2 Samuel 7 - Biblia en Guaraní - ?anderuete ?e’? Por? 2015

Ñanderuete ome’ẽ iñe’ẽ Davídpe

1Pe tetã ruvicha oiko riréma hógape, Ñanderuete ome’ẽ ichupe pytu’u mayma hese ija’e’ỹvagui.

2Tetã ruvicha he’i proféta Natánpe: Ema’ẽmína, che aiko peteĩ óga yvyra cedroguiguávape ha Ñanderuete karameg̃ua oñemo’ã aosãingo kupépe.

3Ha Natan he’i tetã ruvichápe: Tereho katu, ha ejapo mayma oĩva nde py’apýpe, Ñanderuete oĩ nendive.

4Upe pyharépe katu Ñanderuete oñe’ẽ Natánpe, ha he’i ichupe:

5Tereho ha ere che rembiguái Davídpe: Péicha he’i pende Ruete: Nde piko remopu’ãse óga Che aiko hag̃ua.

6Añetehápe ndaikói ogapýpe, anohẽ guive Israel ñemoñarenguérape Egípto retãgui ko ára kóva peve, aikónte óga aoguiguápe pe karameg̃ua oĩháme.

7Ha aiko aja pukukue Israel ñemoñarenguéra ndive, Che piko ha’e ichupekuéra ha che retãygua oisãmbyhývape: Mba’érepa neremopu’ãi chéve óga cédro yvyraguiguáva.

8Ko’ág̃a, ere che rembiguái Davídpe: Péicha he’i pende Ruete: Che rojapyhýma ovecha atýgui, reiko hag̃ua Israel retã ruvicha ramo.

9Ha aĩ nendive mamo nde reikoha rupi, ha ne renondépe ahundipa mayma nderehe ija’e’ỹvape ha ambotuicha nde réra tetã ruvichaguasuetéicha.

10Ha Che amoĩta avei che retã Israélpe hendag̃uáme oiko hag̃ua imba’eteépe, araka’eve ndojererovamo’ãvéima, anivéma hag̃ua tekove ñaña oguereko asy ichupe, iñepyrũrõ guaréicha ha

11amoĩha ára guive mbojovakehára che retã Israel ári; ndéve katu ame’ẽta pytu’u umi nderehe ija’e’ỹvagui, upévare Che aikuaauka ndéve, Che amopu’ãtaha ndéve nde rogarã.

12Ha nde ára paha og̃uahẽvo rekéta (remanóta) nde rukuéra ndive, ha Che amopu’ãta nde rire peteĩ ne ñemoñaréva, osẽtava nde retégui,

13ha’e omopu’ãta che rérape g̃uarã peteĩ óga ha che amohenda porãta ichupe tapia g̃uarã Israel retã ruvicha guapyhápe.

14Chéta Itúva, ha ha’éta che ra’y, ha ha’e hembiapo vai ramo Che ainupãta ichupe kuimba’ekuéra yvyra po’ípe ha kuimba’e ra’ykuéra tukumbópe.

15Che poriahuvereko katu namboykemo’ãi ichugui, amboyke haguéicha Saúlgui, ha aipe’ava’ekue ichupe, romoĩ hag̃ua hendaguépe.

16Ha nde róga oñemoĩ hatãta ha reikóta ne retã ári mburuvichaguasu ramo ha ndojepe’amo’ãvéima ára pahaite peve ne mburuvicha reko.

17Ko’ã ñe’ẽ ha ko’ã techapáy (vision) oñeme’ẽ háicha ichupe, upeichaite Natan ombohasa jevy Davídpe.

18Upérõ tetã ruvicha David oike pe óga jojohuhápe ha oñemoĩ Ñanderuete renondépe, ha he’i: Ore Ruete, che Jaratee, mávapa che, ha mba’épa che rogayguakuéra, nde chereru hag̃ua ápeve.

19Ha jepevérõ, ha’eténte ndéve imichĩetereiha ko’ã mba’e Nde reñe’ẽ avei ne rembiguái rogaygua renonderã rehe. Péicha voi ningo pe mborayhu rerekóva yvy ariguakuéra ndive.

20Ha mba’épa David ikatu ombojoapyve oñe’ẽve hag̃ua nendive. Nde reikuaa porã voi ne rembiguáipe, che Jaratee.

21Ko’ã mba’eguasueta rejapóva ne ñe’ẽ rupi, ha nde py’a oñandu háicha, reikuaaukávo ko’ã mba’e ne rembiguáipe.

22Upéicha Nde, ore Ruete, ndetuicha tuichave rehóvo ndaipórigui Ndeichagua, ndaipórigui Jára añeteguáva ndaha’éi ramo Nde, rohendu háicha ore apysa rupi.

23Ha mávapa ojogua ne retã Israélpe, tetã ijojaha’ỹva yvy apére. Nde voi, ore Ruete, reiporavo Israélpe ne retã ramo ha reme’ẽ ichupe nde réra rejapo hag̃ua tuicha mba’e hesa renondépe, ha tembiapo iporãitéva ko yvy tuichakuépe, rehayhúgui ne retãme renohẽva’ekue Egíptogui ne mba’e ramo, ambue tetãnguéra apytégui ha ijára gua’úgui.

24Nde remoingo ne retã Israel, ne retã tee ramo opaite árape g̃uarã, ha Nde, che Jára, reiko ichupekuéra Ituvatee ramo.

25Ko’ágã, che Jára, emoañete opaite árape ne ñe’ẽ ereva’ekue ne rembiguái ha hogayguakuéra rehe, ha ejapo ere hagueichaite.

26Ha nde réra toñembotuichaite opaite árape, ha toje’e: Yvága atykuéra Jára oiko avei Israel Jára ramo; ha ne rembiguái David róga toiko opaite árape ne renondépe.

27Nde voi, yvága atykuéra Jára, ha Israel Jára, reikuaauka ne rembiguái apysápe, erévo: Che amopu’ãta nde rogarã. Ko’ã mba’e rupi ne rembiguái ojohu py’aguasu ipy’apýpe, ojerure hag̃ua ko’ã mba’e ne renondépe.

28Péina Nde voi ore Jára, ore Ruete, ha Nde remoañete ne ñe’ẽ, reprometégui ne rembiguáipe.

29Ajerure ndéve rehovasa hag̃ua ne rembiguái rogayguakuérape, oiko hag̃ua ne renondépe opaite árape, Nde voi erégui ore Rueteha, ha nde jehovasa rupi ne rembiguái róga ojehovasáta opaite árape.