1Ñanderuete ñe’ẽ ou Jeremíaspe, pe tetã ruvicha Sedequías omondo ramoguare hendápe Pasur, Malquías ra’ýpe, ha pe pa’i Sofonías, Maasías ra’ýpe, he’i hag̃ua hikuái ichupe:
2Emba’eporandu orerehe Ñanderuetépe, mba’épa ojehúta ñandéve Nabucodonosor, pe Babilónia retã ruvicha ojeity ramo oreári, ikatu piko Ñanderuete ohechauka ipu’aka tuichaitéva ha omosẽ Nabucodonosórpe ñane retãgui.
3Upéramo Jeremías he’i ichupekuéra: Péicha pejéta Sedequíaspe:
4Ñanderuete, Israel Jára, péicha he’i: Peikuaa porãke, Che voi ambojeréta tapykue gotýo pene ñorãirõ rembiporu peguerekóva pende pópe, umía reheve peñorãirõta Babilónia retã ruvicha ha umi Caldeaygua ndive oĩvahína pe táva korapy renondépe ha Che voi amoingéta ichupekuéra ko táva ryepýpe.
5Che voi añemoĩta penderehe, amopu’ãta che jyva mbarete pochypópe.
6Ha aikutúta umi oikóva guive ko távape, yvyarigua guive pene rymba peve, omanóta mba’asy vaiete rupi.
7Uperire Ñanderuete he’i: Ame’ẽta Sedequías, Juda retã ruvicha, ha hembiguaikuérape Nabucodonosor pópe, ha hendivekuéra opaite umi tetãygua hembýva guive pe mba’asy vaietégui, pe kyse pukúgui ha ñembyahýigui; umía ho’apáta Nabucodonosor, Babilónia retã ruvicha pópe, umi hesekuéra ija’e’ỹva pópe, ha ha’e oikutúta ichupekuéra kyse puku rãimbépe; ha noperdonamo’ãi ni ndoiporiahuverekomo’ãi ichupekuéra.
8Ha nde eréta ko tetã kóvape: Pema’ẽ porãke, he’i pende Ruete: Péina ápe amoĩ pene renondépe peiporavo hag̃ua pe tekove térã pe ñemano rape.
9Upe opytáva ko táva kóvape omanóta kyse pukúpe, ñembyahýi térã mba’asy vai rupi; upe osẽva katu ha ohóva umi Caldeaygua rendápe, ha’ekuéra penemongorapáma voi, upéva oikovéta ha oguenohẽta hekove ko jejopy vaietégui.
10Che rova amoĩma ko táva kóva rehe oiko hag̃ua mba’evai, ha ndaha’éi mba’eporã, he’iuka pende Ruete, upévare Jerusalen ho’áta avei Babilónia retã ruvicha pópe, ha tatápe ha’e ohapýta ko táva kóvape.
11Ha nde eréta Juda retã ruvichápe: Pehendúke Ñanderuete ñe’ẽ:
12David róga, ejapysaka Ñanderuete ñe’ẽ rehe: Embojovake hekoitépe, eguenohẽ pe mboriahúpe ijopyhára pógui ani hag̃ua che pochy osẽ tatáicha, ha hendy rire ndaiporivéima omboguekuaáva, pene rembiapo vaiete haguére.
13Ñanderuete he’i: Eikuaa porãke, Che apu’ãta nderehe, peẽ peikóva pe cerrokuéra pa’ũ rupi, ha peñembopy’aguapýva ko itaguasu ári pejévo: Máva piko ikatu ou oñemoĩ ñanderehe, ha mávapa oikéta ñande rogakuérape.
14Che pohaviráta, he’i pende Ruete, ha amyendyukáta tata ka’aguy rehe ombokusuguepa hag̃ua opaite mba’e oĩva guive ijerekuévo.
Who We AreWhat We EelieveWhat We Do
2025 by iamachristian.org,Inc All rights reserved.
