Matéo 6 - Biblia en Guaraní - ?anderuete ?e’? Por? 2015

Tembiapo porã

1Peñeñangarekóke ani hag̃ua pejapo pene rembiapo porã pende rapichakuéra renondépe, pejehechauka hag̃uánte ichupekuéra, péicha avei ani peme’ẽ pirapire imboriahúvape pejehechauka hag̃uánte, péicha ramo Ñanderuete yvágape oĩva ndohepyme’ẽmo’ãvéima peẽme pene rembiapo porã repykue.

2Reme’ẽ jave pirapire imboriahúvape ani rembopuka turu, ne renondépe umi tova mokõi (fariseokuéra) ojapo háicha Ñanderuete rogakuérape ha táva cálle rupi, oñembotuicha hag̃uánte. Añetehápe Che ha’e peẽme ha’ekuéra ohupitýma hembiapo porã repy.

3Nde reipytyvõ ramo nde rapichápe ani reikuaaukátei nde asúpe, pe mba’e nde akatúa ojapóva, (péva he’ise: Ani reñembotuicha ne rembiapo porã rupi nde rapicha renondépe).

4Upévare eipytyvõ ñemiháme nde rapichápe, ha Ñanderuete ohecháva opaite mba’e nde rejapóva guive, ñemiháme jepe, omyengoviáta ndéve.

Hesu ombo’e mba’éichapa ñande ñañembo’eva’erã

5Ha reñembo’e ramo, ani reñembo’e umi tovamokõi oñembo’e háicha; ha’ekuéra ningo oñembo’e ñembo’yhápe Ñanderuete rógape ha umi tape ojuasaha rupi, ojehechauka hag̃ua hapichakuérape. Añetehápe Che ha’e peẽme, ha’ekuéra ohupitýma hembiapo repy umi mba’e rupi.

6Ha nde reñembo’e ramo, eike nde kotýpe, emboty ne rokẽ, ha eñembo’e nde Ruetépe ne añoháme, ha nde Ruete ohechapáva, pe ñemiháme jepe rejapóva, omyengoviáta ndéve.

7Ha peñembo’e jave ani peñe’ẽ heta rei ojapo háicha umi oikuaa’ỹva Ñanderuetépe, oimo’ãgui iñe’ẽ heta rupi oñehendukava’erãha.

8Upévare ani peiko ha’ekuéraicha; pende Ruete ningo oikuaapa voi pene remikotevẽ, peẽ pejerure mboyve ichupe.

9Upévare péicha peñembo’e: Ore Ruete reĩva yvágape, toñemomba’eguasu nde réra.

10Tou ne retãguasu, tojejapo avei ne rembipota ko yvy ári yvága peguáicha.

11Eme’ẽmína oréve ore rembi’urã roikotevẽva ko árape.

12Ha eperdonamína ore rembiapo vaikue, ore roperdona haguéicha ore rapichápe hembiapokue ojapo vaiva’ekue orerehe.

13Ha ani reheja rojepy’ara’ã, orepe’a uvei mba’evaígui (añágui).

14Peẽ peperdona ramo pende rapicha rembiapo vai, Ñanderuete operdonáta avei pene rembiapo vaikue.

15Peẽ napeperdonái ramo pende rapicha rembiapo vai, Ñanderuete katuete noperdonamo’ãi avei pene rembiapo vaikue.

Karu’ỹ (ajúno

)

16Pekaru’ỹ (peajuna) aja, ani peiko tovasýpe umi hova mokõivaicha; ha’ekuéra ningo omoambue hovakuéra, hapichakuéra ohecha hag̃ua ohasaha karu’ỹre. Añetehápe ha’e peẽme, ha’ekuéra ohupitýma hembiapo repykue.

17Nde rekaru’ỹ aja, emohyakuã ne akã ha ejovahéi,

18ani hag̃ua nde rapichakuéra ohechakuaa rehasaha karu’ỹre, ha nde Ruete ohechapáva upe rejapóva ne añoháme, Ha’e ohechakuaava’erã ha omyengoviava’erã ndéve umi mba’e rejapóva nde añoháme.

Mba’eita yvágape

19Ani pembyaty pirapireita ko yvy ári, kupi’i ha ao raso ombyai hag̃uáme, ha mondahakuéra omonda hag̃uáme,

20pembyaty uvei pirapireita yvágape, kupi’i ha ao raso ombyai’ỹ hag̃uáme, ha mondahakuéra omonda’ỹ hag̃uáme.

21Nde pirapireita oĩháme, upépe oĩva’erã avei ne ñe’ã (korasõ).

22Ñande resa ningo ñande rete resapeha, ha nde resa ipotĩ ramo (ne rembipota vaígui), opaite nde rete ohesapeva’erã avei.

23Nde resa imaléo ramo (rejaposégui pe ivaíva), opaite nde rete iñypytũva’erã. Upéicha rupi iñypytũ ramo nde resape, ituichaite pe ypytũ oĩva ndepype.

24Avave ndaikatúi oservi mokõi járape; upéicharamo ndaija’emo’ãi peteĩva rehe, ha ohayhuvéta ambuépe, térã oñembojáta peteĩre ha oñemboykéta ambuégui. Ndaikatúi peẽ peiko Ñanderuete rembiguái ha avei pirapire rembiguái ramo.

Ñanderuete oñangareko ita’ýra ha itajyrakuéra rehe

25Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui.

26Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra.

27Máva piko pende apytégui ojepy’apyve ramo jepe ikatu ombopukuve hekove peteĩ ára (día) jepe.

28Ha mba’upépa pejepy’apypeína pende ao rehe. Pema’ẽna lírio (yvoty) ñu megua rehe, mba’éichapa okakuaa porã, nomba’apói ni noipovãi ramojepe.

29Che katu ha’e peẽme, Salomon jepe opaite ijeguaka reheve noñemondéi peteĩ lírioicha.

30Ñanderuete péicha omonde porã ramo pe yvoty ñu megua, oiko porãvahína ko árape, ha ko’ẽ ramo oñemombótava tatakuápe, piko Ha’e noñangareko porãichéne penderehe, peẽ tekove jerovia’íva.

31Upévarehe, ani pejepy’apy ha peje: Mba’épa ro’úta, térã mba’épa romboy’úta, térã mba’épa romondéta.

32Ko’ã mba’e umi ojerovia’ỹva oñeha’ã ohupity hag̃ua, pende Ruete yvága pegua katu oikuaa porã peẽ peikotevẽha opaite ko’ã mba’e rehe.

33Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme.

34Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.