpe, oguerova hag̃ua hikuái Ñanderuete karameg̃ua hendag̃uáme, ha’e ombosako’i haguépe.

4Upéicha David ombyaty opaite Aaron ra’y ha Leviguakuérape:

5Coat rogaguasúgui ha ityvyrakuéra oñondivepa oĩ 120, ha Uriel oiko imburuvicha ramo.

6Merari rogaguasúgui ha ityvyrakuéra oñondivepa oĩ 220, ha Asaías oiko imburuvicha ramo.

7Gerson rogaguasúgui ha ityvyrakuéra oñondivepa oĩ 130, ha Joel oiko imburuvicha ramo.

8Elizafan rogaguasúgui ha ityvyrakuéra oñondivepa oĩ 200, ha Semaías oiko imburuvicha ramo.

9Hebron rogaguasúgui ha ityvyrakuéra oñondivepa oĩ 80, ha Eliel oiko imburuvicha ramo.

10Uziel rogaguasúgui ha ityvyrakuéra oñondivepa oĩ 112, ha Aminadab oiko imburuvicha ramo.

11Ha David ohenói pa’ikuéra Sadoc ha Abiatárpe, ha umi Levigua: Uriel, Asaías, Joel, Semaías, Eliel ha Aminadábpe,

12ha he’i ichupekuéra: Peẽ Levi rogaguasu ruvicha, peñemboheko potĩ peẽ ha pene pehẽnguekuéra, peguerova hag̃ua Ñanderuete, Israel Jára, karameg̃ua hendag̃uáme, ambosako’i haguépe.

13Pe ambue jevy jaguerova ramoguare nosẽ porãi, peẽ napeiméigui ore apytépe, peguerova hag̃ua Ñanderuete karameg̃ua Ha’e he’iuka haguéicha, ha upévare Ha’e orenupãva’ekue avei.

14Upéicha pa’ikuéra ha Leviguakuéra oñemboheko potĩ ogueru hag̃ua Ñanderuete, Israel Jára karameg̃ua Jerusalénpe.

15Ha Levi ñemoñarenguéra ogueru hikuái Ñanderuete karameg̃ua, ha omoinge hi’yvakuéra umi karameg̃ua argollakuéra rehe oguerova hag̃ua ijati’ykuéra ári, Ñanderuete he’iuka haguéicha Moises juru rupi ichupekuéra.

16Upéicha David he’i avei Levigua ruvichakuérape, opurahéi ha ombopu hag̃ua imbaraka, hi’árpa ha iplatillokuéra ovy’apa joa hag̃ua hikuái.

17Ha Leviguakuéra oiporavo Heman, Joel ra’ýpe, omoakãmba hag̃ua; ha Asaf, Berequías ra’ýpe, oipytyvõ ichupe; ha Merari ra’ykuéragui ojeporavo Etánpe, Cusaías ra’y.

18Upéi ojeporavo Zacarías, Jaaziel, Semiramot, Jehiel, Uni, Eliab, Benaía, Maasías, Matitías, Elifelehu ha Micníaspe omoirũ hag̃ua ichupekuéra ipurahéipe. Obed-edom ha Jeiel opyta okẽ ñangarekohára ramo.

19Ojeporavo Heman, Asaf ha Etánpe omoakã hag̃ua umi opurahéivape ombopúva iplatíllo bronceguiguáva,

20ha Zacarías, Aziel, Semiramot, Jehiel, Uni, Eliab, Maasías ha Benaía ombopu mbaraka ipo’ivéva, kuñataĩkuéra opurahéi háicha,

21ha Matatías, Elifelehu, Micnías, Obed-edom, Jeiel ha Azazíaspe ombopu árpa ipoguasuvéva, kuimba’e opurahéi háicha.

22Ha Quenanías, peteĩ Levigua ruvicha, omyakã Ñanderuete rogaguasu rembiporu ojererova jave, ha’e ikatupyrýgui ko tembiapo kóvape.

23Berequías ha Elcana oñangareko pe karameg̃ua rehe.

24Ha Sebanías, Josafat, Natanael, Amasai, Zacarías, Benaía ha Eliezer, ha’ekuéra pa’ikuéra ombopu turu Ñanderuete karameg̃ua renondépe; Obed-edom ha Jehías oñangareko avei pe karameg̃ua rehe.

25David, karai ancianokuéra ha umi mburuvicha mil arigua ndive, oho ogueru vy’apópe Ñanderuete karameg̃ua Obed-edom rógagui.

26Ñanderuete oipytyvõ haguére Leviguakuérape oguerova hag̃ua Ñanderuete karameg̃ua, ha’ekuéra oikuave’ẽ ichupe g̃uarã 7 tóro ra’yrusu ha 7 ovecha mácho.

27Ha David oñemonde ao líno hepývape ha péicha avei Leviguakuéra ogueraháva Ñanderuete karameg̃ua, puraheiharakuéra, ha avei Quenanías pe omoakãva umi opurahéivape. Ha David, omonde pa’i ao (efod) líno inimbo ojejapopyrévagui.

28Péicha Israelguakuéra ogueraha vy’apópe Ñanderuete karameg̃ua, turu, trompéta, platíllo ha mbaraka púpe.

29Upéicha Ñanderuete karameg̃ua og̃uahẽ David távape, ha Mical, Saul rajy, oma’ẽ jave peteĩ hovetã guive, ohechávo tetã ruvicha Davídpe opopo ha ojerokývo, ojapo’iete ichupe ipy’apýpe.