Jeremías 46 - Biblia en Guaraní - ?anderuete ?e’? Por? 2015

Nabucodonosor ombopoguy Egiptoyguakuérape

1Ñanderuete ombohasa ko ñe’ẽ kóva Jeremías rupi hetãyguakuérape:

2Ko ñe’ẽ Ñanderuete he’i Egípto rehe: Faraon Néco, Egípto retã ruvicha rehe, ha’e oĩ jave Éufrates ysyry rembe’ýpe, Cárquemispe, ha Nabucodonosor, Babilónia retã ruvicha, ombopoguy rire ichupe, ha Juda retã ruvicha Joacim, Josías ra’y, oisãmbyhy aja irundy áño hetãme.

3Pembosako’i soldádo rete mo’ãha michĩ ha tuicháva, ha peju ñorãirõháme.

4Pemboapéro pende kavajukuéra ha pejupi hi’ári, ha pemoĩ pene akã mo’ãha; pemopotĩ pende yvyra puku akua, pemonde pene kamisa hierroguiguáva.

5Mba’épa ahecha, kyhyjepópe oguevipa hikuái, ipy’aguasuvéva ipy’a tarovapa, ha okañy joa hikuái ojere’ỹre ha noma’éi hapykuere rehe, opáguio rei oĩ kyhyje, he’i Ñanderuete.

6Pe iñakuãvéva jepe nokañymo’ãi ha pe ipy’aguasuvéva ndoikovemo’ãi; yvate gotýo, Éufrates rembe’ýpe oñepysãnga ha ho’apáta hikuái.

7Máva piko pe ojupíva Nílo ysyryguasúicha ha omongu’e hetápe.

8Egípto ojogua pe ysyry ipévape, ha oku’e pe ysyryguasúicha, ha upévagui ningo he’i: Aháta, añu’ã hag̃ua pe yvy, ambopoguy peve umi táva ha umi oikóva guive ipype.

9Peñemotenondéke kavaju ha pembopya’e carrokuéra, ha tosẽ joa umi ipy’aguasúva; umi Etiopiaygua ha umi Putgua ojapyhy hete mo’ãha, ha umi Ludgua ojapyhy ha oipysóma iguyrapa.

10Ha upe ára upévape Ñanderuete pe yvága atykuéra jára omyengoviáta hese ija’e’ỹva rembiapo vai; ha pe kyse puku oporohundíta ikuerái peve, oka’u peve huguykuéguio, umía ningo kuave’ẽmby Ñanderuete, Yvága Atykuéra Járape g̃uarã, péva oikóta Babilóniape, Éufrates ysyry rembe’ýpe.

11Peẽ Egíptoygua, tapeho Galaad yvýpe pohã rekávo, ág̃a peñepohãno reíta katu, napenepohãvéimagui.

12Tetãnguéra ohendúma pe ñemotĩ peẽ pehasáva, ha pende sapukái omyenyhẽ ko yvy; pe ipy’aguasúva oñepysãngágui ambue ipy’aguasúva rehe, ha mokõivéva ho’a oñondive.

13Ko ñe’ẽ Ñanderuete he’iva’ekue proféta Jeremíaspe, Nabucodonosor, Babilónia retã ruvicha oho ramoguare ojeity hag̃ua Egípto retã ári:

14Emyasãi Egíptope, ha eikuaauka Migdólpe; ha eikuaauka avei Ménfis ha Táfnespe, ha ere: Eñembo’y ha eñembosako’i, pe kyse puku ho’utahína ha’ekuéra oĩháme.

15Mba’éguipa ho’ára’e umi ipy’aguasuvéva. Ndaikatúi opyta ñembo’yhápe, Ñanderuete oitýgui ichupekuéra yvýre.

16Oñemboheta hetave umi ho’ava’ekue, ha peteĩteĩ ho’a iñirũ ári; upévagui he’i hikuái: Ñapu’ã jaha jevy hag̃ua ñane retãme, pe yvy ñanereñói haguépe ñakañy hag̃ua pe kyse puku ipu’akávagui, ỹrõ ñanehundipáta.

17Ha upépe osapukái hikuái: Faraon, Egípto retã ruvicha peteĩ mba’e pu pararã rei; oheja ohasa pe ára aty oñemoĩmava’ekue ichupe.

18Che rekove rehe, he’i Tetã Ruvichaguasuvéva, héra, Yvága Atykuéra Jára, ku cérro Tabor ijyvatevéva cerrokuéra apytégui, ha pe Carmel oñemopu’ã háicha yguasu rembe’ýpe, péicha Nabucodonosor katuete opu’ãta nderehe, faraon.

19Peẽ Egiptoygua pembosako’íke jepokuapyha aorã; Ménfis itaperétagui, ojehapýta ha avave ndoikomo’ãvéima ipype.

20Egípto ojogua peteĩ vaquillóna iporãvape, yvatéguio katu ouhína ihundiharã.

21Ijapytépe oĩ umi pirapire repy rehe oñorãirõva ha ojogua tóro ra’yrusu kyrápe; ha’ekuéra avei oguevi ñorãirõgui, okañymba hikuái opyta’ỹre avave, ipo’a’ỹha ára oúma hi’arikuéra ha ijehaviraha ára ohupitýma ichupekuéra.

22Iñe’ẽ hyapúta mbói chinícha; oúgui umi ojeityséva hi’ári, ha hácha reheve oúta hikuái ku jepe’a kytĩháraicha.

23Oikytĩ hikuái ika’aguykuéra, he’i Ñanderuete, ituichaiterei ramojepe og̃uahẽta tukúicha ojeity hag̃ua hi’arikuéra ha ndojepapakuaamo’ãi ichupekuéra.

24Otĩetéta Egiptoyguakuéra, ho’áta hikuái Babiloniayguakuéra poguýpe.

25Yvága Atykuéra Jára, Israel Jára, péicha he’i voi: Peikuaaa porãke, Che ahaviráta Amon, Tébas jára gua’úpe, faraon ha Egíptope, opaite ijára gua’ukuéra ha hetã ruvichakuérape; ha opaite umi ojeroviávape faraon rehe.

26Ha amoĩta ichupekuéra ijukahára pópe: Nabucodonosor, Babilónia retã ruvicha, ha hembiguaikuéra pópe; uperire katu Egípto oñemopu’ã jevýta ymaguaréicha, he’i pende Ruete.

27Ha nde Jacóbo, che rembiguaitee, ani rekyhyje, nde Israel, ani ndepy’akangy; eikuaa porãke Che rosalvataha pe tetã mombyryeteguágui, nde reikohápe tembiguái ramo, nde reju jevýta, ndepy’aguapy jevýta ha nde repytu’u jevýta avei ha ndaiporimo’ãvéima avave nemongyhyjétava.

28Nde, Jacóbo, che rembiguaitee, ani rekyhyje, he’i pende Ruete, Che aĩgui nendive; ahundipátagui umi tetã Che pomosarambi haguérupi; ha ndéve norohundietemo’ãi; Che rohaviráta hekoitépe katu ha ndorohejamo’ãi jehavira’ỹre.