1Pevy’aitéke peẽ heko potĩva Ñanderuete ndive ha pemomba’eguasu ichupe pende purahéi rupi.
2Pemomba’eguasu Ñanderuetépe mbaraka púpe, pepurahéi avei ichupe árpa púpe.
3Pepurahéi ichupe purahéi pyahu, pembopu hatãkéna ha vy’apópe pene mba’epu.
4Opaite mba’e Ñanderuete he’íva guive añete, ha opaite mba’e ojaposéva guive ojapóta avei hekopete.
5Ha’e ohayhu justícia ha teko hekoite peguáva, Ñanderuete omyenyhẽ ko yvy iporiahuverekógui.
6Ñanderuete ñe’ẽ rupive ojejapova’ekue umi yvága, ha ijuru pytuhẽ rupive ojejapo opaite mba’e oĩva guive ipype.
7Ha’e ombyaty pe yguasu peteĩ tápiaicha, Ha’e oñongatu avei pe yeta yvy guýpe, oñeñongatu háicha pe y peteĩ kambuchípe.
8Tokyhyjéke Ñanderuetégui pe yvy tuichakue javeve, tokyhyjéke henondépe opavave yvy apére oikóva guive.
9Ñanderuete he’íva guive oiko, ha Ha’e ojaposéva guive ojapo avei katuete.
10Ñanderuete ombyaiva’ekue tetãnguéra pensamiénto, ha ojoko tetãnguéra rembiapo.
11Umi mba’e Ha’e ojaposéva katuete ojapo avei, hi’are ramojepe; ha umi mba’e ipy’apýpe heñóiva Ha’e ombohasahína ko’ag̃agua iñemoñarenguéra peve.
12Ovy’aite upe tetã omomba’eguasúva Ñanderuetépe Ijaratee ramo ha horyete pe tetã Ha’e oiporavomava’ekue imba’eteéva ramo.
13Yvága guive Ñanderuete oma’ẽ ha ohecha opaite kuimba’e ha kuñakuérape.
14Hekohágui Ha’e oma’ẽ opavave rehe, oikóva guive ko yvy apére.
15Ñanderuete ningo ñande py’apy apohare, upévare Ha’e oikuaa porã avei opaite ñane rembiaporã.
16 Soldádo atyguasu noipytyvõmo’ãi pe tetã ruvichápe osẽ porã hag̃ua ñorãirõguasúgui, ha pe ipy’aguasuetéva ndaikatúi ombopoguy hapichápe imbareteiterei ramojepe (Ñanderuete ndoipotái ramo).
17Oñembotavy upe tetã ruvicha ombopoguyséva ikavaju heta rupi hese ija’e’ỹvape, ha imbaretekue tuicha rupi nombopoguýi avavépe (Ñanderuete ndoipotái ramo).
18Peikuaa porã́ke, Ñanderuete resa oñangarekoha umi ichugui okyhyjéva rehe, umi ojeroviáva iporiahuvereko rehe.
19Umívape Ha’e oguenohẽta ñemanógui ha umívape Ha’e omongarúta ñembyahýi árape.
20Ñane ánga toha’ãrõ Ñanderuete ojapóva rehe, Ha’e ñanepytyvõta ha Ha’e ñanemo’ãta.
21Upéicha Ñanderuete ñanembopy’arory jajerovia porãgui héra porãite rehe.
22Nde poriahuvereko toĩ orendive, Nde, ore Ruete, ore rojeroviágui nderehe.
Who We AreWhat We EelieveWhat We Do
2025 by iamachristian.org,Inc All rights reserved.
