Jeremías 27 - Biblia en Guaraní - ?anderuete ?e’? Por? 2015

Jeremías oñe’ẽ pe cangálla

rupi

1Joacim, Josías ra’y, Juda retã ruvicha oñepyrũvo oisãmbyhy ou ko Ñanderuete ñe’ẽ kóva Jeremíaspe, ha he’i:

2Ñanderuete he’i chéve péicha: Embosako’i tukumbo guéi jokuaha ha peteĩ cangálla, ha emoĩ umía nde atúa ári;

3ha ereukáta Edom, Moab, Amon, Tíro ha Sidon retã ruvichakuérape, iñe’ẽ rerahahára juru rupi og̃uahẽva Jerusalénpe Sedequías, Juda retã ruvicha rendápe.

4Ha eréta ichupekuéra tombohasa ko ñe’ẽ ijarakuérape: Péicha he’i Yvága Atykuéra Jára, Israel Jára: Péicha pejeva’erã pende jarakuérape.

5Che pu’akapa ha che pyapy mbarete rupi ajapomava’ekue ko yvy, yvyarigua ha mymbakuéra oiko hag̃ua ko yvy apére, ha Che ame’ẽta che pu’aka upe aipotávape.

6Ko’ág̃a Che amoĩmbaite ko tetã kóva Nabucodonosor, Babilónia retã ruvicha pópe, péva ningo che rembiguái, ha umi mymba ñu rupigua jepeve Che ame’ẽ ichupe oiko hag̃ua hikuái hembiguái ramo.

7Ha opaite ko’ã tetã opyta ipoguýpe ita’ýra, ha ita’ýra ra’yre jevy peve, og̃uahẽ meve avei hi’ára hetã opyta hag̃ua avei ambue tetã imbaretevéva ha hetã ruvichaguasu poguýpe.

8Ha upe tetã ndoikoséiva Nabucodonosor, Babilónia retã ruvicha rembiguái ramo, ha nomoĩséi ramo ijatúa ári Babilónia ruvicha cangálla, upe tetã upévape ahaviráta kyse puku, ñembyahýi ha mba’asy iñasãiva rupi, he’i pende Ruete, ahundi peve ipo rupi.

9Ha upévare aníke pejapysakátei pende proféta japu rehegua, umi imba’ekuaáva rehe, umi ikepegua ohecháva rehe, umi araíre oma’ẽva rehe, ha pende paje apohára rehe, oñe’ẽ ramo peẽme, he’ívo: Ndapeikomo’ãi Babilónia retã ruvicha rembiguái ramo.

10Ha’ekuéra ningo omomarandu peẽme japu, penemondo mombyry hag̃ua pene retãgui, Che pomboyke ha pohundi hag̃ua.

11Ha upe tetã oñemomirĩva Babilónia retã ruvicha renondépe opyta hag̃ua icangálla guýpe ha oiko hag̃ua hembiguái ramo, Che ahejáta ijyvyteépe, he’i Ñanderuete, oñemitỹ ha oiko hag̃ua ipype.

12Ha añe’ẽ avei Sedequías, Juda retã ruvichápe ko’ã ñe’ẽ he’i haichaite, ha ha’e ichupe: Pemoĩ pende atúa ári Babilónia retã ruvicha cangálla guýpe, ha peiko hembiguái ramo ha hetã rembiguái ramo ha peikovéta.

13Mba’upéiko pemanose rei, nde ha ne retãyguakuéra, kyse puku, ñembyahýi térã mba’asy iñasãiva rupi, Ñanderuete he’íma voi opaite tetã oikose’ỹva Babilónia retã ruvicha rembiguái ramo oñehunditaha katuete.

14Aníke perovia umi proféta japu ñe’ẽ, he’i ramojepe peẽme: Ndapeikomo’ãi Babilónia retã ruvicha rembiguái ramo; japúnte omomarandu hikuái peẽme.

15Che namondóikuri ichupekuéra pene rendápe he’i pende Ruete, ha ha’ekuéra oiko omomarandu gua’u che rérape, Che poity ha pohundipáta hendivekuéra, peẽ peneñe’ẽrenduse ramo ichupekuéra.

16Ha añe’ẽve avei umi pa’i ha opaite ko’ã tetãyguápe, ha’évo ichupekuéra, péicha he’i Ñanderuete: Aníke pejapysaka pende proféta japu omomarandúva rehe, he’ívo: Peikuaa porãke, umi tembiporukuéra Ñanderuete róga pegua pya’e ha voi ojeguerupa jevýta Babilóniagui, japu ningo ha’ekuéra omomaranduva’ekue peẽme.

17Aníke pehendu ichupekuéra, peiko katu Babilónia retã ruvicha rembiguái ramo ha peikovéta; mba’érehe piko peipota oñembotapere rei ko táva kóva.

18Ha oime ramo ijapytépe proféta añeteguáva ha Ñanderuete ñe’ẽ oĩ ramo añetehápe hendivekuéra toñembo’e hikuái ko’ág̃a Ñanderuetépe ani hag̃ua umi tembiporu hembymíva che rogaguasúpe ha Juda retã ruvicha rógape ojeguerahapátei avei Babilóniape.

19Péicha he’i pende Ruete, Yvága Atykuéra Jára, umi horcon rehe, pe yenda rehe ojejapova’ekue bróncegui, ipyenda rehe ha opaite ambue Ñanderuete rogaguasu rembiporukuéra hembymíva rehe gueteri ko távape,

20ha pe Babilónia retã ruvicha, Nabucodonosor, ndoipe’aiva’ekue ogueraha ramoguare Jerusaléngui, Jeconías, Joacim ra’y, Juda retã ruvicha árape ha avei mayma umi karai anciáno Babilónia retãme,

21péicha he’i Yvága Atykuéra Jára, Israel Jára, umi tembiporu hembyva’ekue rehe gueteri hogaguasúpe, ha avei Juda retã ruvicha rógape oĩva Jerusalénpe:

22Ojeguerahapáta Babilóniape ha upépe opytáta Che aha añandu jevy peve ichupekuéra, he’i pende Ruete; ha upéi aguerupa jevýta umía ha amohenda pyahu jevýta hendaguépe.