Apostolkuéra 26 - Biblia en Guaraní - ?anderuete ?e’? Por? 2015

Páblo oñe’ẽ Agrípa renondépe

1Upérõ Agrípa he’i Páblope: Páblo, nde ikatu reñe’ẽ ndejehe. Upévo Páblo ohupi ipo, ha he’i:

2Avy’aite ikatuha rehe añe’ẽ ne renondépe, mburuvicha Agrípa, amboyke hag̃ua opaite mba’e Judayguakuéra ombojáva cherehe ñe’ẽ rei rupi.

3Nde ningo reikuaa porã opaite Judayguakuéra jepokuaa ha umi mba’e oñoñe’ẽjoapívare, upévare che ajerure ndéve ejapysaka py’aporã reheve che ha’étava rehe.

4Che aikove che mitãrusu guive Jerusalénpe, opaite Judayguakuéra oikuaa porã háicha.

5Ha’ekuéra oikuaa porã che rekove ha oikuaa avei che aike hague fariseokuéra apytépe, pe jerovia rape ipohyivéva Judayguakuéra apytépe.

6Ha pe promésa rehehápe Ñanderuete ome’ẽmava’ekue ñande rukuérape, Judayguakuéra okaguái cherehe, ha péva ningo ha’e: Ñanderuete omoingove jevytaha opaite omanova’ekuépe. Ko promésa kóva rehe heta Judayguakuéra oipota Romayguakuéra chembojovake amano hag̃ua.

7Ha opaite ñande 12 tríbu, Israel retã meguágui, oservi porã Ñanderuetépe ára ha pyharekuépe ohupity hag̃ua ko tekove tapia g̃uarãva, ha ko mba’e, che ruvicha Agrípa, oha’ãrõ avei ohupity hag̃ua, ha upévare Judayguakuéra oñe’ẽvai cherehe.

8Mba’érehe piko peẽ ndapejeroviái Ñanderuete omoingove jevytaha umi omanova’ekuépe.

9Che voi añemoĩva’ekue avei ko Hesu Nazaretgua rehe.

10Ha péva che ajapova’ekue avei Jerusalénpe, ha pa’iguasukuéra rupi amoingeukava’ekue cárcelpe heta ojeroviávape Hesu Crísto rehe. Ha ojejuka ramo guare ichupekuéra, che voi amboaje avei umi tembiapo.

11Ha opaite Ñanderuete rogakuérape oĩva Jerusalénpe che ajopy vai ichupekuéra oñe’ẽvai hag̃ua Ijára Hesu Crísto rehe, ha pochyhápe apersegui ichupekuéra ambue tavakuéra peve.

12Ha upevarã che ahava’ekue avei Damásco gotýo, pa’iguasukuéra permíso ha ikuatiañe’ẽ reheve.

13Asaje pytévo katu, che ruvicha Agrípa, ahecha tapére yvága resape imbaretevéva kuarahy resapégui, cheaho’ipáva ha che irũnguérape avei.

14Ore ro’apa rire yvýre, ahendu peteĩ oñe’ẽva hebréo ñe’ẽme ha he’íva chéve: Sáulo, Sáulo, mba’érehe piko nde chepersegui. Hasyeteva’erã ndéve nde repyvoírõ popiã rehe.

15Upévo che aporandu: Máva piko nde, karai. Ha pe oñe’ẽva chéve he’i: Che ningo Hesu, pe nde reperseguíva reikóvo.

16Epu’ã katu, eñembo’y, che ajehechauka ndéve nde remyasãi hag̃ua che ñe’ẽ ha repyta hag̃ua che rechahare ramo ko’ág̃a ha umi ambue mba’e ojehechaukátava gueteri ndéve.

17Che rosalváta ko tetã kóvagui, ha avei umi tetã ambueyguakuéragui, Che romondótava rupi ko’ág̃a.

18Rehesape’a hag̃ua ichupekuéra ha osẽ hag̃ua hikuái pytũgui oike hag̃ua tesape rendýpe, ha opoi hag̃ua hikuái Satanágui oñemboja hag̃ua Ñanderuete rehe, ha oñeperdona hag̃ua hembiapo vai, ha oñembyaty hag̃ua Hesu Crísto iglésiape, ojeroviágui hikuái Hesu Crísto rehe.

19Upévare, che ruvicha Agrípa, cheñe’ẽrendu Hesu Crístope, pe ojehechaukava’ekue chéve.

20Amombe’u hag̃ua Damáscope raẽ, ha upéi Jerusalenguakuéra ha Judayguakuérape, ha tetã ambueyguakuérape avei, tojevy Ñanderuete rendápe, ha tojapo tembiapo iporãva, ohechauka hag̃ua añetehápe oñemoambuemaha hekove,

21upévare Judayguakuéra chejapyhy Ñanderuete rogaguasúpe ha chejukamo’ã.

22Ñanderuete oñangareko ha chepytyvõ porã haguére che aikove gueteri ko’ág̃a peve, ha che añembo’y amombe’u hag̃ua umi mba’e ojehechaukava’ekue chéve michĩva ha tuichávape. Añe’ẽvo amombe’u hekópe umi mba’e Moises ha umi proféta he’imava’ekue ojehuva’erãha Hesu Crísto rupi.

23Ha’ekuéra voi he’imava’ekue Hesu Crísto ohasa asytaha, ha omano rire oikove jevytaha, ogueru hag̃ua pe tesape Israelguakuérape ha tetã ambueyguakuérape avei.

24Páblo he’ipa rire ko’ã mba’e ijehe, Fésto oñe’ẽ hatã: Páblo, ndetarova ningo, nde reitypekaitereígui Ñanderuete kuatiañe’ẽme nembotarováma peve.

25Páblo katu ombohovái: Ndachetarovái, nde che ruvicha Fésto, amombe’u’aína uvei pe añetegua ha che akã porãguinte añe’ẽ.

26Mburuvicha Agrípa, nde ningo, chéverõ g̃uarã, reikuaa porãmba voi ko’ã mba’e ko’ãva, upévare che añe’ẽ avei py’aguapýpe ne renondépe, ko’ã mba’e katuete ojehúgui Jerusalénpe.

27Reguerovia piko mburuvicha Agrípa ñande proféta he’imava’ekuére. Chéverõ g̃uarã nde reguerovia.

28Upévo Agrípa ombohovái Páblope: Ne ñe’ẽ porã rupi, nde rejapomo’ã chehegui avei peteĩ Hesu Crísto rehe ojeroviáva.

29Páblo katu he’i ichupe: Che añembo’e’aína Ñanderuetépe, pya’e térã mbeguépe, nandeañói (rejerovia hag̃ua Hesu Crísto rehe), opaite ko’ág̃a cherendúva guive avei, toiko che aiko háicha, ko cadena’ỹre uvei.

30Upérõ pe mburuvicha Agrípa, pe mburuvicha Fésto ha Agrípa rembireko Bereníce opu’ã,

31oñemoha’eño hikuái oñemongeta ha he’i oñondive: Mba’evete ivaíva ndojapói ko kuimba’e kóva ojejukauka hag̃ua térã opytave hag̃ua jepe cárcelpe.

32Upémaramo Agrípa he’i Féstope: Ojepoiva’erãmo’ã ichugui, ha’e voi ndojeruréi rire Róma retã ruvichaguasu ombojovake hag̃ua ichupe.