Isaías 39 - Biblia en Guaraní - ?anderuete ?e’? Por? 2015

Babilónia retã ruvicha remimbou og̃uahẽ Ezequías rendápe

1Umi ára umívape Merodacbaladan, Baladan ra’y, Babilónia retã ruvicha oguerahauka Ezequíaspe peteĩ kuatiañe’ẽ ha peteĩ jopói oikuaágui ha’e hasy hague, ha ko’ág̃a okuera jevymaha.

2Ha Ezequías ovy’aite hendivekuéra, ha ohechauka ichupekuéra pe óga oñeñongatuhápe Juda mba’erepyeta, pláta ha óro, mba’e ryakuã porãita, acéite iporãitéva, opaichagua tembiporu ñorãirõ megua; ndaipóri mba’eve hógape ha hetãpy tuichakue javeve, Ezequías ndohechaukaiva’ekue ichupekuéra.

3Upéramo pe proféta Isaías ou tetã ruvicha Ezequías rendápe, ha he’i ichupe: Mba’éiko he’i umi kuimba’e, ha mamóguipa ou hikuái ne rendápe. Ha Ezequías he’i ichupe: Tetã mombyryetégui, Babilóniagui, ou hikuái che rendápe.

4Ha Isaías oporandu: Mba’éiko ohecha hikuái nde rogaguasúpe. Ha Ezequías ombohovái: Opaite mba’e oĩva guive ipype ohecha hikuái, ha ndaipóri che mba’erepyeta apytégui ahechauka’ỹva’ekue ichupekuéra.

5Upémaramo Isaías he’i Ezequíaspe: Ehendu Ñanderuete, yvága atykuéra Jára ñe’ẽ:

6Eikuaa porãke og̃uahẽta katuete pe ára ojeguerahapáta Babilóniape opaite mba’e oĩva guive nde rogaguasúpe, nde rukuéra oñongatumava’ekue ko ára peve; mba’evete ndopytamo’ãi, he’i Ñanderuete.

7Ojapyhýta hikuái avei nde ra’ykuéra, ogueraha hag̃ua Babilónia retã ruvicha rogaguasúpe, omba’apo hag̃ua hembiguái ramo.

8Ha Ezequías he’i Isaíaspe: Ñanderuete ñe’ẽ, nde eremava’ekue, iporãiterei, ha he’ive: Avy’aite aikove aja ndaiporimo’ãvéima ñorãirõ.