Job 29 - Biblia en Guaraní - ?anderuete ?e’? Por? 2015

Job imandu’a ivy’akue rehe

1Job omoñepyrũ jevy, ha he’i:

2Mba’eichatamora’e aiko jevy umi jasy ohasava’ekuéicha, umi ára Ñanderuete oñangarekórõ guare cherehe,

3hesape ombojajaiva’ekue che akã ári ha che aguatámi hesapépe iñypytũha rupi,

4aiko porãva’ekue Ñanderuete ndive, ku ára che kuimba’e mbarete ramoguaréicha, Ha’e oñangareko aja che rógare,

5ha pe Ipu’akapavéva oiko chendive ha che ra’ykuéra opytapa che jerekuévo,

6ha ajohéi ramoguaréicha che py kambýpe, ha itaguasúgui osyry chéve g̃uarã pe aceiteita.

7Aha ramoguare táva rokẽme aporombojovake hag̃ua, oñembosako’i che guapyha aisãmbyhy hag̃ua.

8Mitãrusukuéra cherechámiva ojeipa chehegui, ha itujáva jepe opu’ãmba ha opyta ñembo’yhápe.

9Mburuvichakuéra ojoko iñe’ẽ ha omoĩ ipo ijuru ári, okirirĩ hag̃ua.

10Umi omoakãva pe aty okirirĩmba, ha ikũ ojámi iñapekũre.

11Umi apysa cherendúva guive ovy’a cherechávo, ha umi tesa cherecháva omoañete che ñe’ẽ.

12Che ningo aipytyvõmi mboriahu ipyahẽ asývape, ha tyre’ỹme oguereko’ỹva avave aiko ipytyvõhára ramo.

13Umi oñehundipotáva cherovasapa ha ambovy’a jevy umi imenave’ỹva py’apy (korasõ).

14Tekojoja (justícia) che aiporu che camisáicha, ha teko potĩ che sombréroicha.

15Che aiko tesa ramo ohecha’ỹvape g̃uarã, ha py ramo ikarẽvape g̃uarã.

16Imboriahúvape g̃uarã aiko itúva ramo ha añeha’ãmba ambojovake porã hag̃ua.

17Amopẽva’ekue iñañáva rãinguéra, ha ijurúgui aipe’a umi mba’e omokõmbotáva.

18Che ha’émi: Che raitýpe amanóta, ha yvyku’i heta háicha ambohetáta che arakuéra.

19Che rapo oñemyasãi y rembe’y peve ha ysapy opyta che rakãre.

20Oñembopyahu pyahuve che rerakuã porã ha che guyrapa che pópe imbareteve ohóvo.

21Oha’ãrõ hikuái cherendu hag̃ua, ha ohendu hag̃ua che rekombo’e okirirĩmba hikuái.

22Che añe’ẽ rire avave noñe’ẽsevéima ha che ñe’ẽ ho’a porã ichupekuéra.

23Chera’ãrõ hikuái ku ñemitỹhára oha’ãrõ háicha pe ama.

24Apukavými, amokyre’ỹ jevy hag̃ua ipy’a kangývape, ha’ekuéra ndaikatúi chembovy’a’ỹ.

25Che aiporavo haperã, ha aguapy ijapytepekuéra mburuvicha ramo, aiko ijapytépe tetã ruvicha ramo ha amoangapyhy umi ojahe’óvape.