Galaciayguakuérape 4 - Biblia en Guaraní - ?anderuete ?e’? Por? 2015

1Ko’ã mba’e ko’ãva rupi che ha’e: Peteĩ túva omano ramo, ita’ýra opyta peteĩ terekua poguýpe itúva he’imava’ekue peve, ha péva mboyve ita’ýra ndojuavýi peteĩ tembiguái oimeraẽvagui, ha’e ramojepe opaite mba’e jararã.

2Oĩ uvei herekua ha iñangarekohára poguýpe, upe ára itúva omoĩ hague peve.

3Upéicha avei ñande, ñanemitã ramoguare jaikomava’ekue Satana ha ñande yvyarigua reko vai poguýpe.

4Og̃uahẽvo pe ára Ñanderuete oiporavomava’ekue, Ha’e ombou Ita’ýra ko yvy apére, onaceva’ekue peteĩ kuñataĩ heko potĩvagui ha opytáva Moises rembiapoukapykuéra poguýpe.

5Ha’e ojogua hag̃ua umi opytávape ko’ã tembiapoukapy poguýpe ha oñeme’ẽ hag̃ua ñandéve pe derécho jaiko hag̃ua Ñanderuete ra’y ha itajýra ramo.

6Peẽ peikómagui ita’ýra ha itajýra ramo, Ñanderuete ombou Ita’ýra Pytu Porãite pende py’apýpe osapukáiva: Abba, he’iséva ore Ruete, (Romayguakuérape 8,15).

7Upévare ñande ndaha’evéima tembiguaikuéra, ñande ita’ýra ha itajýrama, ha ñande ita’ýra ha itajýra ramo oñeme’ẽta avei ñandéve ñane mba’erã Ñanderuete rupi.

8Ymave ningo ndapeikuaaiva’ekue Ñanderuetépe, ha peserviva’ekue umi jára gua’úpe.

9Ko’ág̃a katu peikuaáma Ñanderuetépe, iporãve katu ja’e Ñanderuete pendekuaaha, ha mba’eicharupípa péicha peikose jevy Satana ha pende yvyarigua reko vai poguýpe.

10Peẽ pemboarete jevýma arakuéra, jasy aretekuéra ha añokuéra (pejesalvase piko pene rembiapo rupi).

11Akyhyje amba’apo reihague pende apytépe penderehe.

12Che hermanokuéra, ajerure peẽme, peiko hag̃ua che aiko háicha ko’ág̃a, che aikomava’ekuégui avei peẽ peiko háicha; peẽ nachembopochýi mba’evépe.

13Peẽ ningo peikuaa voi, che rete hasy hague añepyrũ ramoguare amombe’u pende apytépe Ñanderuete ñe’ẽ porãite,

14ha che rete peporombojeguaru ramojepe, peẽ napeñemomombyrýi chehegui, napetĩri chehegui ni napendyvúi che renondépe, peẽ chemog̃uahẽ porã uvei ku Ñanderuete yvága remimondóicha, térã Hesu Crístoicha.

15Moõ piko opyta pende roryete peguerekova’ekue. Che aikuaa porã, ikatu rire peẽ penohẽva’erãmo’ã pende resa peme’ẽ hag̃ua chéve.

16Aikóma piko pende rehe ija’e’ỹva ramo, amombe’u haguére peẽme pe añetegua.

17Umi apóstol gua’u hakate’ỹ penderehe ha oñeha’ãmba peẽ pemoirũ hag̃ua ichupekuéra, ndaha’éi teko iporãvape g̃uarã, peiko hag̃ua uvei hembiguaikuéra ramo.

18Iporã ningo peẽ penerakate’ỹ opaite árape pe teko iporãvape g̃uarãre, ha anítei aime javénte penendive.

19Che ra’ykuéra ha che rajykuéra, cherasyete jevy penderehe peteĩ kuña imembyrõguáicha, Hesu Crísto reko ojehechakuaa peve avei pende rekovépe.

20Ko’ág̃a voi aimeseiterei pende apytépe ikatu hag̃ua che añe’ẽ peẽme ambue hendáicha, ndaikuaavéigui mba’épa ha’evéta peẽme.

21Peje chéve, peẽ peimeséva umi tembiapoukapykuéra poguýpe: Peẽ piko ndapeikuaái mba’épa pe tembiapoukapy he’i:

22Ñanderuete kuatiañe’ẽme ojehaíma voi: Abraham ita’ýra mokõi, peteĩ hembiguái memby, pe ambue katu hembirekoteéva memby, ndaha’éiva peteĩ tembiguái, peteĩ isãsóva uvei ha’e (Génesis 21,2.9).

23Pe tembiguái memby onace yvyarigua rete rembipota rupi, pe isãsóva memby onace Ñanderuete oipotágui ha ipromésa rupi.

24Ko mba’e kóva peteĩ ñe’ẽ ñembojoja (ta’ãnga) ha ohechaukase ko’ã mokõi kuña rupi oikomava’ekue mokõi ñembopy’apeteĩ, peteĩ pe cerrorusu Sinai rehegua, imembykuéra ha iñemoñarenguéra ningo tembiguái memby, Agar, isy oiko haguéicha avei.

25Arábia retã ñe’ẽme Agar he’ise cérro Sinai ha pe cérro Sinai oñembojojava’erã ko Jerusalen ko’ag̃agua rehe, ha ko Jerusalen ko’ag̃agua oiko tembiguái ramo ita’yrakuéra ha itajyrakuéra ndive.

26Pe Jerusalen yvategua katu, peteĩ kuña isãsóva, upéva ningo ñande sy.

27Ñanderuete kuatiañe’ẽme he’i: Evy’a, nde kuña ikatu’ỹva nememby, ha nde memby’ỹre reikóva, epurahéi ha esapukái vy’apópe ne’ĩra haguére nememby, umi kuña ojepoíva imembyvéta umi kuña omendávagui, (Isaías 54,1).

28Che hermanokuéra, peẽ ningo Isaákicha, peẽ Ñanderuete promésa ra’ykuéra.

29Ymaguare ojehu haguéicha ojehu ko’ág̃a peve, yma Esau ombyaise haguéicha Isaákpe, upéicha ojehu avei ko’ág̃a umi ojerovia’ỹva ombyaise umi Hesu Crísto rehe ojeroviávape, umi onacéva yvyarigua rete rembipota rupi ombyaise avei umi onacévape Ñanderuete Pytu Porãite rupi.

30Mba’épa Ñanderuete kuatiañe’ẽ he’i péva rehe: Emosẽ ko tembiguái imemby ndive, ko tembiguái memby ndohupitymo’ãi Ñanderuete jopói, pe isãsóva membýnte ohupityva’erã Ñanderuete jopói, (Génesis 21,10).

31Upévare, che hermanokuéra, ñande ndaha’éi pe tembiguái membykuéra, pe isãsóva membykuéra uvei.