2 Crónicas 15 - Biblia en Guaraní - ?anderuete ?e’? Por? 2015

Ñemyatyrõ Asa ojapóva Ñanderuete rape rehe

1Ñanderuete Pytu Porãite ou Azarías, Obed ra’y ári.

2Ha osẽ ojejohu hag̃ua Asa ndive, ha he’i ichupe: Cherendúke, Asa ha peẽ Juda ha Benjaminguakuéra; Ñanderuete oĩta penendive, peẽ peime ramo hendive; ha peheka ramo ichupe, pejohúta avei ichupe; pepoi ramo ichugui ha’e opoíta avei pendehegui.

3Heta ára Israel oikóma Ñanderuete ỹrehe, pa’i oporombo’e ỹrehe ha hembiapoukapy ỹrehe;

4ha ohasa asyetereírõ aja ojevy Ñanderuete rendápe, Israel Járape; ha ohekágui ichupe hikuái hekoitépe, ojohúkuri ichupe avei.

5Umi árape ndaipóri pytu’u, pe oikéva térã pe osẽvape g̃uarã, jepy’apýmante oĩ yvy apére.

6Ha peteĩteĩ oñemoĩva’ekue hapicháre, ha peteĩ táva oñorãirõva’ekue ambue távare; Ñanderuete omyangekõigui ichupekuéra opaichagua mba’evai rupi.

7Peẽ katu peñeha’ãmba ha ani pende kangýtei, pende po rembiapo repy oñeme’ẽva’erã katuete peẽme.

8Asa ohendúvo pe ñe’ẽ pe proféta Azarías, Obed ra’y he’íva, ikyre’ỹve ha oipe’a umi jára gua’u ra’ãnga opaite Juda ha Benjamin retãgui ha umi táva ha’e ojapyhyva’ekuégui Efrain cérrogui; ha omyatyrõ Ñanderuete kuave’ẽmby renda oĩva Ñanderuete rogaguy rovái.

9Upéi ombyatyuka opaite Judaygua ha Benjaminguakuérape ha ambue Israel tribukuéra oikóva hendivekuéra Efraingua, Manasesgua ha Simeonguápe; heta Israelgua ohaságui hendive, ohechágui Ñanderuete oĩha hendivekuéra.

10Oñembyaty hikuái Jerusalénpe, pe jasy mbohapyha jave, Asa oisãmbyhývo 15 áñoma.

11Ha’e pe ára pévape oikuave’ẽ hikuái Ñanderuetépe g̃uarã, umi tymba ogueruva’ekue ñorãirõhágui, 700 tóro ha 7.000 ovecha.

12Upéramo ome’ẽ hikuái iñe’ẽ ohekataha Ñanderuetépe, ituvakuéra Jára, ipy’apy ha hi’angaite guive;

13ha oimeraẽva oheka’ỹva Ñanderuete, Israel Járape, omanova’erã, taha’e tuicháva térã michĩva, taha’e kuimba’e térã kuña.

14Ha ome’ẽ jevy hikuái iñe’ẽ Ñanderuetépe sapukái ha vy’apópe, trompéta ha turu púpe oservi jevytaha ichupe.

15Opaite Judayguakuéra ovy’a joa ome’ẽ haguére iñe’ẽ ipy’aite guive, ohekágui ha ojohúgui hikuái avei ichupe; upévare Ñanderuete ome’ẽ ichupekuéra avei pytu’u opa rupiete.

16Ha Asa oipe’a avei ijarýi Maacágui imburuvicha reko, ojapógui peteĩ Asera ra’ãnga, ha péva Asa oipehe’ãukapa, ha ohapyuka Cedron ysyry rembe’ýpe.

17Upeichavéramo jepe, ndojepe’ái Israel yvýgui umi ñemomba’eguasu yvy yvatépe, jepevémo Asa ipy’a porã oikove aja pukukue.

18Ha’e ogueru Ñanderuete rógape umi mba’erepy itúva ome’ẽva’ekue, ha umi mba’e ha’e voi ome’ẽse avei: Pláta, óro ha tembiporukuéra.

19Ha ndoikovéi ñorãirõ Asa oisãmbyhy aja umi 35 áño pukukue.