Salmokuéra 28 - Biblia en Guaraní - ?anderuete ?e’? Por? 2015

Ñembo’e ojeruréva ñepytyvõ David purahéi

1Ndéve amba’ejerure asy, Nde, che Ruete. Che salvador (itaguasu), ani chemboyke kirirĩháme, Nde chereja rei ramo, che apytáta ku omanóvaicha.

2Ehendumína che ñembo’e amba’ejerure asy jave ndéve, ahupi jave che pokuéra nde rogaguasu gotýo.

3Ani chejapyhýtei umi iñañáva ha umi hembiapo vaíva ndive, ha umi ombojuru he’ẽva hapichápe ndive, ipy’apýpe katu ombotavysénte.

4Emyengovia hembiapo vaikue, ha tojehu jevy ichupekuéra ojapo hagueichaite.

5Ha’ekuéra noma’ẽséi Ñanderuete rembiapokue rehe ha ndohechaséi umi mba’e Ha’e ojapova’ekue, upévare Ñanderuete oitýta ichupekuéra ha araka’eve nomopu’ãmo’ãvéima ichupekuéra.

6Toñemomba’eguasu Ñanderuetépe, ohendu haguére che rembijerure.

7Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.

8Ñanderuete voi ningo omombarete hetãme, ha umi Ha’e oiporavóvape, Ha’e oñangarekóta avei.

9Eipytyvõmína ne retãme, ha ehovasamína ne retãyguakuérape, eñangarekomína hesekuéra ha eme’ẽ ichupekuéra hemikotevẽ opaite árape.