Salmokuéra 18 - Biblia en Guaraní - ?anderuete ?e’? Por? 2015

David omboete Ñanderuetépe oipytyvõ porã haguére ichupe

1David opurahéi Ñanderuetépe oguenohẽ rõguare ichupe hese ija’e’ỹva, Saul pógui, he’ívo: Che rohayhu, Nde, che Ruete, chemombarete haguére.

2Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

3Ahenóita Ñanderuetépe, amomba’eguasu hag̃ua hekoitépe; Ha’e cheguenohẽta umi cherehe ija’e’ỹva pógui.

4Ñemano sãnguéra oñembojerepa cherehe, umi mba’evai ysyryguasúicha chemongyhyje hag̃ua.

5Umi omanóva retã sãnguéra ojerepa cherehe, omyasãi chéve iñuhã chejuka hag̃ua.

6Ajepy’apy vai jave ahenói Ñanderuetépe, ha amba’ejerure asy che Járape chepytyvõ hag̃ua. Ha’e ohendu che ñe’ẽ henda porãite guive, ha che mba’ejerure asy og̃uahẽma ijapysaitépe.

7Upéramo oñemomýi ha oryrýi pe yvy; umi cérro rapo peve oñemomýi ha oryrýi Ha’e ipochy ramo.

8Tatatĩ ojupi itĩgui ha tata oporombokusuguepáva osẽ ijurúgui, tatapỹi omyendýva oñemyasãi upérupi.

9Ha’e oipepy umi yvága ha oguejy, arai iñypytũva oĩ ipyguýpe.

10Ha’e ojupi ha oveve querubin (ángel ruvichaguasu) ári, ha oveve pe yvytu pepo ári.

11Ha omoĩ pytũ imo’ãha ramo, ijerekue rehe oĩ pytũ yguiguáva ha arai ára peguáva.

12Ha’e oñeñu’ãmba ypytũme, ha oiko arai ha tatatĩna apytépe.

13Yvate Ñanderuete omosunu, ha pe Ijyvatetéva ñe’ẽ ningo: Sunu, amandáu ha aratiri.

14Opa rupiete opoi ihu’ykuéragui, oity hi’aratiri ohundi hag̃ua ichupekuéra.

15Ore Ruete, Nde reja’o ha reipeju haguére nde pochy ojekuaa pe yeta ruguaite ha ojehechakuaa yvy pyendakuéra.

16Ha’e oipyso ipo yvágagui cheguenohẽ hag̃ua yguasúgui.

17Upéicha Ha’e cheguenohẽ umi cherehe ija’e’ỹva pógui, cherayhu’ỹva imbaretevégui chehegui.

18Oko’i hikuái cherehe che aime vai jave, Ñanderuete katu chemo’ã.

19Cheguenohẽ yvy inandi porãháme, Ha’e ningo chepytyvõ porã cherayhúgui.

20Upéicha Ñanderuete omyengovia porã chéve che reko heko peguáicha, ohepyme’ẽ porã chéve che pokuéra ipotĩ haguére,

21ha aguata haguére Ñanderuete rape rehe, ha ndapoíri che Ruetégui, aiko vai hag̃ua.

22Opaite hembiapoukapy oĩmba che renondépe ha namboykéi iñe’ẽ che rekovégui.

23Upéicha aiko hapykuéri teko potĩme ha añeñangareko anítei ha’a teko vaípe.

24Ha Ñanderuete omyengovia porã chéve che reko heko peguáicha, ha che pokúera ipotĩ háicha hesa renondépe.

25Nde ndepy’aporã ipy’aporãva ndive ha Nde nderekojoja hekojojáva ndive.

26Nde reko joheipyre heko joheipyréva ndive, ha nde reko pohýi hova mokoĩva ndive.

27Nde reipytyvõreína pe tetãygua oñemomirĩvape, ha remomirĩ umi oñembotuichávape.

28Nde remyendy chéve che rataindy, che Ruete, che Jára, ohesapéva chéve iñypytũha rupi.

29Nendive amosarambipáta cherehe ija’e’ỹvape, ha che Ruete ndive ajapyharáta táva tápia ári.

30Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.

31Ha máva piko yvága Jára, ndaha’éi ramo Ñanderuete. Ha mba’eichagua itaguasúpa oĩ, ndaha’éi ramo Ñanderuete.

32Ñanderuete chemyenyhẽ ipu’akágui ha ombosako’i porã chéve che raperã.

33Ha’e ome’ẽ chéve che pykuéra ku guasukuña pýicha, ha Ha’e chejoko porã aĩrõ cérro ru’ãme.

34Ha’e ombokatupyry che pokuéra ñorãirõme, Ha’e omombarete che pyapy aipepy porã hag̃ua che guyrapa bronceguiguáva.

35Nde rembohasa chéve ne mo’ãha cheñu’ã hag̃ua, nde akatúa oñangareko porã cherehe, ha nde poriahuvereko chemopu’ã.

36Nde rembotuicha che rape po’i ahaha rupi ani hag̃ua che añepysãnga aguata jave.

37Amuña ahupity peve cherayhu’ỹvape ha ndajevýi ahundipa’ỹre ichupekuéra.

38Amongu’ipa ichupekuéra anive hag̃ua opu’ã jevy hikuái, ha ho’apa peve che py guýpe.

39Nde chemombarete ñorãirõme ha remoĩmba che poguýpe umi cherehe oñemoĩvape.

40Nde remokañy umi cherehe ija’e’ỹvape, ikatu hag̃uáicha che ahundi umi cherayhu’ỹvape.

41Osapukái asy hikuái, ndaipóri katu oipytyvõva ichupekuéra, osapukái Ñanderuetépe, Ha’e katu nopenái hesekuéra.

42Yvy timbóicha amongu’i ichupekuéra pe yvytu ogueraha hag̃ua, okápe amombopa ichupekuéra ku mymba repotícha oĩva tapére.

43Ore Ruete, Nde cheguenohẽma pe ñorãirõguasu che retã meguágui, tetãnguéra che ndaikuaaiva’ekue ko’ág̃a omba’apo chéve g̃uarã che rembiguái ramo.

44Ohendu vove che ñe’ẽ iñe’ẽrendupa hikuái, umi tetã ambueygua ra’y oñemoĩmba che poguýpe.

45Umi tetã ambueygua ra’y ikangypa ha ryryipópe okañymba hikuái hóga tápia iñanambusuetévagui.

46Toikove Ñanderuete, toñemomba’eguasu che Járape ha toñemboete che salvadórpe.

47Ñanderuete omyengovia cherayhu’ỹva rembiapo vai ha Ha’e omoĩma tetãnguéra che poguýpe.

48Ha’e chepe’a umi cherehe ija’e’ỹva pógui, Ha’e cherupi umi cherehe oñemoĩva ári ha cheguenohẽ chejukaséva pógui.

49Upévare che romoherakuã porãta tetãnguéra apytépe, ha nde réra agueropurahéita.

50Tuicha Nde reipytyvõ Israel ruvichápe, Nde voi remoĩva’ekue, Nde rehechauka nde poriahuvereko Davídpe, Nde voi reiporavova’ekue ichupe ha iñemoñarenguérape avei tapia g̃uarã.