1Marandu Babilónia rehe. Ku yvytu’atãicha Négev rupi ohasáva, péicha ou yvy perõgui peteĩ tetã ñanemongyhyjéva.
2Ñanderuete ohechauka che payetépe (visiónpe) peteĩ mba’e ipohýiva. Pe mondaha ou omonda hag̃ua ha pe oporohundíva ou ohundi hag̃ua. Nde, Elam, ejupi katu, ha nde, Média eporomongora, amokirirĩmbáta pene pyahẽ.
3Upévare che rete oryryipa ha ojepy’apy ku kuña imembymbotávaicha, ha umi mba’e che ahendúva chemondyiete ha umi mba’e ahecháva chemboryryipa.
4Che py’a ipirĩhína ha kyhyje chembopy’amirĩ, pe ka’aru pytũ chembovy’ava’ekue jepi ko’ág̃a chemondyiete.
5Oñemoĩma pe mesa, ojepysóma umi guapyha okaru ha hoy’u hag̃ua. Néike mburuvichakuéra pepu’ã pemona hag̃ua acéite rehe pende rete mo’ãha.
6Ñanderuete he’íma chéve péicha: Tereho ha emoĩ tahachi (guárdia) oñangarekóva ha oikuaauka hag̃ua ohecháva guive.
7Ha ohecha ramo kuimba’e, cárro ha kavaju arigua, búrro arigua térãcaméllo árigua, toñembosako’i oma’ẽ porãve hag̃ua,
8ha tosapukái ku leõ okororõvaicha ha te’i: Che Jára, añembo’y arakuépe pe táva tápia ári añangareko hag̃ua ha avei pyharekuépe aime añangareko añemongu’eguasu’ỹre.
9Ahecha ouha kuimba’e kavaju arigua aty, mokõi mokõi oñondive ha cárro reheve avei. Upéi oñe’ẽ ha he’i hikuái: Ho’áma, ho’áma Babilónia, ha opaite ijára ra’ãnga ojejokapa yvy rehe.
10Ehendu porãke, nde che retã, rejoguáva trígo ojykýivape, ambohasa peẽme umi mba’e yvága atykuéra Jára ha Israeljára omombe’umava’ekue chéve.
Profecía Edom rehe11Marandu Edom rehe. Seir guive ojesapukái chéve: Nde, tahachi reñangarekóva pe táva rehe mba’e hóra piko hína. Mba’e hóra piko hína, ne’ĩrapa ko’ẽmbota. Hi’are piko gueteri iko’ẽ hag̃ua.
12Ha pe tahachi oñangarekóva ombohovái: Outamahína pe ko’ẽ, iñypytũmba ningo gueteri; peporanduse jevy ramo, peju jevy katu, peikuaa hag̃ua pe ko’ẽju hóra.
Profecía Arábia rehe13Marandu Arábia rehe. Peẽ pejúva Dedángui pehasava’erã pyharekuépe Arábia desiérto rupi.
14Peẽ peikóva Tema retãme, pesẽ pehug̃uaitĩ ijy’uhéivape pemboy’u hag̃ua ichupekuéra, peipytyvõke umi okañývape ha pemongaru ichupekuéra.
15Kyse pukúpe omuña ichupekuéra ha okañy hikuái kyse puku oñemopu’ãvagui, guyrapa sã oñemyatãvagui ha ñorãirõ ipohyietévagui.
16Ñanderuete péicha he’i chéve: Peteĩ añovénte, ha Cedar pu’aka opáta, opa háicha pe ñorãirõhára rembiapo oñeme’ẽva hembiapo repýre peteĩ áñope g̃uarãnte.
17Ha mbovymi hu’y mombohára hembýta Cedar ñemoñaréva apytépe, Ñanderuete, Israel Jára, he’íma voi ko’ã mba’e oikotaha.
Who We AreWhat We EelieveWhat We Do
2025 by iamachristian.org,Inc All rights reserved.
