Números 18 - Biblia en Guaraní - ?anderuete ?e’? Por? 2015

Pa’i ha Leviguakuéra rembi’urã

1Ñanderuete he’i Aarónpe: Nde, nde ra’ykuéra ha ne ñemoñarenguéra, peẽ pegueraháta pendeári opaite angaipa ojejapóva pe óga jojohuhápe ha peẽ pegueraháta avei pendejehe opaite angaipa peẽ voi pejapóva.

2Ha ne pehẽnguekuéra, nde ru Levi tríbu reheguáva toñembyaty avei nendive, ha nde poguýpe tanepytyvõ ndéve ha nde ra’ykuérape pe óga jojohuha rembiapópe.

3Ha’ekuéra ojapopava’erã nde eréva guive ichupekuéra ha oñangarekóta avei hikuái pe óga jojohuha rehe; noñembojaiva’erã katu pe kuave’ẽmby renda pegua tembiporu rehe, oñemboykéva pende Ruetépe, ani hag̃ua ha’ekuéra ha peẽ pemano avei.

4Ha’ekuéra oñembyatýta penendive pe óga jojohuhápe omba’apo ha oñangareko hag̃ua pe óga jojohuha rehe ani hag̃ua peteĩ ndaha’éiva Levigua térã pa’i oñemboja pe óga jojohuha rehe.

5Peẽ, Aaron ha ita’yrakuéra, pejapopáta pe óga jojohuha rembiapo ha peikuave’ẽta pe kuave’ẽmby renda ári, anivéma hag̃ua pende Ruete pochy ho’a jevy Israelguakuéra ári.

6Peikuaa porãke, Che voi aiporavo pene pehẽngue Leviguakuérape Israel ñemoñarenguéra apytégui, ha ame’ẽma ichupekuéra peẽme pende Ruete me’ẽmby ramo, oiko hag̃ua hikuái pende poguýpe ha ojapo hag̃ua hikuái pe tembiapo pe óga jojohuhápe pende Ruetépe g̃uarã.

7Nde, Aaron, ha nde ra’ykuéra peñangarekóta pendejehe pa’i rekoitépe opaite mba’e ojejapóva guive pe kuave’ẽmby rendápe ha óga jojohuha kotykuérape péva ningo pene rembiapo, Che ame’ẽma peẽme peiko hag̃ua pa’i ramo; oimeraẽ ndaha’éiva pa’i ha ojapo ramo pa’i rembiapo omanova’erã.

8Ñanderuete he’i Aarónpe: Eikuaa porãke, opaite kuave’ẽmby Israelguakuéra oguerúva chéve, ha ndojehapypáiva, Che ame’ẽ jevýta ndéve ha nde ra’ykuérape g̃uarã, ha péva opytáta peẽme g̃uarã peteĩ jopói ramo.

9Opaite kuave’ẽmbýgui, ndojehapýiva tatápe, Che ame’ẽta ndéve ha nde ra’ykuérape g̃uarã pene mba’e ramo, umía ha’e: kuave’ẽmby tembi’u reheguávagui, kuave’ẽmby angaipa reheguávagui, kuave’ẽmby ñemyengovia reheguávagui.

10Umi mba’e pe’uva’erã pe óga jojohuha oĩháme ha kuimba’énte ho’uva’erã; ko’ã mba’e oñemboykéma peẽme g̃uarã pene rembi’urã ramo.

11Ko’ã mba’e ne mba’erã avei: Opaite kuave’ẽmby oñemyatymoimbyréva Israelgua oikuave’ẽva chéve g̃uarã, Che ambohasáta ndéve, nde ra’y ha nde rajykuérape g̃uarã, mayma ipotĩvá guive nde rógape ho’ukuaa ichugui, kóva peteĩ tembiapoukapy opaite árape g̃uarã.

12Che ame’ẽ avei ndéve umi mba’e ypykue ojeporavopyréva ijacéitegui, iparral rykuégui ha itrígogui.

13Opaite yva ypykue Israelguakuéra oguerúva pe óga jojohuhápe, ambohasáta ndéve ha opaite nde rogaygua ipotĩva ikatu ho’u ichugui.

14Opaite mba’e oñemboykéva guive chéve g̃uarã ambohasáta ndéve ne mba’erã ramo.

15Umi mitã onace ypýva isy retepy ryru rapégui, taha’e kuimba’e térã kuña, oñekuave’ẽta chéve, ne mba’erã; kuimba’e ra’y ypykue ha umi tymba ipotĩ’ỹva ra’y ypykue, ha’ekuéra tojogua jevy ndehegui.

16Ha’ekuéra ojogua jevyva’erã ita’ýra ypykue ombotývo peteĩ jasy; ita’ýra repyrã 5 síclo (=92 grámo óro morotĩ) pe síclo ojeporúva pe óga jojohuhápe oguereko 20 géra.

17Ha vakara’y ypykue, ovechara’y ypykue ha kavarara’y ypykue katu ha’ekuéra ndikatúi ojogua jevy ndehegui, umía oñemboykeva’erã pende Ruetépe g̃uarã; huguykuépe rehypyiva’erã kuave’ẽmby renda tápia rehe, ha ikyrakue rehapyva’erã kuave’ẽmby hendýva hyakuã asy hag̃ua pende Ruetépe g̃uarã.

18Ho’okue ne mba’erã, ipyti’akue oñekuave’ẽta kuave’ẽmby oñemyatymoimbyréva ramo ha ipaléta akatúa ne mba’erã avei.

19Opaite ko’ã kuave’ẽmby (ha’émava’ekue) Israel ñemoñarenguéra oikuave’ẽva pende Ruetépe ame’ẽmbáta ndéve, nde ra’y ha nde rajykuérape opaite árape; kóa peteĩ ñe’ẽme’ẽ juky reheguáva opaite árape pende Ruete ha ne ñemoñarenguérape g̃uarã.

20Ha Ñanderuete he’i Aarónpe: Israel retãme nde ndererekomo’ãi nde yvy lóte, ambuekuéra oguereko háicha, ijapytepekuéra ndereguerekomo’ãi nde yvy lóte. Che voi ningo ne mba’e repy, Israel ñemoñarenguéra apytépe.

21Eikuaa porãke, Che ambohasa Levi ñemoñarenguérape opaite diézmo Israelguakuéra ome’ẽtava chéve, ha hembiapo repyrã ojejapova’erãva rehe pe óga jojohuha.

22Upévare ambue Israel ñemoñarenguéra noñembojáiva’erã pe óga jojohuha rehe, ani hag̃ua ogueraha ijehekuéra pe angaipa ha upévagui omano hikuái.

23Leviguakuéra katu ojapóta pe óga jojohuha rembiapo ha ha’ekuéra ogueraháta ijehe hi’angaipa avei; kóva peteĩ tembiapoukapy opaite árape g̃uarã pene ñemoñarenguérape g̃uarã: Leviguakuéra ndoguerekoiva’erã yvy lóte Israel ñemoñarenguéra apytépe.

24Ambohaságui Leviguakuérape umi diézmo Israel ñemoñarenguéra oikuave’ẽva chéve ime’ẽmby ramo; upévagui ha’e ichupekuéra: Israel ñemoñarenguéra apytépe ndaperekoiva’erã pende yvy (lóte).

25Ha Ñanderuete oñe’ẽ Moiséspe, ha he’i:

26Péicha reñe’ẽta Leviguakuérape ha eréta ichupekuéra: Perecibi rire Israel ñemoñarenguéra kuave’ẽmby, umía Che ambohasa peẽme pene me’ẽmby ramo, peẽ peme’ẽ jevyva’erã katu, pene diézmorã pende Ruetépe, kuave’ẽmby oñemyatymoimbyréva ramo.

27Ha pene kuave’ẽmby, ojererekóta peẽme ha’e ramoguáicha pende trígo, ha pende parral rykue pyahu kuave’ẽmby ambue Israelguakuéra oikuave’ẽ háicha avei.

28Péicha peẽ avei peikuave’ẽta pende Ruetépe pende diézmorã opaite mba’e Israel ñemoñarenguéra oikuave’ẽva guive chéve g̃uarã, ha pende diézmo pende Ruetépe g̃uarã pembohasáta Aarónpe, pene kuave’ẽmby ramo.

29Opaite kuave’ẽmbýgui Israelguakuéra ome’ẽtava pende Ruetépe, peẽ peiporavóta umi mba’e iporãvéva ha ko’ã mba’égui peme’ẽ jevýta pene diezmorã.

30Ha eréta ichupekuéra: Peikuave’ẽvo pe iporãvéva, ojererekóta ha’e ramoguáicha pende kóga’a ha pende parral rykuere,

31peẽ ha pende rogaygua pe’ukuaa peimeháme, péva hína pene rembiapo repykue pejapóva pe óga jojohuhápe.

32Peikuave’ẽ jevy ramo iporãvéva napeñemoangaipái ha napemongy’amo’ãi Israel ñemoñarenguéra kuave’ẽmbykuéra ha upéicharamo napemanomo’ãi.