1Pe ára 21-hápe, pe jasy 7-hápe Ñanderuete ñe’ẽ ou proféta Hagéope ha he’i:
2Ko’ág̃a eñe’ẽ Zorobabel, Sealtiel ra’ýpe, oikóva Juda retã ruvicha ramo, ha pa’iguasu Josuépe, Josadac ra’y, ha tetãyguakuéra hembývape, ha ere:
3Mávapa hemby gueteri pende apytépe ohechamava’ekue pe óga mimbi ypykuépe, ha mba’eichaitépa pehechapeína kóva mba’eve ramoguáicha pende resa renondépe.
4Ha ág̃a Zorobabel eñeha’ãmbaitéke, he’i pende Ruete; eñeha’ãmbaitéke avei Josue, pa’iguasu, ha peñemokyre’ỹ joaitéke tetãyguakuéra maymáva, ha pemba’apo porãke; he’i pende Ruete; Che, ángel atykuéra Jára, aĩgui penendive.
5Che ame’ẽmava’ekue peẽme che ñe’ẽ pesẽ ramoguare Egíptogui, péva oikóta gueteri, che Pytu Porãitéva oĩ jevýta pende apytépe, upévare ani pekyhyje.
6Péicha he’ígui pende Ruete: Ndahi’aremo’ãvéima Che amboryryipáta pe yvy ha yvagakuéra, pe yguasu ha pe yvy ikãva,
7ha Che amokyre’ỹta opaite tetãyguápe ogueru hag̃ua imba’erepy oñemyenyhẽ hag̃ua ko óga kóvape imimbietágui, he’i ángel atykuéra Jára.
8Che mba’e voi pe pláta, ha che mba’e pe óro avei, he’i ángel atykuéra Jára.
9Ko óga kóva iporãvéta pe tenondeveguarégui, he’i ángel atykuéra Jára; ha che py’aguapy oĩta ko’ápe, he’i ángel atykuéra Jára.
Ñanderueteoavisa tetãyguakuéra ojerovia porã’ỹvape10Pe ára 24-hápe, pe jasy 9-hápe, pe áño mokõiháme Darío oisãmbyhy jave, Ñanderuete oñe’ẽ proféta Hagéope ha he’i:
11Eporandu ko’ág̃a pa’ikuérape pende Ruete rembiapoukapy rehe, ha ere:
12Peteĩ kuimba’e ogueraha ramo so’o oñemboykemava’ekue Ñanderuetépe, ijao ruguáipe, ha ijao ruguái ovevévo oja ramo pan rehe, térã hi’upyrã rehe, térã víno rehe, térã acéite rehe, térã oime haichagua tembi’u rehe, oñemboykeva’erã piko avei Ñanderuetépe. Ha umi pa’ikuéra ombohovái ha he’i: Nahániri.
13Ha he’i jevy Hagéo: Ha peteĩ kuimba’e oñemongy’ava’ekue opoko haguére te’õngue rehe ha upéi ha’e opoko oimeraẽva ambue mba’e rehe, iky’átapa avei umía. Ha pa’ikuéra ombohovái ha he’i: Iky’áta.
14Ha ombohovái Hagéo he’ívo: Peichaite ko tetã kóva ha ko’ã tapicha che renondépe, he’iuka Ñanderuete, ha peichaite avei opaite tembiapo ojapóva guive, ha opaite mba’e ko’ápe oikuave’ẽva guive iky’a avei.
15Ha ág̃a pejepy’amongeta porã pende py’apýpe ko ára kóva guive ñane renonderãme oñemopu’ã mboyve ita ojo’ári Ñanderuete rogaguasúpe g̃uarã.
16Mba’e piko ojehuva’ekue ko’ã mba’e mboyve, peẽ pehórõ peguenohẽ hag̃uáicha 20 kambuchi henyhẽtéva trígogui pejohúnte 10 henyhẽva, ha pehórõ pe víno ojehykue’oha oĩháme peguenohẽ hag̃uáicha 50 kambuchi henyhẽtéva, pejohúnte 20 kambuchi henyhẽvante.
17Che voi poinupã yvytu aku vai rupi oúva kuarahyresẽguio, kui’ĩ hũ ha amandáu rupi ambyai hag̃ua opaite pende kokue rembiapokue, ha upeichavéramojepe ndapejevýi che rendápe, he’i pende Ruete.
18Ko’ág̃a katu pema’ẽ porãke ko ára kóva guive ñane renonderãme, ha upéi pe ára 24-hápe, pe jasy 9-ha guive oñepyrũmagui oñemopu’ã jevy hag̃ua Ñanderuete rogaguasu.
19Pema’ẽ porãke temitỹ ra’ỹinguéra rehe oñeñongatúva gueteri hendápe. Pe parral, pe hígo, pe granáda ha pe olívo ne’ĩra gueteri ipoty, Che katu ko ára guive amboheta porã jevýta pende koga’akuéra.
Ñanderuete ñe’ẽ Zorobabélpe20Ñanderuete ñe’ẽ ou jevy Hagéope, pe ára 24-hápe, pe jasy 9-hápe ha he’i:
21Eñe’ẽ Zorobabélpe, Juda retã ruvicha, ha ere ichupe: Che amboryryipáta yvagakuéra ha yvy.
22Che aitýta ambue tetã ruvichakuéra iguapyhaguasúgui ha ahundipáta ambue tetãnguéra pu’aka, amboapajeréivo icarrokuéra ha umi ipype oĩvape, ikavajukuéra ha hi’arigua ho’apáta, peteĩteĩ ojukáta ityke’ýrape kyse pukúpe.
23Upe ára upévape, he’i pende Ruete, rojapyhýta Zorobabel, Sealtiel ra’y, che rembiguaiteévape, Che aipota nde repyta Juda retã ruvicha ramo, Che voi roiporavóma, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
