Filipoyguakuérape 3 - Biblia en Guaraní - ?anderuete ?e’? Por? 2015

Mba’éichapa jakakuaa ñande rekove Pytu Porãmbáva reheguápe

1Ha’eseve katu, pevy’áke Ñanderuete ndive. Che ahai jevy hag̃ua ko’ã mba’e ndaipohýiri chéve g̃uarã, ha peẽme g̃uarã iporãve (pehendu jevy ramo).

2Peñeñangarekóke umi tekove ky’águi (jaguágui), peñeñangarekóke umi mba’evai apoháragui, peñeñangarekóke umi oñekytĩ’o reívagui hete pire’i, (umi oñecircuncida reíva).

3Ñande ningo umi oñekytĩ’óva añetehápe, ñande jajeroviágui Ñanderuete Pytu Porãite rupi ha ñamomba’eguasúgui Hesu Crísto rembiapo porã ikurusureguare, ha ndajajeroviái kuimba’e rete rembiapóre, ojejapóva kuimba’e rete apérente.

4Che ajeroviase rire kuimba’e rete rembiapo rehe, che voi ajeroviaveva’erãmo’ã ambuekuéragui:

5Oñekytĩ’o che pire’i anace rire pe ára 8-hápe, che, Israel ñemoñare peteĩva, Benjamin tríbugui; che, hebreoteéva ha hebreokuéra ra’y, Israel rembiapoukapýpe g̃uarã che peteĩ fariséo,

6che voi cherakate’ỹgui ko yvyarigua rete rembiapo rehe apersegui Hesu Crísto iglesiayguakuérape jepe. Fariséo rekópe aiko hekoitépe, ha ndojejohúi mba’eve oje’evai hag̃ua cherehe.

7Che añeha’ãmba umi yvyarigua rete rembiapópe ha umía ambotuichaitereiva’ekue, ko’ág̃a katu ahechakuaa Hesu Crísto rehehápe péva ku mba’e ñembyaívaicha.

8Añetehápe ko’ág̃a ahechakuaa mba’evaiete ha yty (tepoti) ramo, ha iporã che amboyke ha amombo ytýpe ko’ã mba’e ko’ãva Hesu Crísto rayhupápe, ha avy’aite aikuaaháre Hesu Crísto che Jaraha,

9ha ko’ág̃a natekotevẽvéi añeha’ãmba che ajapo hag̃ua umi tembiapo porã che yvyarigua pu’aka rupi ahupity hag̃ua pe tekove tapia g̃uarãva, oñeme’ẽva uvei chéve Hesu Crísto rembiapo porã rupi ha ajeroviágui hese.

10Che aikuaa porãseve Hesu Crístope ha Ñanderuete pu’aka, omoingove jevyva’ekue Ita’ýra omanova’ekue apytégui, ha che amoirũ ichupe avei ijehasa asýpe, che ajoguave hag̃ua ichupe avei iñemanóme.

11Che aha’ãrõ ag̃uahẽ meve pe tekove tapia g̃uarãme, Ñanderuete chemoingove jevýne hag̃ua avei omanómava apytégui.

12Nda’eséi ag̃uahẽmaha hu’ã meve, ni che reko hekoitepemaha, añeha’ãmba katu ahupitypa peve, Hesu Crísto mborayhu cherupity ha chejokóguima.

13Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme.

14Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.

15Opaite ñande ñañeha’ãmbáva ñag̃uahẽ hag̃ua hu’ãme ñapensa porã ko’ã mba’ére. Ha oĩ ramo peteĩ mba’e nahesakã porãiva gueteri peẽme, Ñanderuete katuete omyesakãva’erã avei upe mba’e upéva.

16Umi mba’e jahupitymava’ekue, umívape jaguata porã jahávo oñondivekuéra.

17Che hermanokuéra, peñeha’ãmba avei orendive ñag̃uahẽ hag̃ua oñondive hu’ãme, ha pema’ẽ porã ore guata rohechaukáva rehe peẽme.

18Heta oĩ umi oguatámiva (Hesu Crísto rapére), ko’ág̃a katu che ha’e haguéicha heta jevýma peẽme, tesay reheve ha’eva’erã oñemoĩma Hesu Crísto kurusu rehe.

19Ipahápe katuete ha’ekuéra oñehundiva’erã, hye ningo ijára, ha’ekuéra oñembotuicha ramojepe, oiko ñemotĩme, ha’ekuéra opensánte umi mba’e yvy arigua rehe.

20Ñande rekoharã ningo oĩ yvágape, upégui ñaha’ãrõ avei ñane salvacion Ñandejára Hesu Crísto rupi.

21Ha’e voi ningo omoambuéta ñande rete poriahu ojogua hag̃ua hete ojajaipávape, ha ipu’akaguasu rupi ombopoguypáta umi oñemoĩvape hese, opytapa hag̃ua ipoguýpe opaite mba’e ojejapomava’ekue guive.