1 Samuel 1 - Biblia en Guaraní - ?anderuete ?e’? Por? 2015

1Oikova’ekue peteĩ kuimba’e Ramataímpe, peteĩ Zofimgua, Efrain cérrogui ouva’ekue, hérava Elcána, Jeroham ra’y, Eliu ra’yre, kóva Tohu ra’yre ha kóva Zuf ra’yre, peteĩ Efraingua.

2Ha’e hembireko mokõi, peteĩ héra Ána ha ambue Penina. Penina imemby hikóni, Ána katu ndikatúi imemby.

3Meme áño ko kuimba’e kóva osẽ itávagui ha oho oñembo’e ha oikuave’ẽ hag̃ua hymba rekove Ñanderuetépe g̃uarã Sílope, oikohápe mokõi Eli ra’y, Ofni ha Finees, Ñanderuete pa’i ramo.

4Ha og̃uahẽ vove pe ára Elcána oikuave’ẽ hag̃ua ome’ẽ hembireko Penínape, imemby kuimba’e ha kuñakuérape, peteĩteĩme peteĩ so’o pehẽngue ikuave’ẽmbýgui.

5Ánape katu ome’ẽ mokõi so’o pehẽngue, ohayhuvégui Ánape jepevérõ Ñanderuete nome’ẽi ichupe imemby hag̃ua.

6Ha Penína omoñeko’õi tapia Ánape, ha oñembohory hese, Ñanderuetépe nome’ẽi haguére ichupe imemby hag̃ua.

7Ha péicha ombopochy ichupe cáda áñope ojupi jave Ñanderuete rogaguasúpe; upévagui Ána ojahe’o jepi ha ndokarusevéi.

8Ha Elcána, iména, he’i ichupe: Mba’éiko nembojahe’o. Mba’éguipa nderekaruvéi. Ha mba’épa ndejepy’apy. Chépa nacheporãvéi ndéve g̃uarã 10 ne memby rãnguégui.

9Ha Ána opu’ã okaru ha hoy’u rire Sílope, oho oñembo’e hag̃ua Ñanderuete rógape, pa’i Eli oguapy aja upépe.

10Ána oñembyasy asývo oñembo’e Ñanderuetépe ha heta ojahe’o.

11Ha oñembo’évo he’i: Yvága atykuéra Jára, ema’ẽ ne rembiguái jepy’apy rehe, ha ani nderesarái chehegui ha reme’ẽ ramo chéve che membyrã, peteĩ kuimba’e, che voi aikuave’ẽ jevýta ndéve hekove, ha iñakã rehe noñembohasamo’ãi kyse hãimbe (oikóta Nazaréo ramo).

12Péicha ha’e oñembo’e puku aja Ñanderuete renondépe, Eli oma’ẽ mbuku ijuru rehe.

13Ána katu oñe’ẽ ipy’apýpe, hembénte omomýi, iñe’ẽ katu noñehendúi; ha Eli oimo’ã ha’e oka’uha.

14Upéramo ha’e he’i ichupe: Araka’e pevépa reka’úta. Emokõmbána ne víno.

15Ha Ána ombohovái ichupe: Ndaka’úiko che karai, che ningo peteĩ kuña añembyasyetévante, nda’úi víno ni taguato resay, che py’apýpe oĩvante, añohẽ Ñanderuetépe renondépe.

16Ani rereko ne rembiguáipe peteĩ kuña reko vaíva ramo; ambohasánte che jepy’apy ha che ñembyasy ko’ág̃a peve Ñanderuete renondépe.

17Ha Eli he’i ichupe: Tandepy’aguapyete rehóvo ha Ñanderuete, Israel Jára, tome’ẽ ndéve ne mba’ejerure.

18Ha Ána he’i Elípe: Ko ne rembiguái tahekopotĩ nde resa renondépe. Ha oho jevy hape rehe, okaru ha naimba’embyasyvéi.

19Ha opu’ã hikuái pyhareve omomba’eguasu hag̃ua Ñanderuetépe, ha oho jevy hógape, oĩva Ramápe. Ha Elcána oñeno hembireko Ána ndive ha Ñanderuetépe imandu’a hese.

20Ojehu, og̃uahẽvo hi’ára Ána imemby hag̃ua, imemby peteĩ mitãkuimba’e ha ombohéra ichupe Samuel, ha’e he’ígui: Ajerureva’ekuégui hese Ñanderuetépe.

21Uperire Elcána ojupi jevy mayma hogaygua ndive Sílope, oikuave’ẽ hag̃ua kuave’ẽmby ojepokuaa háicha ha ojapo hag̃ua iñe’ẽme’ẽ (ipromésa).

22Ána katu ndojupiséi, he’ínte iménape: Che ndajupimo’ãi ko mitã kóva opo’o peve, ikatu hag̃uáicha araha ha amoĩ Ñanderuete renondépe, ha upépe opyta hag̃ua opaite árape.

23Ha Elcána, iména he’i ichupe: Ejapo hi’ã porãve háicha ndéve; epyta remombo’o peve ne membýpe; ha Ñanderue tomoañete iñe’ẽ. Péicha, ko kuñakarai opyta oñangareko hag̃ua imemby rehe omombo’o peve.

24Ha omombo’o rire ogueraha ichupe, ha peteĩ tóro ra’yrusu 3 áñova, ha 22 lítro trígo ku’i, ha peteĩ víno ryru, ha ogueru Ñanderuete rógape, oĩva Sílope; ha pe mitã imichĩ gueteri.

25Ha oikuave’ẽ rire pe tóro ra’yrusu, ome’ẽ hikuái Elípe ko mitã kóva.

26Ha Ána he’i ichupe: Nde karaiguasu, nde rekovére, che ningo pe kuñakarai añembo’eva’ekue ko’ápe nde ypýpe Ñanderuetépe ha ajerure ichupe che membyrã rehe.

27Ko mitã kóva rehe añembo’eva’ekue, ha Ñanderuete ome’ẽva’ekue chéve che rembijerure.

28Upévare ame’ẽ jevy ichupe Ñanderuetépe apromete haguéicha, ha’e oikove aja pukukue toiko che Jára mba’erã ramo, ha upéi omomba’eguasu hikuái Ñanderuetépe.