2 Samuel 3 - Biblia en Guaraní - ?anderuete ?e’? Por? 2015

1Saul rogayguakuéra ha David rogayguakuéra oñorãirõ are oñondive, David katu oñemombareteve ohóvo, Saul rogayguakuéra katu ikangyve ohóvo.

David ra’ykuéra onaceva’ekue Hebrónpe

2Ko’ã David ra’ykuéra onace Hebrónpe: Pe ijypykue Amnon, péva Ahinoam, Jizreelguágui;

3Pe mokõiha Quileab, péva Abigail memby, Nabal pe Carmelgua rembirekore; pe mbohapyha, Absalon, Maaca memby, péva Talmai, Gesur retã ruvicha rajy;

4Pe 4-ha Adonías, péva Hagit memby; pe 5-ha Sefatías, péva Abital memby;

5Pe 6-ha Itream, péva Egla memby; Egla avei David rembireko. Ko’ãva onaceva’ekue Davídpe g̃uarã, Hebrónpe.

Abner oñembopy’apeteĩ David ndive Hebrónpe

6Saul rogayguakuéra oñorãirõ aja David rogayguakuéra ndive, Abner oñeha’ãmbaite Saul rogayguakuéra rehehápe.

7Saul oguerekova’ekue peteĩ ikuña okára hérava Rispa, Aja membyre; ha Isboset he’i Abnérpe: Ma’erãiko reiko che ru kuñakue ndive.

8Ha Abner ipochyeterei Isboset he’iva’ekue rehe, ha he’i: Chéiko Judayguakuéra rymba jagua mba’e. Che aipytyvõ ko árape nde ru Saul rógape, ipehẽnguekuéra ha iñangirũnguérape, ha noromoĩrikuri David pópe. Ha ndépa reitýta cheári ko kuña kóva angaipa.

9Ñanderuete tachehavira, che Abner, naipytyvõi ramo ko ára guive Davídpe ha ajapopáta David rehehápe opaite mba’e Ñanderuete voi oprometeva’ekue guive he’ívo:

10Aitýta Saul ha iñemoñarenguéra Israel retã ruvicha guapyhágui ha amboguapýta Davídpe Israel ha Juda retã ruvicha guapyhápe, ha’e oisãmbyhy hag̃ua Dan guive Beerséba peve.

11Ha Isboset ndaikatúi ombohovaive Abnérpe, okyhyjégui ichugui.

12Upémaramo Abner omondo ñe’ẽ rerahahára David rendápe, he’iukávo ichupe: Máva mba’épa ko tetã. Ha he’iveva’erã avei ichupe: Eiko chendive peteĩ ñe’ẽme, ha che po oĩta nendive opaite Israel tríbu opyta hag̃ua nde poguýpe.

13Upérõ David he’iuka ichupe: Iporã, jaikóta peteĩ ñe’ẽme, peteĩ mba’e ajerure ndéve: Ani reju cherechávo regueru’ỹre chéve Mical, Saul rajýpe.

14Ko’ã mba’e rire David omondo ñe’ẽ rerahahára Isboset, Saul ra’y rendápe, ha he’iuka ichupe: Eme’ẽ jevy chéve che rembireko Mical, amendava’ekue hese 100 Filisteaygua pire’i rehe.

15Upémaramo Isboset oipe’auka Micálpe, iména Paltiel, Lais ra’ýgui.

16Ha iména oho hendive, hasẽ ohóvo hapykuéri Bahurim peve. Ha he’i ichupe Abner: Tereho, ha ejevy. Ha upémaramo ha’e ojevy.

17Ha Abner oñemongeta Israel karai ancianokuéra ndive, ha he’i: Heta árama peipota David oiko tetã ruvicha ramo pendeári.

18Ko’ág̃a pejapo katu avei Ñanderuete he’imava’ekue: Che rembiguái David po rupi asalváta che retã Israel Filisteaygua poguýgui, ha mayma hese ija’e’ỹva pógui.

19Abner oñe’ẽ avei Benjaminguakuérape; ha upéi ha’e voi oho Hebrónpe omombe’upa hag̃ua Davídpe Israelgua ha Benjamin rogayguakuéra opytaseha avei David poguýpe.

20Abner oúvo David rendápe Hebrónpe, ha 20 kuimba’e hendive; David ojapo karuguasu Abner ha hendive ouva’ekuépe g̃uarã.

21Ha Abner he’i Davídpe: Che apu’ãta ha aháta ambyaty hag̃ua che jára retã ruvichápe g̃uarã opaite Israelguakuérape, oiko hag̃ua hikuái nendive peteĩ ñe’ẽme ha nde reiko hag̃ua hetã ruvichaguasu ramo ha reisãmyhy hag̃ua nde py’apy oñandu háicha. Upéi David omondo Abnérpe, ha ha’e oho py’aguapýpe.

Joab ojuka Abnérpe

22Upéramo David rembiguaikuéra ojevy Joab ndive ñorãirõhágui ha ogueru hikuái hetaiterei mba’e oipe’amava’ekue hese ija’e’ỹvagui. Ha Abner noĩvéima David ndive Hebrónpe, omondómagui ichupe, ha ha’e oho py’aguapy reheve.

23Ha Joab og̃uahẽ rire opaite iñirũnguéra ndive oñemomarandu ichupe: Abner, Ner ra’y, oúkuri tetã ruvicha rendápe, ha ha’e omondo jevy ichupe, ha oho jevy py’aguapy reheve.

24Upéramo Joab ou tetã ruvicha rendápe ha he’i ichupe: Mba’éiko rejapóra’e. Péina, Abner ou ne rendápe. Ha mba’érehe piko reheja oho jevy.

25Nde reikuaa porã Abner, Ner ra’ýpe, oúnte nembotavy hag̃ua ha oikuaa hag̃uánte rejapóva guive.

26Ha Joab osẽ rire David rendágui, omondo ñemi ñe’ẽ rerahahára Abner rapykuéri, ha ogueru jevy ichupe Sira ykuágui, David oikuaa’ỹ rehe.

27Ha Abner og̃uahẽ jevývo Hebrónpe, Joab ogueraha ichupe táva rokẽguasu ryepýpe oñe’ẽ ñemíta ramoguáicha hendive; ha upépe ojuka ichupe, oikutúvo hyépe, péicha omyengovia hag̃ua ichupe ojuka haguére ityvýra Asaélpe.

28David oikuaávo ko’ã mba’e, he’i: Che ánga ipotĩ ha che retã avei, Abner, Ner ra’y ruguykuégui, Ñanderuete renondépe opaite árape.

29To’a Joab akã, ha mayma itúva rogayguakuéra ári, ha opaite ára Joab rogayguakuéra apytépe toĩ mba’asy, tuguy syry, ai ñarõ (lépra), heta toguata yvyra po’i rehe, tomano kyse pukúpe ha ñembyahýigui.

30Joab ha Abisai ojukágui Abnérpe, ha’e ojuka haguére Asael, ipehẽnguépe Gabaon ñorãirõháme.

31Upémaramo David he’i Joábpe ha mayma tetãygua hendive oĩvape: Pemondoro pende aokuéra, ha pemonde ao hũ ha peñemomba’embyasy Abner omano haguére. Ha pe tetã ruvicha David oho Abner re’õngue oĩháme (oñotỹ hag̃ua).

32Ha oñotỹ hikuái Abnérpe Hebrónpe; ha tetã ruvicha hatã ojahe’o Abner tyvy ypýpe; ha ojahe’o avei mayma tetãyguakuéra.

33Ha tetã ruvicha oñe’ẽ ñembyasývo Abner rehe, ha he’i: Mba’érehe piko Abner omano, tekove ñaña omano háicha.

34Nderejepokuái ni nderejepykuái cadénape; re’a ningo umi kuimba’e ñaña ho’a háicha. Ha opaite tetãyguakuéra oguerojahe’o jevy ichupe.

35Upéramo mayma tetãyguakuéra ou David rendápe ha he’i ichupe okaru hag̃ua, ohasa mboyve pe ára. David katu ome’ẽ iñe’ẽ he’ívo ichupekuéra: Ñanderuete tachehavira ha tombojo’ave avei, che ha’u ramo pan térã oimeraẽ mba’e oike mboyve pe kuarahy.

36Mayma tetãyguakuéra ohendúvo ko’ã mba’e oguerohory hikuái; ha tetã ruvicha ojapóva guive ho’a porã hetãyguakuéra resa renondépe.

37Ha mayma hetãyguakuéra ha Israelgua oikuaa porã pe árape, tetã ruvicha ndojukaukaiva’ekue Abner, Ner ra’ýpe.

38Ha tetã ruvicha he’i avei hembiguaikuérape: Ndapeikuaái piko peteĩ mburuvicha tuicháva ho’a hague ko árape Israel retãme.

39Ha chekangy gueteri ko árape, jepémo ajeporavóma tetã ruvicha ramo; ha ã kuimba’e, Sarvia membykuéra, chéve g̃uarã imbareteiterei; upévare Ñanderuete tomyengovia hembiapo vaikue, iñañaiterei haguére.