Job 24 - Biblia en Guaraní - ?anderuete ?e’? Por? 2015

Jóbpe g̃uarã hasyete omoneĩ hag̃ua Ñanderuete rembipota hekovépe

1Mba’éguipa Ñanderuete ndojokói iñañáva rembiapo vai ijehavira rupi ha mba’érehepa umi ojeroviáva hese ndohechái Ha’e ombojovakeha hekoitépe.

2Oĩ yvy jára ombotuicha reíva ijyvy rembe’y, oĩ umi omondáva hapicha rymbakuéra ha oñangareko umía rehe imba’etee ramoguáicha.

3Oĩ avei umi ogueraha reíva ityre’ỹva rymba búrro ha imenave’ỹva vaka, oiporukamava’ekue repy (garantía) rehe.

4Omboyke mbaretépe imboriahúvape henonderãgui ha upévare okañymba hikuái.

5Pema’ẽ porãke, ku búrro saitekuéraicha umi imboriahúva osẽ desiértope oheka hag̃ua imitãkuéra rembi’urã.

6 Desiértope oheka hikuái hembi’urã ha ñemiháme oho umi iñañáva parraltýpe ogueraha hag̃ua pe hembýva imono’õháragui.

7Oheja umi ijopívovape oke ijao’ỹre, ha mba’eve ndoguerekói oñeñu’ã hag̃ua ro’y jave.

8Ama cérroguio oúva ombohykuepa ichupekuéra, ha okañy hikuái ita guasúpe, ndoguerekóigui mba’eve oñeñu’ã hag̃ua.

9Umi imenave’ỹva pyti’águi oipe’a imembykuéra ovende hag̃ua, ha’ekuéra ndoguerekovéigui ambue mba’e omyengovia hag̃ua pe pirapire oiporuva’ekue.

10Ao’ỹre ha ñembyahýi reheve omomba’apouka ichupekuéra, omono’õ hag̃ua hemitỹnguéra.

11Táva ryepýpe oñami hikuái olivo’a ojapo hag̃ua acéite ijy’uheiete jave.

12Pe távagui oñehendu umi omanombotáva pyahẽ ha umi ojekutu vaipáva sapukái asy, Ñanderuete katu nohendúi iñembo’e.

13Ambuekuéra katu okañy pe ára resapégui, ha’ekuéra ndoguataséi Ñanderuete rape rehe ha ndoikoséi ipoguýpe.

14Iko’ẽmba mboyve opu’ã oporojuka hag̃ua, ojuka hikuái mboriahúpe ha ohasa asývape, ha pyharekuépe osẽ omonda hag̃ua.

15Pe heko ky’áva resa oha’ãrõ pe pyhare og̃uahẽ hag̃ua, ha he’i: Avave ndacherechamo’ãi, ha oñu’ã hova.

16Pyharekuépe oike hapicha rógape omonda hag̃ua ha arakuépe ha’e ñemboty porã hógape ndohayhúigui pe ára sakã.

17Okyhyje hikuái ko’ẽtĩ resapégui, ha’ekuéra ojepokuaámagui pyharegua rembiapópe.

18Pe iñañáva okañy pya’e y apére, ijyvy ári ho’águi pe maldicion, ha’e ndojevýi iparralty rape rehe.

19Umi ára okyve’ỹ ha ára haku ombohykupa hag̃uáicha pe y rypy’a, upéicha avei pe omanomava’ekue retã ogueraha umi iñañávape.

20Isy hesarái ichuguikuéra ha yso vy’apópe okaru hese, avave naimandu’avéi hesekuéra, umi iñañáva oñehundi ojeity háicha yvyrakuéra.

21Ha’e ojopy umi kuña ikatu’ỹvape imemby ha noipytyvõi umi kuña imenave’ỹvape.

22Oñembotuicha ramojepe ombyaty haguére mba’erepyeta, ha’e ndoikuaái hi’ára paha, ha upévare ha’e ojepy’apyete.

23Ha’e oñembotuicha ramojepe, Ñanderuete oha’ãrõ oñemoambue hag̃ua, upévare ome’ẽ ichupe ipytyvõ, hesakuéra katu oiko hapekuéra rehénte.

24Oñemopu’ã porã ramojepe, sapy’aitépe hekove opa reíta, ha oñehundipáta hikuái ambuekuéraicha, ipirupáta ha oñekytĩta trígo háraicha.

25Ha ndaupéichairõ mávapa he’ikuaa chejapuha, térã mávapa ombotovekuaa che ñe’ẽ.