1Filisteayguakuéra ombyaty isoldádo aty ñorãirõrãme, ha oñembyaty Socópe, upéva opyta Juda retãme, ha opyta hikuái Soco ha Azeca pa’ũme Efes-damímpe.
2Saul ha Israel kuimba’ekuéra oñembyaty avei terebínto (yvyra) cerrokuéra pa’ũme (vállepe), ha oñemoĩ ojeity hag̃uáicha Filisteayguakuéra ári.
3Filisteayguakuéra opyta peteĩ cérro ári ha Israel ambue cérro ári, ha ipa’ũmekuéra oĩ peteĩ ñu.
4Upéramo Filisteayguakuéra atýgui osẽ peteĩ kuimba’e ijyvateitereíva, hérava Goliat, peteĩ Gatgua, ha ijyvatekue ohupity 2,86 métro.
5Ha iñakã rehe ogueru peteĩ akã mo’ãha bronceguiguáva, ha hete rehe omonde peteĩ pyti’a mo’ãha ojejapova’ekue 55,85 kílo bróncegui.
6 Brónce omo’ã avei hetyma, ha ijyvyra mbyky akua bronceguiguáva (lánza mbyky) ogueraha avei ijati’y rehe.
7Ijyvyra puku hakuáva ojogua ao pyahaha yvyra apu’ápe, ha ijapýra (ipúnta) oguereko 6,7 kílo hiérro ha henonderãme oguata imo’ãha.
8Ha Goliat oñembo’y ha osapukái Israelgua atýpe he’ívo: Mba’upéiko peñembosako’ipa peñorãirõ hag̃uáicha. Ndachéipa Filisteaygua ha peẽ Saul rembiguái. Peiporavo pende apytégui peteĩ kuimba’e ouva’erãva oñorãirõ hag̃ua chendive.
9Ha ha’e ikatu ramo oñorãirõ chendive, ha ipu’aka ramo cherehe, ore roikopaitéta pene rembiguái ramo; ha chekatupyryve ramo ichugui ha chepu’aka ramo hese, peẽ peikóta ore rembiguái ramo.
10Ha Goliat he’ive: Ko árape che añembohorýma Israel ñorãirõhára aty rehe. Pemoĩ chéve peteĩ kuimba’e oñorãirõséva chendive.
11Saul ha mayma Israelgua ohendúvo pe Filisteaygua ñe’ẽ, oñemondýi ha okyhyjeiterei,
12David peteĩ kuimba’e Efrataygua, itúva Isai, peteĩ Belengua, oikóva Juda retãme, ha’e ningo 8 ita’ýrava, ha itujáma, Saul árape.
13Ha mbohapy Isai ra’y itujavéva oĩ avei Saul ndive pe ñorãirõme. Ko’ãva oñembohéra: Eliab, ita’ýra ypykue, pe mokõiha Abinadab, ha pe mbohapyha Sama;
14David katu pe ipahague, ha mbohapy itujavéva oho Saul rapykuéri.
15Saul katu sapy’apy’a oheja Davídpe, oho hag̃ua oñangareko itúva ovechakuéra rehe Belénpe.
16Ha Goliat ou jepi pyhareve ha ka’aru, ha péicha ohasa 40 ára pukukue.
17Ha Isai he’i ita’ýra Davídpe: Kóina 22 lítro mba’e ra’ỹi mbichypyre ha 10 pan, eraha pya’e amo ñembyatyhápe nde ryke’ykuérape g̃uarã.
18Ha ã 10 kesu ipyahúva eraha pe mburuvicha 1000 ariguávape g̃uarã, ha ema’ẽke ne pehẽnguekuéra rehe oĩ porãmbápa, ha egueru ichuguikuéra peteĩ imba’eteéva, (che aikuaa hag̃ua oikoveha gueteri hikuái).
19Saul ha David ryke’ykuéra, ha mayma Israelgua oĩmba oñorãirõ hag̃ua Filisteayguakuéra ndive cerrokuéra pa’ũme (vállepe), oĩháme heta terebínto máta.
20Upéicha David opu’ã pyharevete ha oheja umi ovecha ambuépe oñangareko hag̃ua, ha oho heta mba’e reheve itúva he’i haguéicha; ha ha’e og̃uahẽ pe atyguasúpe, oñembosako’i jave hikuái ojeity hag̃ua ojo’ári ha oiko ñorãirõ sapukaiguasu.
21Upérõ Israel ha Filisteayguakuéra oñemoĩ ojovái ojeity hag̃uáicha ojo’ári.
22Upémaramo David oheja umi mba’e oguerúva umi ñorãirõhára ndive, oñangarekóva iñirũnguéra mba’ekuéra rehe oñorãirõ aja.
23Ha David oñe’ẽ aja hendivekuéra péina ou pe kuimba’e ijyvateitereíva, hérava Goliat, peteĩ Filisteaygua Gátgui osẽ Filisteaygua atýgui ha oñemoĩ umi mokõive aty pa’ũme, ha he’i jevy he’i haguéicha, ha David ohendupa.
24Israel kuimba’ekuéra ohecháva guive pe kuimba’épe okañy henondégui ha okyhyjeiterei hikuái ichugui.
25Ha mayma Israelgua he’i: Ndapehecháipa amo kuimba’e osẽva, ha’e oñemotenonde oñembohory hag̃ua Israel rehe. Upe ipu’akávape hese ñane retã ruvicha ome’ẽta mba’e repyeta ha itajýra, ha itúva rogayguakuéra nome’ẽmo’ãvéi impuésto tetã ruvichápe g̃uarã Israelguakuéra apytégui.
26Upémaramo David oñe’ẽ umi hendive oĩvape ha he’i: Mba’épa ojejapóta pe kuimba’e ipu’akátava ko Filisteaygua rehe, ha omboguéva ko ñemotĩ Israel retãgui. Máva piko ko Filisteaygua ipire’i oñekytĩ’o’ỹva oñemoĩ hag̃ua Ñanderuete oikovéva atyguasu rehe.
27Ha hetãyguakuéra he’i jevy ichupe ñe’ẽ oje’e hagueichaite ichupekuéra: Péicha ojejapóta upe kuimba’e rehe ipu’akáva hese.
28Ityke’ýra Eliab ohendúvo ichupe péicha oñe’ẽha umi kuimba’épe ipochyeterei David ndive ha he’i: Mba’erãiko ápe nde reju. Ha mávapepa reheja ñande ovecha mbovymi desiértope. Che aikuaa voi nde reñembotuichaseha nde py’apýpe, rejúnte rehecha hag̃ua pe ñorãirõ.
29David he’i jevy: Mba’éiko ajapo. Aporandúnte ningo aikuaa hag̃ua.
30Ha ojei ijypýgui ha oho ambue hapicha rendápe, ha omba’eporandu jevy oporandu haguéicha, ha hetãyguakuéra he’i jevýnte ichupe oje’e haguéichama voi ichupe.
31Oñemoherakuã David ñe’ẽ og̃uahẽ meve avei Saul rendápe; ha ha’e ohenoiuka ichupe.
32Ha David he’i Saúlpe: Anítei avave ipy’a kangy péva rupi; ne rembiguái ohóta ha oñorãirõta ko Filisteaygua ndive.
33Ha Saul he’i Davídpe: Ndaikatumo’ãi reho reñorãirõ hag̃ua pe Filisteaygua ndive, nde ningo ne mitã gueteri, ha’e katu kuimba’e oñorãirõkuaáva imitã guive.
34David he’i jevy Saúlpe: Ne rembiguái itúva ovecha rerekua; ha ou ramo peteĩ leõ térã peteĩ óso ogueraha hag̃ua peteĩ ovecha ore atýgui,
35che asẽ hapykuéri, ajuka ha anohẽ jevy ijurúgui; ha oñemoĩ ramo cherehe ajoko hañykãgui ha ainupã omano meve.
36Taha’e leõ, térã óso ne rembiguái ojuka; ha péicha ojehúta avei ko Filisteaygua ipire’i oñekytĩ’o’ỹvare, ha’e oñembohorýgui Ñanderuete Oikovéva ñorãirõharakuéra rehe.
37David ombojoapy iñe’ẽ: Ñanderuete cheguenohẽva’ekue leõ ha óso pyapẽ guýgui, Ha’e voi cheguenohẽta avei ko Filisteaygua pógui. Ha Saul he’i Davídpe: Tereho ha Ñanderuete toĩ nendive.
38Ha Saul omonde David rehe ijaokuéra ha omoĩ iñakã rehe Saul akã mo’ãha bronceguiguáva ha omonde hese hete mo’ãha.
39Ha David omosãingo iku’a rehe peteĩ kyse puku ijaokuéra ári, ha oha’ã oguatakuaátapa heseve. Ha David he’i Saúlpe: Ndaikatúi aguata ko’ã mba’e reheve, ndajepokuaái hesekuéra. Ha David oipe’a umi mba’e ijehegui.
40Ha ipópe ojapyhy ijyvyra po’i ha hi’ondíta ha oiporavo 5 ita isỹiva ysyry peguáva ha omoinge ivokópe oiporúva oñangareko aja itúva ovechakuéra rehe. Hi’ondíta ha ijyvyra po’i reheve oho pe Filisteaygua renda gotýo.
41Ha pe Filisteaygua oguata oúvo ha oñemoag̃ui David rehe, ha Goliat ndive oĩ peteĩ kuimba’e ogueraháva iñorãirõ rembiporukuéra.
42Ha pe Filisteaygua oma’ẽ David rehe ha ohechávo ha’e mitãrusu gueteriha nomomba’eiete ichupe, ha ipire pytãmi ha hova porã.
43Ha pe Filisteaygua he’i Davídpe: Che piko jagua mba’e, reju hag̃ua chéve yvyra po’i reheve. Ha omaldeci Davídpe ijarakuéra rérape.
44Upéi pe Filisteaygua he’i Davídpe: Eju katu ko’ápe ha tame’ẽ nde ro’o guyra yvate ovevévape, ha mymba ka’aguýre oikóvape.
45Upévo David he’i pe Filisteayguápe: Nde reju chéve kyse puku, yvyra puku ha yvyra mbyky akua reheve; che katu aju ndéve ore Ruete, yvága atykuéra Jára rérape, nde reñembohory hese reikóvo.
46Ore Ruete nemoĩta che pópe ko árape, chepu’akáta nderehe, che roakã’óta ko árape ha ame’ẽta guyra yvate ovevévape ha mymbakuéra yvy ariguápe Filisteaygua retekue hembi’urã ramo; ha yvy tuichakue javeve tojekuaa oĩha Israélpe, Ijára añeteteguáva.
47Ha péicha avei ko’ã tetãygua aty toikuaa avei ore Ruete noikotevẽiha kyse puku rehe, térã yvyra puku akua rehe; ore Ruete ningo ñorãirõ Jára voi ha Ha’e penemoĩta ore pópe.
48Ha ojehu pe Filisteaygua oñemongu’évo oguata ojeity hag̃uáicha David ári, David pya’e oñani oñorãirõ hag̃ua Filisteaygua ndive.
49Ha David omoinge ipo ivokópe ha oguenohẽ upégui peteĩ ita ha omoĩ hi’ondítape ha oha’ã rire, ojapíma katu Goliat syvaitépe, ha pe ita ojejakutu isyva rehe, ha Goliat ho’a ovapývo yvýpe.
50Péicha David ipu’aka pe Filisteaygua rehe oiporúvo hi’ondíta ha itánte. Péicha David ojuka Goliátpe oguereko’ỹre kyse puku ipópe.
51Upémaramo David oñani Filisteaygua rendápe ohekýi ikyse puku hyrúgui, ha ojukaite ichupe, oñakã’óvo.
52Upéi Israel ha Judaygua opu’ã oguerosapukáivo ha omuña Filisteayguakuérape og̃uahẽ meve pe ñu oĩva Ecron táva rokẽ renondépe. Ha Filisteayguakuéra ojekutu ha ojejapiva’ekue ojehecha Saaraim rape rehe Gat ha Ecron peve.
53Ha Israel ñemoñarenguéra ojevy Filisteaygua rapykuérigui ha oguerahapa Filisteaygua mba’eita ijatyha rendaguégui.
54Ha David ogueraha pe Filisteaygua akãngue Jerusalénpe, ha iñorãirõ rembiporu omoinge hóga rymba pirekueguiguápe.
55Saul ohechávo Davídpe mba’éichapa ha’e oho ojeity hag̃ua pe Filisteaygua ári, he’i Abner isoldádo ruvichápe: Abner, mávapa ko mitãrusu ru, ha Abner he’i ichupe:
56Ne ánga rekovére, tetã ruvicha, ndaikuaaiete. Ha pe tetã ruvicha he’i: Eporandu mávapa itúva.
57Ha David ojuka rire Filisteayguápe, Abner ogueru ichupe Saul rendápe, ha David oguereko ipópe Filisteaygua akãngue.
58Ha Saul he’i ichupe: Mitãrusu mávapa nde ru, ha David he’i ichupe: Che, ne rembiguái Isai, peteĩ Belengua ra’y.
Who We AreWhat We EelieveWhat We Do
2025 by iamachristian.org,Inc All rights reserved.
