1Kóva ningo pe purahéi iporãvéva Salomon puraheikuéra apytégui.
2Kuñataĩ oñe’ẽ: Emboy’u che juru ñehetũ reheve, ne mborayhu iporãvégui vínogui.
3Ne mba’e ryakuã iporãite, nde réra ha’ete ku mba’e ryakuã porã asy oñeñohẽmbyrévaicha. Upévare umi kuñataĩ nderayhuete.
4Chererahána pya’e nde rapykuéri. Pe tetã ruvicha chemoinge ikotykuérape: Javy’aite ha ñandepy’a roryete hag̃ua. Ne mborayhu iporãve vínogui: Ndareíri ha’ekuéra nderayhu.
5Jerusalen rajykuéra, chekamba ramo jepe cheporã, ajepotaiterei ku Cedar pegua óga ao peguáicha, ku Salomon aosãingokuéraicha.
6Ani pema’ẽtei che pire hũngy rehe, pe kuarahy ojopeitereígui che rete. Che sy memby kuimba’ekuéra ipochýkuri chendive ha upévagui chemoĩ hikuái añangareko hag̃ua parralty rehe; máramo che ndaikatúi añangareko porã chejehe.
7Emombe’umína chéve, nde che ánga ohayhuetéva, moõpa remongarureína ne rymbakuérape, moõpa repytu’u asajekuépe; ha mba’érehe piko che aiko’arã roheka reívo ne irũnguéra rymba aty ypy rupi.
8Karia’y ombohovái: Ndereikuaái ramojepe, nde ningo pe iporãitevéva kuñakuéra apytépe, tereho ne rymba aty pypore rapykuéri ha emongaru nde kavara ra’ykuéra umi ovecha rerekua rekoha ypýpe.
Pe ména ha pe tembireko9Che rohayhuetéva rombojoja, ku jégua faraon cárro rehegua iporãvéva rehe.
10Iporãite nde rova’yke ne namichãinguéra reheve ha nde ajúra iporãite umi ajurigua ita veraguiguáva reheve.
11Namichãi oroguiguáva ajapoukáta ndéve g̃uarã campana’i plataguiguáva reheve.
12Kuñataĩ oñe’ẽ: Pe tetã ruvicha oguapy aja imesápe che mba’e ryakuã porãva oñemyasãi oparupiete.
13Che mborayhu jára, nde chéve g̃uarã peteĩ mba’e ryakuã porã asýva (mírra), opytu’úva che pyti’a mbytépe.
14Karia’y ombohovái: Che mborayhu jára, chéve g̃uarã nde ku alheña poty ryakuã asýicha Engadi parraltýpe.
15Che rohayhuete, nde kuñataĩ neporãmba jepéva. Nde resa ku pykasu resáicha.
16Kuñataĩ oñe’ẽ: Neporã avei che mborayhu jára, ndejuky avei, ñande rupa ojejapo kapi’i hovyũ porãvagui.
17Ñande róga víga ojejapo cédrogui, ha ñande róga tápia ciprésgui (pinoichaguágui).
Who We AreWhat We EelieveWhat We Do
2025 by iamachristian.org,Inc All rights reserved.
