Nahum 3 - Biblia en Guaraní - ?anderuete ?e’? Por? 2015

1Cháke, nde, Nínive, reñohẽva’ekue heta tuguy, nerenyhẽmba ñembotavy ha mondapyrégui, ha nderepoiséi ne monda rekógui.

2Pehendúpa tukumbo ha ruéda ryapu, kavaju oñani hatãitereívaicha ha carrokuéra ojere hatãitereívaicha,

3kavaju arigua pya’e ou, ikyse puku ha ijyvyra puku akua overáva reheve, hetaitereípe ojekutuva’erã ha oñepysãngapava’erã he’õnguekuéra opa rupi oñemosarambipava’erã rehe.

4Ha mba’épa ojehu ikuña reko vai rupi, ha’e voi ombo’e ipaje rembiapo, ha ikuña rete porãite rupi ombotavy tetãnguérape ha ipaje rembiapo rupi oñapytĩ ichupekuéra.

5Péina ápe, Che apu’ãta nderehe, he’i ángel atykuéra Jára, ha aipepíta nde sái ruguái nde rova peve, ha ahechaukáta tetãnguérape ndeopivoha, reñemotĩ hag̃ua tetãguasukuéra renondépe.

6Che aitýta nde ári mba’e ky’a, nemotĩ ha oñembohory hag̃ua nderehe hikuái.

7Umi nderecháva guive oñemboykéta ndehegui, ha he’íta hikuái: Nínive oñembotaperepa, ha mávapa oiporiahuverekóta ichupe. Mamópa ahekáta umi nemoangapyhy jevyva’erãva ndéve.

8Ndépa neporãve nga’u Tébasgui, oñemopu’ãva’ekue Nílo rembe’ýpe ha y ojerepa hese, pe yguasu voi iñemo’ãha, ha y opyta ikorapyjereguasu ramo.

9Hetaiterei Etiopiaygua ha Egiptoygua omombarete ichupe, ha umía ndaijapýrai, Put ha Libiayguakuéra ipytyvõhára.

10Tébas ojeguerahava’ekue avei jepokuapýpe, ha imitãkuéra ojepetepa yvy rehe umi tape ojuasaha rupi, ha ikuimba’ekuéra rehe oitýkuri hikuái po’a jeporavo ha umi imburuvicha maymávape ojejokuapa cadénape.

11Nde, Nínive, reñemonga’úta avei ha reñembotýta, nde avei rekañýta reñemo’ã hag̃ua umi nderehe ija’e’ỹvagui.

12Opaite nde táva oñemombaretéva ha’ete higo’a tenondeguáva, oñembokachárõ, hi’a ho’a umi ho’uséva jurúpe.

13Peikuaa porãke ñorãirõharakuéra, pende apytépe oĩ umi ojoguaitéva kuñakuérape, ne retã rokẽnguéra ojepe’apa nderehe ija’e’ỹvape g̃uarã ha tata ombokusuguepáta nde táva rokẽ ñembotyha.

14Erojáke y, emongora porã nde táva, eike ñay’ũme, ejoso pe tuju, embosako’i pe tatakua rejapo hag̃ua ladríllo.

15Upeichavéramo jepe pe tata nembokusuguepáta, pe kyse puku ndejukáta. Nembososóta tukúicha, penderetaite ramojepe.

16Rembohetaiteve ramojepe ne ñemuhára mbyjakuéragui, ha’ekuéra ohupity rire umi mba’e oipotáva ovevéta ohóvo tuku atýicha.

17Umi ne mburuvicha ha nde poguasukuéra ojogua tuku atýpe oguapy joáva pe kora yvyraguiguávape araro’y aja, osẽvo pe kuarahy ohopa, ha ndojekuaavéima mo’õpa opyta.

18Okepa nde ovecha rerekuakuéra nde, Asíria retã ruvicha, ha ne mburuvichakuéra opytu’upa ha ne ñorãirõhára oñemosarambipa umi cérro rehe, ha ndaipóri avave ombyaty jevyva’erã ichupekuéra.

19Rejekutu haguépe naipohãi, ndokueramo’ãvéi, ohendúva guive nde rehasa asyha, vy’apópe ojepopete joava’erã nderehe, oñandupáma haguére ne aña reko.